Read New Revised Asante Twi Bible Yesaia 43 Bible Online

Yesaia 43 - New Revised Asante Twi Bible bible

Yesaia 43

¹Na afei, sɛdeɛ AWURADE a ɔbɔɔ woɔ, Yakob, na ɔnwonoo woɔ, O Israel, no ka nie: Nsuro, na magye wo, mabɔ wo din mafrɛ wo, woyɛ me dea.

² Sɛ woretwa nsuo a, me ne wo na ɛwɔ hɔ, na sɛ worefa nsubɔntene mu a, ɛremfa wo nkɔ. Sɛ wonam ogya mu a, ɛrenhye wo, na ogyaframa renhye wo.

³ Na me, AWURADE, mene wo Nyankopɔn, Israel Kronkronni, wo gyefoɔ no. Mede Misraim ayɛ agyedeɛ ama wo, mede Etiopia ne Saba asi wo ananmu.

⁴Sɛ wosom boɔ m’ani so, w’anim aba nyam, na me na madɔ woɔ nti, mede nnipa bɛma asi wo ananmu, na mede aman bi asi wo kra ananmu.

⁵ Nsuro, na me na me ne wo wɔ hɔ. Mede w’asefoɔ bɛfiri apueeɛ aba, na mafiri atɔeɛ maboa wo ano;

⁶mɛka makyerɛ atifi fam sɛ: Fa ma! Na maka makyerɛ anafoɔ fam sɛ: Mfa nkora! Fa me mmabanin firi akyirikyiri bra, ne me mmammaa firi asase ano,

⁷ obiara a wɔbɔ me din frɛ no, na mebɔɔ no memaa m’animuonyam, menwonoo no na meyɛɛ no no.

⁸ Fa ɔman a wɔyɛ anifirafoɔ nanso wɔwɔ ani no firi bra, ɛne asotifoɔ a wɔwɔ aso no.

⁹ Amanaman nyinaa, monhyia faako, na aman ahodoɔ mmoa ano. Mo mu hwan na ɔbɛka yei, na akane nnoɔma no, wakyerɛ yɛn? Wɔmma wɔn adansefoɔ mmra, na wɔnni bem; anaa wɔnte, na wɔnka sɛ: Ɛyɛ nokorɛ!

¹⁰ Mone m’adansefoɔ, AWURADE na ɔseɛ, ne m’akoa a mayi no no, sɛ monhunu na monnye me nni, na monhunu mu sɛ me ara mene no. Wɔnnwonoo onyame bi m’anim, na m’akyiri nso obiara remma.

¹¹ Me, mene AWURADE, na ɔgyefoɔ biara nni hɔ sɛ me!

¹² Me na maka, na magye nkwa, na mama wɔate, ɛberɛ a na onyame foforɔ bi nni mo mu; na mone m’adansefoɔ, AWURADE na ɔseɛ.

¹³Mene Onyankopɔn, na ɛfiri nnɛ nso Mene No, na obiara nni hɔ a ɔyi firi me nsam; mɛyɛ adeɛ, na hwan na ɔbɛdane ani?

¹⁴Sɛ AWURADE, mo Gyefoɔ, Israel Kronkronni no seɛ nie: Mo nti mɛsoma akɔ Babel, na mabubu adaban nyinaa, na mama Kaldeafoɔ ahurisidie adane adwotwa.

¹⁵Me, AWURADE, mene mo Kronkronni, Israel bɔfoɔ, mo hene no.

¹⁶ Saa na AWURADE seɛ, deɛ ɔma ɛpo mu da ɔkwan na ɛsa da asuo a ɛyɛ den mu no,

¹⁷deɛ ɔmaa nteaseɛnam ne apɔnkɔ, ɛdɔm ne nnɔmmarima firii adie no; wɔn nyinaa dedae, na wɔansɔre bio, wɔsae, wɔdunnumii sɛ asaawa.

¹⁸Monnkae akane nsɛm, na monnnwene atetedeɛ ho.

¹⁹ Hwɛ, mereyɛ ade foforɔ bi, afei na ɛrefifire, monhunu? Mɛbɔ ɛserɛ so kwan, mɛma nsubɔntene aba anwea pradada so.

²⁰Wiram mmoadoma bɛhyɛ me animuonyam, ɛserɛ so nkraman ne nsohori, sɛ mama nsuo aba ɛserɛ soɔ na nsubɔntene aba anwea pradada soɔ, na mede mama me man a mayi wɔn no anom,

²¹ ɔman a manwono wɔn mafa no, na wɔaka m’ayeyie akyerɛ.

²²Nanso ɛnyɛ me na wofrɛɛ me, O Yakob, na me ho ayɛ wo mfone, O Israel!

²³ Woammrɛ me wo hyeɛ afɔdeɛ nnwan, na woamfa w’afɔdeɛ anhyɛ me animuonyam; mamma woamfa aduane afɔdeɛ ansom me, na mamma woammrɛ ohwamfufuo ho;

²⁴woamfa sika antɔ ahwedeɛ amma me, na woamma w’afɔdeɛ sradeɛ ammee me, na mmom wode wo bɔne yɛɛ me adesoa, na wode w’amumuyɛ maa mebrɛe.

²⁵ Me, me ara, mene deɛ ɔpepa wo mmarato, me ara me nti, na wo bɔne nso, merenkaeɛ.

²⁶ Kae me ɛ, na yɛmmɛbu atɛn; ka wo deɛ, na woadi bem.

²⁷ W’agya a ɔdi kan no ayɛ bɔne, na wo kasamafoɔ afomfom me,

²⁸enti na mahura kronkronbea hɔ mmapɔmma no ho, na mayi Yakob mama mmusuo, na mede Israel mama adapaabɔfoɔ.