Read New Revised Asante Twi Bible Lewitikɔs 13 Bible Online

Lewitikɔs 13 - New Revised Asante Twi Bible bible

Lewitikɔs 13

¹ Na AWURADE kasa kyerɛɛ Mose ne Aaron sɛ:

²Sɛ biribi ba onipa honam wedeɛ mu, sɛ nsoa oo, ntwintwameeɛ oo, ntampeɛ oo, na ɛdidi ne honam wedeɛ mu yɛ kwata ntotɔeɛ a, wɔmfa no mmrɛ Ɔsɔfoɔ Aaron anaa ne mma, asɔfoɔ no mu baako.

³ Na sɛ ɔsɔfoɔ no hwɛ honam wedeɛ mu ntotɔeɛ no, na ntotɔeɛ no so nwi adane fitaa, na ntotɔeɛ no atotɔ mu asene ne honam wedeɛ no a, ɛyɛ kwata ntotɔeɛ; na ɔsɔfoɔ no hwɛ no a, ɔmmu no deɛ ne ho nteɛ.

⁴Na sɛ ɛyɛ ne honam wedeɛ mu ntampeɛ fitaa, na sɛ wɔhwɛ na ɛntotɔ mu nsene ne wedeɛ no, na ɛso nwi nnanee fitaa a, ɛnneɛ, ɔsɔfoɔ no nto ɔyarefoɔ no mu nnanson.

⁵Na ɛda a ɛtɔ so nson no, ɔsɔfoɔ no nhwɛ, na sɛ ɔhunu sɛ ntotɔeɛ no te sɛdeɛ ɛteɛ n’ani so na ɛnyerɛɛ ne wedeɛ mu a, ɔsɔfoɔ no nto no mu nnanson bio.

⁶Na sɛ ɔsɔfoɔ no hwɛ no da a ɛtɔ so nson no bio na sɛ ntotɔeɛ no ani adum na ɛntrɛɛ ne wedeɛ mu a, ɔsɔfoɔ no mmu no sɛ deɛ ne ho teɛ, ɛyɛ ntwintwameeɛ; na ɔnsi n’atadeɛ na ne ho ate.

⁷Nanso ɔde ne ho akɔkyerɛ ɔsɔfoɔ wɔ n’ahoteɛ ho no akyiri no, sɛ ntwintwameeɛ no yerɛ ne wedeɛ mu a, wɔmma ɔsɔfoɔ no nhwɛ no bio;

⁸na sɛ ɔsɔfoɔ no hwɛ, na hwɛ, ntwintwameeɛ no ayerɛ wedeɛ no mu a, ɔsɔfoɔ no mmu no deɛ ne ho nteɛ; ɛyɛ kwata.

⁹Sɛ kwata ntotɔeɛ wɔ onipa bi ho a, wɔmfa no mmrɛ ɔsɔfoɔ no.

¹⁰Na sɛ ɔsɔfoɔ no hwɛ, na hwɛ, nsoa fitaa bi wɔ wedeɛ no mu a adane nwi no fitaa, na ɛnam mono repu nsoaeɛ no mu a,

¹¹ɛyɛ kwata dada a ɛwɔ ne honam wedeɛ mu, na ɔsɔfoɔ no mmu no sɛ ne ho nte. Ɔnnto no mu; na ne ho nte.

¹²Na sɛ kwata no apue afiri wedeɛ mu akata ɔyarefoɔ no honam nyinaa firi n’atifi kɔsi ne nan ase, baabiara a ɔsɔfoɔ no ani bɛhwɛ no,

¹³na ɔsɔfoɔ no hwɛ, na kwata no akata ne honam nyinaa so a, ɔmmu ɔyarefoɔ no sɛ ne ho te; ne ho nyinaa adane fitaa a, ne ho te.

¹⁴Nanso berɛ biara a wɔbɛhunu ne ho ɛnam mono no, ne ho nte.

¹⁵Na sɛ ɔsɔfoɔ no hwɛ ɛnam mono no a, ɔmmu no deɛ ne ho nteɛ; ɛnam mono no ho nte, ɛyɛ kwata.

¹⁶Na sɛ ɛnam mono no sane dane fitaa, na ɔba ɔsɔfoɔ no nkyɛn,

¹⁷na ɔsɔfoɔ no hwɛ, na sɛ ntotɔeɛ no adane fitaa a, ɛnneɛ, ɔsɔfoɔ no mmu no deɛ ne ho teɛ; ne ho ate.

¹⁸Sɛ mpɔmpɔ si obi honam wedeɛ mu na ɛsa,

¹⁹na soa fitaa bi anaa ntampeɛ fitaa a ɛbereɛ ba mpɔmpɔ no ananmu a, wɔmma ɔsɔfoɔ no nhwɛ.

²⁰Na sɛ ɔsɔfoɔ no hwɛ, na sɛ ɛhɔ atotɔ mu asene wedeɛ no na emu nwi adane fitaa a, ɔsɔfoɔ no mmu no deɛ ne ho nteɛ; ɛyɛ kwata ntotɔeɛ, apue wɔ mpɔmpɔ no mu.

²¹Na sɛ ɔsɔfoɔ no hwɛ na sɛ nwi fitaa bi nni mu, na ɛntotɔɔ mu nsenee wedeɛ no na ani dum a, ɔsɔfoɔ no nto no mu nnanson;

²²na sɛ ɛyerɛ wedeɛ no mu a, ɔsɔfoɔ no mmu no deɛ ne ho nteɛ: Ɛyɛ ntotɔeɛ.

²³ Na sɛ ntampeɛ no te sɛdeɛ ɛteɛ na ɛnyerɛe a, ɛyɛ mpɔmpɔ no twa, na ɔsɔfoɔ no mmu no deɛ ne ho teɛ.

²⁴Anaasɛ ogya kuro bi ba honam wedeɛ no mu, na ekuro no so bɔn repu yɛ ntampeɛ a ɛhoa fitaa na emu gyegyeɛ anaasɛ ɛhoa fitaa,

²⁵na sɛ ɔsɔfoɔ no hwɛ, na sɛ ntampeɛ no mu nwi adane fitaa na wɔhwɛ a atotɔ mu asene wedeɛ no a, ɛyɛ kwata, na apue ogya kuro no mu, na ɔsɔfoɔ no mmu no deɛ ne ho nteɛ: Ɛyɛ kwata ntotɔeɛ.

²⁶Na sɛ ɔsɔfoɔ no hwɛ, na sɛ enwi fitaa nni ntampeɛ no mu, na ɛntotɔɔ mu nsenee wedeɛ no, na ani dum a, ɔsɔfoɔ no nto no mu nnanson.

²⁷Na da a ɛtɔ so nson no, ɔsɔfoɔ no hunu sɛ ayerɛ wedeɛ no mu a, ɔsɔfoɔ no mmu no deɛ ne ho nteɛ: Ɛyɛ kwata ntotɔeɛ.

²⁸ Na sɛ ntampeɛ no te sɛdeɛ ɛteɛ na ɛnyerɛe wɔ wedeɛ no mu na ani dum a, ɛyɛ soa a ogya kuro no asoa, na ɔsɔfoɔ no mmu no deɛ ne ho teɛ; na ɛyɛ ogya kuro no bɔn.

²⁹Na ɔbarima anaa ɔbaa bi, sɛ biribi tɔ n’atifi anaa ne bɔgyesɛ mu,

³⁰na ɔsɔfoɔ no hwɛ ntotɔeɛ no, na sɛ atɔ mu asene wedeɛ no, na enwi kɔkɔɔ nhweanhweaa wɔ mu a, ɔsɔfoɔ no mmu no sɛdeɛ ne ho nteɛ; ɛyɛ ntutuiɛ, ɛyɛ etire anaa bɔgyesɛ mu kwata.

³¹Na ɔsɔfoɔ no hwɛ ntutuiɛ ntotɔeɛ no, na sɛ ɛhɔ ntɔɔ mu nsenee wedeɛ no, na enwi tuntum nso nni mu a, ɔsɔfoɔ no nto deɛ ntutuiɛ atotɔ no no mu nnanson.

³²Na sɛ ɔsɔfoɔ no hwɛ ɔyarefoɔ no da a ɛtɔ so nson no, na sɛ ntutuiɛ no nyerɛe na enwi kɔkɔɔ mmaa mu, na ntutuiɛ no ntɔɔ mu nsenee wedeɛ no a,

³³ɔnyi ne ho nwi, na ɔnnyi ntutuiɛ no so, na ɔsɔfoɔ no nto deɛ ntutuiɛ ayɛ no no mu nnanson bio.

³⁴Na sɛ ɔsɔfoɔ no hwɛ ntutuiɛ no da a ɛtɔ so nson no, na sɛ ntutuiɛ no nyerɛɛ wedeɛ no mu na ɛhɔ ntɔɔ mu nsenee wedeɛ no a, ɛnneɛ, ɔsɔfoɔ no mmu no deɛ ne ho teɛ; na ɔnsi ne ntadeɛ na ne ho ate.

³⁵Na sɛ ɛno akyi, ntutuiɛ no yerɛ,

³⁶na ɔsɔfoɔ no hwɛ no, na sɛ ntutuiɛ no ayerɛ wedeɛ no mu a, ɔsɔfoɔ no nnhwehwɛ enwi kɔkɔɔ; ne ho nte.

³⁷Na sɛ ɔhunu ntutuiɛ no sɛ ɛte sɛdeɛ ɛteɛ na enwi tuntum afu mu a, na ntutuiɛ no asa; ne ho te, na ɔsɔfoɔ no mmu no deɛ ne ho teɛ.

³⁸Na sɛ ntampeɛ fitaa ba ɔbarima anaa ɔbaa wedeɛ ani,

³⁹na ɔsɔfoɔ no hwɛ, na sɛ ntampeɛ a ani dum fitaa wɔ wɔn honam wedeɛ mu a, ɛyɛ ɛyam a ayerɛ wedeɛ mu; ne ho te.

⁴⁰Na sɛ ɔbarima bi tiri pa a, ɔyɛ atipa; ne ho te.

⁴¹Na sɛ n’apampam anim fam na apa a, ɔyɛ atipa; ne ho te.

⁴²Na sɛ biribi fitaa a ɛbereɛ tɔ n’atipa no mu anaasɛ n’apampam paeɛ no mu a, ɛyɛ kwata a ɛrepue n’atipa anaa n’apampam paeɛ no mu.

⁴³Na sɛ ɔsɔfoɔ no hwɛ, na sɛ ntotɔeɛ fitaa a ɛbereɛ asoa n’atipa no anaa n’apampam paeɛ no mu a ɛte sɛ honam wedeɛ mu kwata a,

⁴⁴ɔyɛ ɔkwatani; ne ho nte; buo na ɔsɔfoɔ no mmu no deɛ ne ho nteɛ; ne tiri so na ne ntotɔeɛ no wɔ.

⁴⁵Na ɔkwatani a yadeɛ no wɔ ne ho nsunsuane ne ntadeɛ mu, na ɔmpɛsɛ ne ti, na ɔnkata ne soro anofafa, na ɔnteam sɛ: Me ho nte, me ho nte!

⁴⁶ Nna dodoɔ a yadeɛ no wɔ ne ho no, teɛ na ne ho nteɛ; ɔno nko na ɔntena, nsraban no akyi na ɔntena.

⁴⁷Na sɛ kwata ntotɔeɛ wɔ atadeɛ bi mu, sɛ ɛwɔ kuntutam anaa asaawatam,

⁴⁸anaa nsa anaa mfa a wɔde nwono asaawatam anaa kuntutam anaa nwoma anaa adeɛ biara a wɔde nwoma ayɛ mu,

⁴⁹na sɛ ntotɔeɛ no biri anaasɛ ɛbere ntoma anaa nwoma no anaa nsa anaa mfa no anaa adeɛ biara a wɔde nwoma ayɛ mu a, ɛyɛ kwata ntotɔeɛ, wɔmma ɔsɔfoɔ no nhwɛ.

⁵⁰Na sɛ ɔsɔfoɔ no hwɛ ntotɔeɛ no a, ɔnto adeɛ a ntotɔeɛ no wɔ mu no mu nnanson.

⁵¹Na ɛda a ɛtɔ so nson no, ɔhunu sɛ ntotɔeɛ no ayerɛ atadeɛ no anaa nsa anaa mfa anaa nwoma no anaa biribiara a wɔde nwoma ayɛ no mu a, na ntotɔeɛ no yɛ kwata a ɛsɛe adeɛ; ɛho nte.

⁵²Na ɔnhye ntoma no, sɛ nsa no anaa mfa no oo, anaa kuntu anaa asaawa anaa nwoma adeɛ biara mu na ntotɔeɛ no wɔ oo, ɛfiri sɛ ɛyɛ kwata a ɛsɛe adeɛ. Ogya na wɔmfa nhyeɛ.

⁵³Na sɛ ɔsɔfoɔ no hwɛ, na sɛ ntotɔeɛ no nterɛɛ atadeɛ no mu wɔ nsa anaa mfa anaa nwoma adeɛ biara mu a,

⁵⁴ɛnneɛ, ɔsɔfoɔ no nhyɛ na wɔnsi adeɛ a ntotɔeɛ no wɔ mu no, na ɔnto mu nnanson bio.

⁵⁵Na ntotɔeɛ no sie akyiri no ɔsɔfoɔ no hwɛ, na sɛ ntotɔeɛ no ani nsakyerae na ɛnyerɛe nso a, ɛho nte, wɔmfa ogya nhye; ani akuku oo, akyire akuku oo, ɛyɛ nweweeɛ.

⁵⁶Na sɛ ne sie akyiri no ɔsɔfoɔ no hwɛ, na sɛ ntotɔeɛ no ani dum a, ɔnte mfiri ntoma no anaa nsa anaa mfa no mu.

⁵⁷Na sɛ wɔhunu bio wɔ ntoma no mu wɔ nsa anaa mfa anaa nwoma adeɛ biara mu a, ɛyɛ kwata a ɛrepue, wɔmfa ogya nhye deɛ ntotɔeɛ no wɔ mu no.

⁵⁸Na ntoma no, mfa anaa nsa anaa nwoma adeɛ biara a wɔbɛsie na ntotɔeɛ no bɛfiri mu no, wɔnsi bio na ɛho ate.

⁵⁹Yei ne mmara a ɛda hɔ ma kwata ntotɔeɛ, kuntutam anaa asaawatam anaa nsa anaa mfa anaa nwoma adeɛ biara mu, na wɔde abu no adeɛ a ɛho teɛ anaa adeɛ a ɛho nteɛ.