Read New Revised Asante Twi Bible Lewitikɔs 23 Bible Online

Lewitikɔs 23 - New Revised Asante Twi Bible bible

Lewitikɔs 23

¹Na AWURADE kasa kyerɛɛ Mose sɛ:

²Kasa kyerɛ Israelfoɔ na ka kyerɛ wɔn sɛ: AWURADE afahyɛ ahodoɔ a mompae sɛ ɛnyɛ nhyia kronkron, m’afahyɛ nna no nie.

³ Nnansia na wɔnyɛ adwuma, na da a ɛtɔ so nson no yɛ home mu homeda, wɔnhyia nhyia kronkron; monnyɛ adwuma biara, ɛyɛ AWURADE homeda mo tenabea nyinaa mu.

⁴ Yeinom ne AWURADE afahyɛ, nhyia kronkron a mompae ne mmerɛ mu no:

⁵ Bosome a ɛdi kan no da a ɛtɔ so dunan no anwummerɛ yɛ AWURADE twam;

⁶na bosome no ara da a ɛtɔ so dunum no yɛ AWURADE apiti afahyɛ, nnanson na monni apiti.

⁷Da a ɛdi kan no monhyia nhyia kronkron; monnyɛ adwumaden biara.

⁸Na momfa ogya afɔdeɛ mmrɛ AWURADE nnanson; da a ɛtɔ so nson no monhyia nhyia kronkron; monnyɛ adwumaden biara.

⁹Na AWURADE kasa kyerɛɛ Mose sɛ:

¹⁰Kasa kyerɛ Israelfoɔ na ka kyerɛ wɔn sɛ: Sɛ moduru asase a mede merema mo no so na motwa ɛso nnɔbaeɛ a, momfa mo nnɔbaeɛ fi a ɛdi kan no mmrɛ ɔsɔfoɔ;

¹¹ na ɔnhim efi no AWURADE anim, na ɛnsɔ ani mma mo; homeda no, adeɛ kye a, na ɔsɔfoɔ no nhim.

¹²Na ɛda a mohim efi no, momfa odwanten ba a ɔdi mu a wadi afe mmɔ ɔhyeɛ afɔdeɛ mma AWURADE,

¹³ne ɛho aduane afɔdeɛ, esiam abupɛn du mu mmienu a wɔde ngo afɔre, na ɛnyɛ AWURADE ogya afɔdeɛ a ɛyi hwa hwanhwam ne ɛho ahwiesa, bobesa susutoa abupɛn nnan mu baako.

¹⁴Na monnni paanoo anaa ayuo a wɔato anaasɛ wɔasie kɔsi da no ara a mode mo Nyankopɔn ayɛyɛdeɛ reba no. Ɛnyɛ daa ahyɛdeɛ mma mo awoɔ ntoatoasoɔ, mo tenabea nyinaa mu.

¹⁵ Na monkan nna mfa mfiri homeda no akyiri da, da a mode ohim fi no ba no ɛnyɛ nnawɔtwe nson pɛpɛɛpɛ.

¹⁶Monkan adaduonum nkɔsi homeda a ɛtɔ so nson no akyiri da so ansa na mode aduane afɔdeɛ foforɔ abrɛ AWURADE.

¹⁷Momfa ohim paanoo mmienu mfiri mo tenabea mmra; esiam abupɛn du mu mmienu mmɔreka na wɔmfa nto, na ɛnyɛ aduanekan mma AWURADE.

¹⁸Na momfa nnwanten mma nson a wɔdi mu a wɔadi afe afe ne nantwiburuwa baako ne adwennini mmienu nka paanoo no ho; wɔnyɛ AWURADE ɔhyeɛ afɔdeɛ ne ɛho aduane afɔdeɛ ne ahwiesa, ogya afɔdeɛ a ɛyi hwa hwanhwam ma AWURADE.

¹⁹Na momfa ɔpapo baako mmɔ bɔne ho afɔdeɛ ne nnwanten mma mmienu a wɔadi afe afe mmɔ asomdwoeɛ afɔdeɛ.

²⁰Na ɔsɔfoɔ no nhim wɔn ne aduanekan paanoo no ne nnwanten mma mmienu no na ɛnyɛ AWURADE anim ohim afɔdeɛ: Ɛnyɛ kronkron mma AWURADE na wɔmfa mma ɔsɔfoɔ no.

²¹Na monhyia da no ara; ɛnyɛ mo nhyia kronkron, monnyɛ adwuma den biara. Ɛnyɛ daa ahyɛdeɛ mo tenabea nyinaa mu, mo awoɔ ntoatoasoɔ nyinaa mu.

²² Na sɛ motwa mo asase so nnɔbaeɛ a, nwie w’afuo nkwanseɛ deɛ twa, na nni wo nnɔbaeɛ no mu mpɛpɛ: Gya ma ohiani ne ɔhɔhoɔ: Mene AWURADE mo Nyankopɔn.

²³Na AWURADE kasa kyerɛɛ Mose sɛ:

²⁴ Kasa kyerɛ Israelfoɔ sɛ: Bosome a ɛtɔ so nson no da a ɛdi kan nyɛ mo homeda, totorobɛntohyɛn nkaeɛ, nhyia kronkron;

²⁵monnyɛ adwumaden biara, na momfa ogya afɔdeɛ mmrɛ AWURADE.

²⁶Na AWURADE kasa kyerɛɛ Mose sɛ:

²⁷ Bosome a ɛtɔ so nson yi ara da a ɛtɔ so du ne mpata da; monhyia nhyia kronkron, na mommrɛ mo ho ase na momfa ogya afɔdeɛ mmrɛ AWURADE.

²⁸Na ɛda no monnyɛ adwuma biara, ɛfiri sɛ ɛyɛ mpata da a wɔpata ma mo, AWURADE mo Nyankopɔn anim.

²⁹Na obiara a ɔmmrɛ ne ho ase da no no, wɔbɛtwa no afiri ne man mu atwene.

³⁰Na onipa biara a ɔyɛ adwuma bi saa da no no, mɛsɛe saa onii ko no afiri ne man mu.

³¹Monnyɛ adwuma biara; ɛyɛ daa ahyɛdeɛ ma mo awoɔ ntoatoasoɔ, mo tenabea nyinaa mu.

³²Ɛyɛ home mu homeda ma mo, na mommrɛ mo ho ase bosome no da a ɛtɔ so nkron no anwummerɛ; monni mo homeda no mfiri anwummerɛ nkɔsi anwummerɛ.

³³Na AWURADE kasa kyerɛɛ Mose sɛ:

³⁴ Kasa kyerɛ Israelfoɔ sɛ: Bosome a ɛtɔ so nson yi da a ɛtɔ so dunum no yɛ asese afahyɛ nnanson ma AWURADE.

³⁵Da a ɛdi kan no yɛ nhyia kronkron; monnyɛ adwumaden biara.

³⁶ Nnanson na momfa ogya afɔdeɛ mmrɛ AWURADE; da a ɛtɔ so nwɔtwe no nyɛ mo nhyia kronkron, na momfa ogya afɔdeɛ mmrɛ AWURADE; ɛyɛ afahyɛ awieeɛ, monnyɛ adwumaden biara.

³⁷Yeinom ne AWURADE afahyɛ ahodoɔ a mompae sɛ wɔnhyia nhyia kronkron no, na wɔmfa ogya afɔdeɛ mmrɛ AWURADE, ɔhyeɛ afɔdeɛ ne aduane afɔdeɛ ne kum afɔdeɛ ne ahwiesa, ebiara wɔ ne da mu.

³⁸Ɛsono AWURADE home nna no, na ɛsono mo ayɛyɛdeɛ, na ɛsono mo aboadeɛ nyinaa, na ɛsono mo ayamyi adeɛ nyinaa a mode ma AWURADE no.

³⁹Nso bosome a ɛtɔ so nson no da a ɛtɔ so dunum a moreboa asase so nnɔbaeɛ ano no, monni AWURADE nnapɔnna nnanson: Da a ɛdi kan no yɛ homeda, na ɛda a ɛtɔ so nwɔtwe no yɛ homeda.

⁴⁰ Na ɛda a ɛdi kan no, momfa nnua afɛfɛ so adeɛ, ɛberɛ ne nnua kusuu mman ne nsunoa nnua, na mo ani nnye AWURADE mo Nyankopɔn anim nnanson.

⁴¹Na momfa nni nnapɔnna mma AWURADE, nnanson daa afe. Ɛyɛ daa ahyɛdeɛ ma mo awoɔ ntoatoasoɔ; bosome a ɛtɔ so nson no mu na monni nnapɔnna yi.

⁴²Asese mu na montena nnanson, Israel man mma nyinaa ntena asese mu,

⁴³na mo awoɔ ntoatoasoɔ ahunu sɛ meyii Israelfoɔ firii Misraim asase soɔ no, asese mu na memaa wɔtenaeɛ: Mene AWURADE mo Nyankopɔn.

⁴⁴Na Mose paee AWURADE afahyɛ no kyerɛɛ Israelfoɔ.