Read New Revised Asante Twi Bible Yeremia 12 Bible Online

Yeremia 12 - New Revised Asante Twi Bible bible

Yeremia 12

¹ O AWURADE, sɛ me ne wo bɔ nkuro a, wodi bem ara; nanso me ne wo bɛkasa ara: Adɛn nti na abɔnefoɔ kwan si wɔn yie na nkɔnkɔnsafoɔ nyinaa nso ho dwo wɔn?

²Wotɛ wɔn, na wɔgye nhini; wɔnyinyini na wɔsoso aba nso; wobɛn wɔn ano, na wo ne wɔn akoma ntam twe.

³Nanso wo, AWURADE, wonim me; wohu me; na wosɔ m’akoma hwɛ, sɛdeɛ ɛteɛ wɔ wo fam. Tutu wɔn sɛ nnwan a wɔrekɔku wɔn, na hyira wɔn so sie ma okum da.

⁴ Ɛnkɔsi da bɛn na asase no nni abooboo, na afuom ahahan ntwintwam? Ɛsofoɔ bɔne no nti mmoa ne nnomaa awie sa, ɛfiri sɛ wɔka sɛ: Ɔrenhunu yɛn awieeɛ.

⁵Sɛ wo ne anammɔnfoɔ mpo tu mmirika na wɔma wobrɛ a, ɛnneɛ ɛbɛyɛ dɛn na wo ne apɔnkɔ bɛsi ammirikakane? Na sɛ asase a ɛso da hɔ no so mpo, wohwe ase a, ɛnneɛ wobɛyɛ dɛn Yordan kwaeɛ no mu?

⁶Na wo nuanom nso ne w’agya fie, wɔn mpo twa wo nkontompo, wɔn nso wɔteam denden di w’akyi; sɛ wɔka nnɔkɔnnɔkɔsɛm kyerɛ wo a, nnye wɔn nni.

⁷Magya me fie, mato m’agyapadeɛ agu; mede me kra dɔfoɔ mahyɛ n’atamfo nsa.

⁸M’agyapadeɛ adane me sɛ kwaeɛ mu gyata; wama ne nne so atia me, enti na makyiri no.

⁹M’agyapadeɛ adane me ɔkɔdeɛ a ɔda nso? Akɔdeɛ atwa ho ahyia? Monkɔ nkɔboaboa wiram mmoadoma nyinaa ano mmra, na wɔmmɛdidi.

¹⁰Mmoahwɛfoɔ pii asɛe me bobeturo atiatia me kyɛfa so, wɔadane me kyɛfa fɛfɛ no ayɛ no ɛserɛ pataa;

¹¹wɔasɛe no pasaa, ayɛ dwerɛbee di me ho abooboo; wɔasɛe asase no nyinaa, nso obiara nni hɔ a ɔde sie n’akoma mu.

¹²Asɛefoɔ aba anwea pradada so mpampa nyinaa so, na AWURADE afena retwitwa afiri asase ano akɔsi asase ano; asomdwoeɛ nni hɔ mma ɔhonam biara.

¹³ Wɔguu ayuo, na wɔtwaa nnwerɛ; wɔbrɛe, na wɔannya mu hwee. Na wɔn ani bɛwuwu mo nnɔbaeɛ ho, AWURADE abufuhyeɛ no nti.

¹⁴Sei na AWURADE ka no wɔn a wɔtete me ho no nyinaa ho: Nnipa bɔne a wɔde wɔn nsa aka agyapadeɛ a mede memaa me man Israel sɛ wɔnnie no, hwɛ, meretutu wɔn afiri wɔn asase so, na mɛtu Yuda fie afiri wɔn mu.

¹⁵Na ɛbɛba sɛ matu wɔn no akyiri no, mɛsane mahu wɔn mmɔbɔ, na mede wɔn nyinaa asane aba wɔn agyapadeɛ mu ne wɔn asase so mmaako mmaako.

¹⁶ Na sɛ wɔbɛsua me man akwan yie, aka me din ho ntam sɛ: Sɛ AWURADE te aseɛ yi; sɛdeɛ wɔkyerɛɛ me man sɛ wɔnka Baal ntam no a; ɛnneɛ wɔbɛyɛne wɔn wɔ me man mu.

¹⁷Na sɛ wɔantie a, ɛnneɛ mɛtu saa ɔman no agu, mɛtutu na masɛe wɔn, AWURADE asɛm nie.