Read New Revised Asante Twi Bible Yesaia 41 Bible Online

Yesaia 41 - New Revised Asante Twi Bible bible

Yesaia 41

¹Mpoano aman, mommua mo ano ntie me, na aman nhyɛ wɔn ho den foforɔ. Ma wɔmpinkyɛ mmɛkasa, momma yɛmmom nhyia asɛnniiɛ.

² Hwan na ɔnyane deɛ ɔfiri apueeɛ no a tenenee hyia no baabiara a ɔnam? Ɔde amanaman gu n’anim, na ɔde ahemfo hyɛ n’ase. N’afena ma wɔyɛ sɛ mfuturo, ne tadua yɛ wɔn sɛ ntɛtɛ a ɛbɔ guo;

³ɔti wɔn na ɔtwam sɔnn, ɔkwan a ne nan nsii so da so.

⁴ Hwan na ɔyɛeɛ, na ɔmaa no baeɛ, na ɔfrɛ awoɔ ntoatoasoɔ firi mfitiaseɛ? Ɛyɛ me AWURADE a meyɛ kannifoɔ, na awieeɛ nso, mene ɔno ara.

⁵Nsuano aman hunui, na wɔsuroe, asase awieeɛ ho popoe; wɔpinkyɛe na wɔbae.

⁶Oyi boa ne yɔnko, na oyi ka kyerɛ ne nua sɛ: Hyɛ wo ho den!

⁷Odwumfoɔ hyɛ sikadwumfoɔ den, deɛ ɔde saeɛ tonomtonom ho yɛ deɛ ɔbɔ tommoɔ soɔ saa ara, ɔka wɔ ɛsɔ no ho sɛ: Ayɛ yie, na ɔde nnadewa bobɔ mu na antu.

⁸ Na wo, m’akoa Israel, Yakob a mayi no, me dɔfo Abraham asefoɔ!

⁹Wo a masɔ wo mu afiri asase ano na mafrɛ wo afiri n’ahyeɛ so aba, na maka makyerɛ wo sɛ: M’akoa ne wo, mayi wo, na merento wo mentwene!

¹⁰ Nsuro, na me ne wo wɔ hɔ, mma w’akoma nntu, na mene wo Nyankopɔn. Mehyɛ wo den, nso meboa wo, nso mede me tenenee nifa mekura wo mu.

¹¹Hwɛ, wɔn a wɔn bo afu woɔ nyinaa ani bɛwu na wɔasopa, na nnipa a wɔne wo anya no bɛyɛ sɛdeɛ wɔnyɛ hwee, na wɔayera.

¹²Wɔn a wɔne wo ham no, wobɛhwehwɛ wɔn, nanso worenhu wɔn; na wɔn a wɔne wo di ako no bɛyɛ sɛdeɛ wɔnyɛ hwee, na wɔasa.

¹³Na me, AWURADE wo Nyankopɔn, mekura wo nifa mu; me na mese wo sɛ: Nsuro, me ara mɛboa wo!

¹⁴ Nsuro, aboawa Yakob, ne mo Israel mma! Me ara mɛboa wo, AWURADE na ɔkaeɛ, na wo Gyefoɔ ne Israel Kronkronni no.

¹⁵Hwɛ, mede wo bɛyɛ ɔporeɛ afidie nnamnnam, foforɔ, anofanu, na woapore mmepɔ ayam wɔn dukuduku, na woayɛ nkokoɔ sɛ ntɛtɛ.

¹⁶Wobɛhu wɔn so, na mframa asoa akɔ, na ahum abɔ apete. Na wo deɛ, wobɛdi AWURADE mu ahurisie de Israel Kronkronni no ahyehyɛ wo ho.

¹⁷Mmɔborɔfoɔ ne ahiafoɔ a wɔhwehwɛ nsuo a ebi nni hɔ na sukɔm nti wɔn tɛkyerɛma so awoɔ no, me, AWURADE mɛgye wɔn so, me, Israel Nyankopɔn, merennya wɔn.

¹⁸ Mɛtue mpampa pradaa so nsuwansuwa ne mmonhwa mu nsuo aniwa; mede serɛ so mɛyɛ tadeɛ, na mede asase pɛsɛɛ mayɛ asutire;

¹⁹mɛma ntweneduro, okuo, ohwamma ne ngo nnua aba ɛserɛ so; mɛma pepeaa, asɛsɛ ne kwabɔhorɔ abom asisi anwea pradada so,

²⁰na nnipa ahunu, ate aseɛ, de asie akoma mu na wɔadwene ho prɛko sɛ: AWURADE nsa na ɛyɛɛ yei, na Israel Kronkronni no na ɔbɔeɛ.

²¹Momfa mo asɛm mmra, AWURADE na ɔseɛ, mommɛkyerɛ mo nsɛm ase, Yakob hene na ɔseɛ.

²² Wɔmfa mpinkyɛ mmɛkyerɛ yɛn deɛ ɛbɛba. Monkyerɛ yɛn akane nnoɔma no sɛdeɛ ɛteɛ, na yɛnnwene ho nhunu n’awieeɛ, anaa deɛ ɛbɛba no, momma yɛnte.

²³Monka deɛ ɛbɛba daakye no nkyerɛ yɛn na yɛnhunu sɛ anyame ne mo; aane, monyɛ papa anaa bɔne, na yɛn ho nnwiri yɛn na yɛnsuro.

²⁴Hwɛ, monyɛ hwee, na mo nneyɛɛ yɛ adehuhuo; akyiwadeɛ ne deɛ ɔfa mo.

²⁵Mahwanyan obi afiri atifi fam ama no aba, awiapuebea na ɔbɛfiri abɔ me din; na ɔbɛba amradofoɔ so sɛ anwommoɔ so, na ɔte sɛ ɔnwomfoɔ a ɔwɔ dɔteɛ.

²⁶Hwan na ɔfiri mfitiaseɛ kaeɛ, na anka yɛnhunu, anaasɛ waka ato hɔ, na yɛnka sɛ: Ɔyɛ ɔnokwafoɔ? Ampa, deɛ ɔkaeɛ nni hɔ, deɛ ɔmaa wɔteeɛ nni hɔ, deɛ ɔtee mo nsɛm nni hɔ.

²⁷ Me na medii kan meka mekyerɛɛ Sion sɛ: Hwɛ, wɔn nie: Na Yerusalem na memaa no ɔsɛmpakafoɔ.

²⁸Na mehwɛeɛ, na obiara nni hɔ, na wɔn mu nso, ɔfotufoɔ nni hɔ a mebisa a, anka ɔbɛbua me.

²⁹ Hwɛ, wɔn nyinaa yɛ ɔkwa, wɔn nneyɛɛ nyɛ hwee; wɔn guo ahoni yɛ mframa ne ahuhudeɛ.