Read New Revised Asante Twi Bible Yesaia 42 Bible Online

Yesaia 42 - New Revised Asante Twi Bible bible

Yesaia 42

¹ Hwɛ, m’akoa a mehyɛ no mpamden nie, deɛ mayi no a me kra ani sɔ no; mede me honhom magu ne so; ɔde atemmuo bɛfiri akɔ amanaman mu.

²Ɔrenteam na ɔremma ne nne so, na ɔremma wɔnte ne nne abɔntene so;

³ demmire a ayɛ mmerɛ no, ɔremmu mu, na kanea mu asaawa a ɛrefiri wisie no, ɔrennum; nokorɛ mu na ɔbɛyi atemmuo adie.

⁴N’asɛm ano rennwo, na ɔrempa aba de bɛkɔ akɔsi sɛ ɔde atemmuo tenenee bɛsi asase soɔ, na mpoano aman bɛtwɛn ne mmara.

⁵Sɛ AWURADE Nyankopɔn seɛ nie, deɛ ɔbɔɔ ɔsoro na ɔtrɛɛ mu, na ɔyerɛɛ asase ne so afifideɛ nyinaa, na ɔde ahome ma ɛso nkurɔfoɔ, na ɔde honhom ma wɔn a wɔnam soɔ no seɛ nie:

⁶ Me, AWURADE, mafrɛ wo tenenee mu, na masɔ wo nsa, na makora wo, na mede wo mayɛ ɔman apam ne amanaman hann

⁷ sɛ: Bue ani a afira, yi apokyerɛfoɔ firi afiase ne wɔn a wɔtete sum mu firi nneduadan mu.

⁸ Mene AWURADE, me din ne no, na meremfa m’animuonyam mma obi, na m’ayeyie nso, meremfa mma ahoni.

⁹ Akane deɛ no, hwɛ, aba mu, na nnoɔma foforɔ na merekyerɛ, ɛnnya mfifiriiɛ yi merema moate.

¹⁰Monto dwom foforɔ mma AWURADE, momfiri asase ano nto n’ayeyie dwom; mo a mokɔ ɛpo ne deɛ ɛwɔ mu nyinaa aseɛ, nsuo ano aman ne wɔn a wɔtete soɔ.

¹¹Anwia pradada so ne ɛso nkuro mma wɔn nne so, nkurowa a Kedar te soɔ no; ma wɔn a wɔte Sela nto ahurisie dwom, wɔmfiri mmepɔ atifi mmɔ ahosɛpɛ se.

¹²Ma wɔnhyɛ AWURADE animuonyam, na wɔnka n’ayeyie nsuo ano aman mu.

¹³AWURADE bɛfiri adi sɛ dɔmmarima, ɔbɛhwanyan n’abufuo mu sɛ ɔkofoni; ɔbɛhuro, ɔbɛbɔ ose; ɔbɛdi n’atamfo so mmaninsɛm.

¹⁴Mefiri muaa m’ano akyɛ, mayɛ komm, masianka me ho; afei mɛbom sɛ ɔwofoɔ a ɔrekyem; mɛhome foofoo, na magu ahome prɛko.

¹⁵Mɛma mmepɔ ne nkokoɔ atwintwam, na mama ɛso nhahan nyinaa adwinnwan; na madane nsubɔntene nsupɔ, na mawe ntadeɛ nyinaa.

¹⁶ Na mɛgya anifirafoɔ wɔ ɔkwan a wɔnnim mu so, mɛma wɔanante atempɔn a wɔnnim soɔ so. Mɛma sum ayɛ hann wɔ wɔn anim, na deɛ ɛyɛ mmonkyimmɔnka no, mɛyɛ no tamaa. Adeɛ yei na mɛyɛ mama wɔn, na merennya wɔn.

¹⁷ Na wɔn a wɔde wɔn ho ato abosom soɔ no, wɔbɛsane wɔn akyi, na wɔn ani bɛwu; wɔn a wɔka kyerɛ eguo ahoni sɛ: Mone yɛn anyame no.

¹⁸ Asotifoɔ, montie! na anifirafoɔ, monhwɛ na monhunu!

¹⁹ Hwan ani na afira sɛ m’akoa, hwan na n’aso asie sɛ me bɔfoɔ a mesoma no no? Hwan ani na afira sɛ deɛ ɔwɔ m’asomdwoeɛ apam mu, hwan na n’ani afira sɛ AWURADE akoa no?

²⁰ Wahunu nnoɔma pii, nso ɔnhwɛ, wɔabue n’aso, nso ɔnte asɛm.

²¹AWURADE ani sɔɔ ne tenenee nti, sɛ ɔbɛma mmara no ayɛ kɛseɛ na anya animuonyam.

²²Nanso wɔyɛ ɔman a wɔatwa wɔn dwo, afom wɔn afa. Wɔama wɔakɔka ntokuro mu, wɔde wɔn ahunta nneduadan mu. Wɔatwa wɔn dwo a ɔgyefoɔ nni hɔ, wɔafom wɔn afa a deɛ ɔbɛka sɛ: Dane ma! nni hɔ.

²³Mo mu hwan na ɔbɛyɛ yei ho aso, na wawɛn n’aso atie akyire yi?

²⁴Hwan na ɔde Yakob maa adwotwa, na ɔde Israel maa afomfafoɔ? Ɛnyɛ AWURADE a yɛayɛ no bɔne no, na wɔampɛ sɛ wɔnante n’akwan mu, na wɔantie ne mmara no?

²⁵Enti na ɔhwiee n’abufuhyeɛ ne akodie a ano yɛ den no guu ne soɔ, na ɔsɔɔ ne ho gya hyiaeɛ, nanso wanhunu, na ɛhyee no, nanso wamfa ansie n’akomam.