Read New Revised Asante Twi Bible Yesaia 48 Bible Online

Yesaia 48 - New Revised Asante Twi Bible bible

Yesaia 48

¹ Montie yei, O Yakob fie, mo a wɔde Israel din ato mo na mofiri Yuda asene mu no, mo a mode AWURADE din ka ntam na mobɔ Israel Nyankopɔn din, na ɛnyɛ nokorɛ anaa tenenee mu no.

²Na wɔde kuro kronkron no frɛ wɔn ho, na wɔtwere Israel Nyankopɔn a asafo AWURADE ne ne din no.

³Akane nnoɔma no, mefiri mekaeɛ ɛnyɛ nnɛ, na ɛfirii m’anomu, na mama wɔate; mpofirim na meyɛeɛ, na ɛbae.

⁴ Ɛfiri sɛ menim sɛ woyɛ asoɔden, na wo kɔn yɛ daban, na wo moma yɛ yaawa;

⁵enti na meka mekyerɛɛ woɔ akyɛ; ɛnnya mmaeɛ no, memaa wotee, na woanka sɛ: M’adwinhoni na ɔyɛeɛ, me honi a wɔasene ne me guo honi na wɔhyɛeɛ.

⁶Woate; hwɛ yei nyinaa; na wo nso worenka nkyerɛ? Merema woate nsɛm foforɔ afiri sɛsɛɛ, ne deɛ wɔakora a wonhunuiɛ no;

⁷afei na wɔabɔ, na ɛmfiri tete, na wontee da gye nnɛ, na woanka sɛ: Hwɛ, menim dada.

⁸Wontee pɛn, nso wonhunui, ɛfiri tete na w’aso mmueeɛ; na menim sɛ nkontompo ara na wotwa, na wɔfrɛ wo mmaratofoɔ firi yafunu mu.

⁹Me din nti na metwentwɛn m’abufuo aseɛ, na m’ayeyie nti medwoo m’ani memaa wo, na manku wo.

¹⁰ Hwɛ, manane wo, nso ɛnte sɛ dwetɛ; masɔ wo mahwɛ wɔ amaneɛ fononoo mu.

¹¹ Me nti, me nti na meyɛ; ɛfiri sɛ wɔngu me din ho fi sɛn? Meremfa m’animuonyam memma obi.

¹² Tie me, O Yakob, ne Israel a mafrɛ woɔ, mene ɔno ara, mene odikanfoɔ, na me ara nso ne okyidifoɔ.

¹³Nso me nsa na ɛhyɛɛ asase aseɛ, na me nsa nifa de ɔsoro trɛɛ hɔ; sɛ mefrɛ wɔn a, wɔn nyinaa bɛgyinagyina hɔ.

¹⁴ Mo nyinaa mommoaboa mo ano ntie: Wɔn mu hwan na ɔkaa yeinom? Deɛ AWURADE dɔ no no bɛyɛ n’anisɔdeɛ wɔ Babel ho, na ne basa atia Kaldeafoɔ.

¹⁵Me, me na maka, nso mafrɛ no. Mama no aba, na ne kwan yɛ no siadeɛ kwan.

¹⁶ Montwe mpini me, montie yei. Ɛnyɛ ahuntaeɛ mu na mefiri mfitiaseɛ mekasaeɛ; ɛfiri berɛ a ɛbaeɛ no, na mewɔ hɔ, na afei AWURADE Nyankopɔn asoma me ne ne honhom.

¹⁷Sɛ AWURADE, wo Gyefoɔ, Israel Kronkronni no seɛ nie: Mene AWURADE, wo Nyankopɔn, mene deɛ ɔkyerɛkyerɛ wo deɛ ɛyɛ ma woɔ, na ɔgya wo kɔ ɔkwan a fa soɔ no soɔ.

¹⁸ Sɛ wowɛn w’aso ma me mmara nsɛm ɛ, anka w’asomdwoeɛ bɛyɛ sɛ asubɔnten, na wo tenenee ayɛ sɛ ɛpo asorɔkyeɛ,

¹⁹na w’asefoɔ adɔre sɛ anwea, na w’asefoɔ ayɛ sɛ n’aboseaa. Wɔrentwa wɔn din ntwene, na wɔrensɛe no mfiri m’anim.

²⁰ Momfiri Babel, momfa ahurisidie nne nnwane mfiri Kaldeafoɔ mu. Monka, momma wɔnte yei, momma no mfiri nkɔduru asase ano. Monka sɛ: AWURADE agye n’akoa Yakob.

²¹ Ɔde wɔn nam anwea pradada soɔ no, sukɔm anne wɔn; ɔtuee nsuo firii ɔbotan mu maa wɔn, ɔpaee ɔbotan mu maa nsuo senee.

²² Asomdwoeɛ nni hɔ mma abɔnefoɔ, AWURADE na ɔseɛ.