Read New Revised Asante Twi Bible Lewitikɔs 18 Bible Online

Lewitikɔs 18 - New Revised Asante Twi Bible bible

Lewitikɔs 18

¹Na AWURADE kasa kyerɛɛ Mose sɛ:

²Kasa kyerɛ Israelfoɔ na ka kyerɛ wɔn sɛ: Mene AWURADE mo Nyankopɔn.

³ Misraim asase a motenaa soɔ no so nneyɛɛ deɛ, monnyɛ. Na Kanaan asase a mede mo rekɔ soɔ no so nneyɛɛ nso, monnyɛ, na monnni wɔn ahyɛdeɛ so.

⁴M’atemmudeɛ na monyɛ, na monkora m’ahyɛdeɛ sɛ mobɛdi soɔ.

⁵ Mene AWURADE mo Nyankopɔn. Na monkora m’ahyɛdeɛ ne m’atemmudeɛ a onipa a ɔyɛ no bɛnya mu nkwa no. Mene AWURADE.

⁶Obiara nnkɔ ne bogya biara a ɔyɛ ne honam no ho nnkɔyi n’adagya so. Mene AWURADE.

⁷Nyi w’agya anaa wo na adagya so; wo na ne no, nyi n’adagya so.

⁸ Nyi w’agya yere adagya so; w’agya adagya ne no.

⁹ Wo nuabaa a ɔyɛ w’agya ba anaa wo na ba no, wɔwoo no efie oo, wɔwoo no baabi oo, nyi wɔn adagya so.

¹⁰Wo babanin babaa anaa wo babaa babaa, nyi wɔn adagya so, ɛfiri sɛ ɛyɛ w’adagya.

¹¹W’agya yere babaa a w’agya awo no no, ɔyɛ wo nuabaa, nyi n’adagya so.

¹²Nyi w’agya nuabaa adagya so; ɔyɛ w’agya honam.

¹³Nyi wo na nuabaa adagya so, ɛfiri sɛ ɔyɛ wo na honam.

¹⁴Nyi w’agya nuabarima adagya so nkɔ ne yere ho; wo na kumaa ne no.

¹⁵ Nyi w’ase adagya so; wo babarima yere ne no, nyi n’adagya so.

¹⁶ Nyi wo nua yere adagya so; ɛyɛ wo nua adagya.

¹⁷ Nyi ɔbaa bi ne ne ba adagya so; mfa ne babanin babaa anaa ne babaa babaa nyi wɔn adagya so; ne honam ne wɔn; ɛyɛ abusudeɛ.

¹⁸Na mfa ɔbaa ne ne nua nware sɛ wobɛma wɔatwe kora, sɛ ɔda so te aseɛ no, wobɛyi n’adagya so aka ne ho.

¹⁹ Na nkɔ ɔbaa a ne nsabuo mu ne ho nteeɛ no ho nkɔyi n’adagya so.

²⁰ Na wo ne wo yɔnko yere nnna, na mfa wo ho nsuo mma no mfa ngu wo ne no ho fi.

²¹ Na mfa w’asefoɔ mu bi mmɔ afɔdeɛ[3] mmma Molek, na ngu wo Nyankopɔn din ho fi; mene AWURADE.

²² Na wo ne ɔbarima nnna ɔbaa nna; ɛyɛ akyiwadeɛ.

²³ Wo ne aboa biara nnna mmfa nngu wo ho fi; na ɔbaa bi nnnyina aboa bi anim nnnane ne ho mmma no; ɛyɛ basabasayɛ.

²⁴Mommfa nnoɔma yi biara nngu mo ho fi, ɛfiri sɛ yeinom nyinaa na amanaman a merebɛtu wɔn afiri mo anim yi de agu wɔn ho fi,

²⁵na asase no so agu fi, enti na meretua ɛso amumuyɛ no so ka, na asase no afe ɛsotefoɔ no agu.

²⁶Na mo deɛ, monni m’ahyɛdeɛ ne m’atemmudeɛ so, na monnyɛ saa akyiwadeɛ yi mu biara, kuromani oo, ɔhɔhoɔ a wabɛsoɛ mo mu oo,

²⁷ɛfiri sɛ saa akyiwadeɛ yi nyinaa na asase no sofoɔ a wɔdi mo anim no ayɛ, na asase no so agu fi.

²⁸Na asase no amfe mo angu sɛ moagu ho fi, sɛdeɛ ɛfee amanaman a wɔdii mo anim no guiɛ no.

²⁹Na obiara a ɔbɛyɛ saa akyiwadeɛ yi mu biara no, wɔbɛtwa wɔn a wɔyɛ no afiri wɔn man mu atwene.

³⁰Enti monhwɛ m’ahwɛdeɛ, na moanyɛ ahyɛdeɛ a wɔkyire a wɔdii mo anim yɛeɛ no amfa angu mo ho fi: Mene AWURADE mo Nyankopɔn.