Read New Revised Asante Twi Bible Lewitikɔs 3 Bible Online

Lewitikɔs 3 - New Revised Asante Twi Bible bible

Lewitikɔs 3

¹Na sɛ obi ayɛyɛdeɛ yɛ asomdwoeɛ afɔdeɛ, na anantwie no bi na ɔde reba a, onini oo, ɔbedeɛ oo, deɛ ɔdi mu na ɔmfa no mmra AWURADE anim.

²Na ɔmfa ne nsa nto n’ayɛyɛdeɛ no atifi, na ɔnku no, ahyiaeɛ ntomadan no ano, na Aaron mma no, asɔfoɔ no, mfa mogya no mpete afɔrebukyia no so nhyia.

³Na ɔnyi asomdwoeɛ afɔdeɛ no bi mmra mmɛyɛ AWURADE gya afɔdeɛ; sradeɛ a ɛkata ayamdeɛ no soɔ no ne ayamdeɛ no ho sradeɛ nyinaa,

⁴ne sawa mmienu no ne sradeɛ a ɛwɔ ho, sisia mu no, ne mmerɛboɔ so ntentan no; ɔmfiri sawa ho nyi.

⁵Na Aaron mma no nhye no afɔrebukyia no so, mpae ɔhyeɛ afɔdeɛ a ɛgu ogya no so, na ɛnyɛ ogya afɔdeɛ a ɛyi hwa hwanhwam ma AWURADE.

⁶Na sɛ n’ayɛyɛdeɛ a ɔde rebɛbɔ asomdwoeɛ afɔdeɛ ama AWURADE no yɛ nnwan no bi a, onini oo, ɔbedeɛ oo, deɛ ɔdi mu na ɔmfa mmra.

⁷Sɛ n’ayɛyɛdeɛ yɛ adwammaa na ɔde reba a, ɔmfa mmra AWURADE anim;

⁸na ɔmfa ne nsa nto n’ayɛyɛdeɛ no atifi, na ɔnku no ahyiaeɛ ntomadan no ano, na Aaron mma no mfa ne mogya mpete afɔrebukyia no so nhyia.

⁹Na ɔnyi asomdwoeɛ afɔdeɛ no bi mmra mmɛbɔ ogya afɔdeɛ mma AWURADE; ne sradeɛ ne ne sradeɛ duapuo a ɔntwa no padua so pa ara ne sradeɛ a ɛkata ayamdeɛ soɔ ne ayamdeɛ ho sradeɛ nyinaa,

¹⁰ne sawa mmienu no ne sradeɛ a ɛwɔ ho, sisia mu no, ne mmerɛboɔ so ntentan no; ɔmfiri sawa ho nyi.

¹¹Na ɔsɔfoɔ no nhye no afɔrebukyia no so: Ɛyɛ aduane afɔdeɛ a wɔbɔ no gya so ma AWURADE.

¹²Na sɛ n’ayɛyɛdeɛ no yɛ abirekyie a, ɔmfa mmra AWURADE anim;

¹³na ɔmfa ne nsa nto n’atifi, na ɔnku no, ahyiaeɛ ntomadan no ano, na Aaron mma no mfa ne mogya mpete afɔrebukyia no so nhyia.

¹⁴Na ɔnyi bi mmra mmɛyɛ n’ayɛyɛdeɛ, AWURADE gya afɔdeɛ: Sradeɛ a ɛkata ayamdeɛ soɔ no ne ayamdeɛ ho sradeɛ nyinaa;

¹⁵ne sawa mmienu no, ne sradeɛ a ɛwɔ ho, sisia mu no, ne mmerɛboɔ so ntentan no; ɔmfiri sawa ho nyi.

¹⁶Na ɔsɔfoɔ no nhye no wɔ afɔrebukyia no so; ɛyɛ ogya afɔreduane a ɛyi hwa hwanhwam; sradeɛ no nyinaa yɛ AWURADE dea.

¹⁷ Ɛnyɛ daa ahyɛdeɛ mo awoɔ ntoatoasoɔ nyinaa mu ne mo tenabea nyinaa sɛ: Monnni sradeɛ anaa mogya biara.