Read New Revised Asante Twi Bible Lewitikɔs 19 Bible Online

Lewitikɔs 19 - New Revised Asante Twi Bible bible

Lewitikɔs 19

¹Na AWURADE kasa kyerɛɛ Mose sɛ:

² Kasa kyerɛ Israelfoɔ asafo no nyinaa na ka kyerɛ wɔn sɛ: Monyɛ kronkron, ɛfiri sɛ me, AWURADE mo Nyankopɔn, meyɛ kronkron.

³ Mo mu biara mmu ne na ne n’agya, na monni me home nna no: Mene AWURADE mo Nyankopɔn.

⁴ Monnnane mo ho nnkɔ abosonhuhuo no nkyɛn, na monnyɛ ahoni a wɔaguo te sɛ anyame mmfa: Mene AWURADE mo Nyankopɔn.

⁵ Na sɛ mobɔ asomdwoeɛ afɔdeɛ ma AWURADE a, mommɔ no sɛdeɛ ɛbɛma moasɔ ani:

⁶ Da a mokum no ara na wɔnnie, ne n’adekyeeɛ, na deɛ ɛbɛka akɔduru nnansa no, wɔmfa ogya nhye.

⁷Na sɛ wɔdi no da a ɛtɔ so mmiɛnsa no a, ɛyɛ akyiwadeɛ, ɛnsɔ ani;

⁸na deɛ ɔdie no bɛsoa ne mmusuo, ɛfiri sɛ AWURADE akronkronneɛ na wagu ho fi, na wɔbɛtwa saa ɔkra no afiri ne man mu atwene.

⁹ Na sɛ motwa mo asase so nnɔbaeɛ a, nwie wo nkwanseɛ deɛ no twa, na nni w’afuomdeɛ no mu mpɛpɛ;

¹⁰na wo bobe turo nso, nni mu mpɛpɛ, na wo turo mu aba a ɛgugu fam no, ntase; gya ma ohiani ne ɔhɔhoɔ: Mene AWURADE mo Nyankopɔn.

¹¹ Mommmɔ korɔno, na monnni kusum, na obiara nntwa ne yɔnko nkontompo.

¹² Na monnka me din ho ntam atorɔ mu, na woanhura wo Nyankopɔn din ho: Mene AWURADE.

¹³ Nni wo yɔnko amim na ntwa no dwo. Mma wo paani akatua nnka wo nkyɛn mma adeɛ nnkye.

¹⁴ Nnome ɔsotifoɔ na mfa suntidua nto onifirani anim, na suro Onyankopɔn: Mene AWURADE.

¹⁵ Monntwa atemmuo mu nkontompo. Nhwɛ mmɔborɔni anim, na nyɛ deɛ ɛbɛsɔ otumfoɔ ani; tenenee mu na bu wo yɔnko atɛn.

¹⁶Nkyini wo nkurɔfoɔ mu nni nsekuro; nsɔre ntia wo yɔnko mogya. Mene AWURADE.

¹⁷ Ntane wo nua w’akoma mu; ka na ka wo yɔnko anim, na woansoa ne ho bɔne.

¹⁸ Ntɔ were na nnya wo nkurɔfoɔ mu biara ho menasepɔ, na dɔ wo yɔnko sɛ wo ho: Mene AWURADE.

¹⁹ Monni m’ahyɛdeɛ so. Mma w’afieboa nnni afrafra mmforo wɔn ho; w’afuo nso, mfa adeɛ mfrafra nnua mu, na mma ntoma ahodoɔ mmienu nsasaawa nnka wo ho.

²⁰Sɛ ɔbarima bi ne ɔbaa da na ɔde ne ho ka no, na ɔbaa no yɛ afenaa a wɔde no ama obi awareɛ, na gyeɛ na wɔnnya nnyee no anaasɛ wɔnnya mfaa ne ho nkyɛɛ no a, wɔmpeepee mu ntwe wɔn aso, na wɔnnku wɔn, ɛfiri sɛ ɔnne ne ho.

²¹Na ɔbarima no mfa n’asodie ho afɔdeɛ mmrɛ AWURADE, ahyiaeɛ ntomadan no ano, asodie ho afɔdeɛ dwennini na ɔmfa mmra.

²² Na ɔsɔfoɔ no mfa asodie ho afɔdeɛ dwennini no mpata mma no, AWURADE anim, bɔne a wayɛ no nti, na wɔde ne bɔne a wayɛ no akyɛ no.

²³Na sɛ moduru asase no so na motɛ dua biara a wɔdie a, mommu n’aba no sɛ momonotodeɛ; mfeɛ mmiɛnsa na ɛnyɛ mo momonotodeɛ, wɔnnni;

²⁴na afe a ɛtɔ so nnan no, ɛso aba nyinaa nyɛ kronkron mma AWURADE ayeyie;

²⁵na afe a ɛtɔ so nnum no, monni n’aba, na ne nnɔbaeɛ nkɔ so nnɔɔso mma mo: Mene AWURADE mo Nyankopɔn.

²⁶ Mommfa mogya nnka biribi ho nnni. Monnni adebisasɛm na monngoro abayigorɔ.

²⁷ Monnkonton mo nwi ano, na nsɛe wo bɔgyesɛ ano.

²⁸Mommotabota mo ho mmma awufoɔ, na monnkurukyire mo ho atwerɛ biara: Mene AWURADE.

²⁹Nhura wo babaa ho mma no mmmɔ adwaman, na asase no ammɔ adwaman, na mmusuo anyɛ asase no so ma.

³⁰Monni me home nna na monsuro me kronkronbea no: Mene AWURADE.

³¹ Monnnane mo ho nnkɔ ɔdebisafoɔ nkyɛn, na monnhwehwɛ adunsinfoɔ akyiri kwan mmfa nngu mo ho fi wɔ wɔn ho: Mene AWURADE mo Nyankopɔn.

³²Fa obuo ma ɔpanin, aane di akɔkoraa ni, na suro wo Nyankopɔn: Mene AWURADE.

³³ Na sɛ ɔhɔhoɔ bi bɛsoɛ mo asase so a, monnhyɛ ne so.

³⁴Ɔhɔhoɔ a wabɛtena mo mu nyɛ mo sɛ mo kuromani bi, na dɔ no sɛ wo ho, ɛfiri sɛ moyɛɛ Misraim asase so ahɔhoɔ: Mene AWURADE mo Nyankopɔn.

³⁵ Monntwa atemmuo mu nkontompo, adesusuo, adekarie ne adehyɛ mu;

³⁶nsania tee, abrammoɔ tee, efa tee ne susutoa tee na monkura: Mene AWURADE mo Nyankopɔn a meyii mo firii Misraim asase soɔ no.

³⁷ Na monni m’ahyɛdeɛ nyinaa ne m’atemmudeɛ nyinaa so nyɛ: Mene AWURADE.