Read New Revised Asante Twi Bible Yesaia 38 Bible Online

Yesaia 38 - New Revised Asante Twi Bible bible

Yesaia 38

¹ Nna no mu no, Hesekia yaree owuyareɛ, na Amos ba Odiyifoɔ Yesaia baa ne nkyɛn bɛka kyerɛɛ no sɛ: Sɛ AWURADE seɛ nie: Hyɛ wo fie nsamanseɛ, na worebɛwu, na worennya nkwa.

²Ɛnna Hesekia danee n’ani kyerɛɛ ɔfasuo, na ɔbɔɔ AWURADE mpaeɛ sɛ:

³ Ao, AWURADE, kae sɛdeɛ manante w’anim nokorɛ mu, ne akoma a ɛdi mu mu, na mayɛ deɛ ɛyɛ w’ani so. Na Hesekia suu esu kɛseɛ.

⁴Ɛnna AWURADE asɛm baa Yesaia nkyɛn sɛ:

⁵Kɔ na kɔka kyerɛ Hesekia sɛ: Sɛdeɛ AWURADE, w’agya Dawid Nyankopɔn, seɛ nie: Mate wo mpaebɔ, mahunu wo nisuo; hwɛ, mede mfeɛ dunum bɛto wo nna so,

⁶na mɛgye wo ne kuro yi afiri Asiriahene nsam, na mabɔ kuro yi ho ban.

⁷Na yei nyɛ wo AWURADE nsam nsɛnkyerɛnneɛ, sɛ AWURADE bɛyɛ adeɛ a waka no:

⁸Hwɛ, merebɛsane owia dɔn so sunsum a owia ma no sianee Ahas owia dɔn soɔ no mama no akɔ akyire nkyekyɛmu du.[10] Na owia sanee n’akyi owia dɔn no so nkyekyɛm du a asiane dada no.

⁹Yudahene Hesekia nsɛm a ɔyareeɛ, na ɔnyaa ne yadeɛ mu nkwa no, ɔtwerɛɛ nie:

¹⁰Me deɛ, mekaa sɛ: Me nna mu kommyɛ mu na merekɔ Asamando aboboano, wɔregye me nsam me mfeɛ nkaeɛ.

¹¹ Mese: Merenhunu AWURADE bio, wɔ ateasefoɔ asase so; merenhunu nnipa bio, wɔn a wɔte wiase no mu.

¹² Wɔayi me tenabea ma no afiri me ho kɔ sɛ odwanhwɛfoɔ ntomadan, mebobɔ me nkwa sɛ ɔtomanwomfoɔ; anka ɔrebɛtwa me afiri asadua no mu: Worewie me da koro adesaeɛ.

¹³ Mesui pɛɛ mmoa kɔsii anɔpa, ɔbubuu me nnompe nyinaa sɛ gyata: Worewie me da koro adesaeɛ.

¹⁴Mesii apini sɛ asomfenakatakyi, sɛ asukɔnkɔn, medii abooboo sɛ aburuburo; m’aniwa yɛɛ siamoo hwɛɛ ɔsoro sɛ: O AWURADE, me ho kyere me, di ma me!

¹⁵Menka sɛn? Waka akyerɛ me na ɔno ara ayɛ. Me nna nyinaa afiri m’ani so, me kra awerɛhoɔ no nti.

¹⁶O AWURADE, ɛno so na nnipa nam tena aseɛ, na ɛno nkutoo mu na me honhom nkwa wɔ, ɛnneɛ na ma me ho nsane, na ma mennya nkwa.

¹⁷ Hwɛ, me yiedie nti, mehunuu amaneɛ pii; na woayi me kra afiri ɔsɛeɛ amena mu de afam wo ho, ɛfiri sɛ wotoo me bɔne nyinaa guu w’akyi.

¹⁸ Na Asamando rentumi nna wo ase, na owuo rentumi nkamfo wo. Wɔn a wɔsiane kɔ Amena mu no ntwɛn wo nokorɛ;

¹⁹ɔteasefoɔ, ɔteasefoɔ, na ɔda wo aseɛ, sɛdeɛ meyɛ nnɛ yi; agya ma ne mma nhunu wo nokorɛ.

²⁰AWURADE bɛgye me nkwa, na yɛbɛbɔ nsankuo yɛn nkwa nna nyinaa, wɔ AWURADE fie.

²¹Nso Yesaia kaa sɛ wɔmfa borɔdɔma ɛtoa ntare mpɔmpɔ no so, na ɔbɛnya ahoɔden.

²²Na Hesekia nso bisaa sɛ: Ɛdeɛn ne nsɛnkyerɛnneɛ sɛ mɛkɔ AWURADE fie?