Read New Revised Asante Twi Bible Yeremia 2 Bible Online

Yeremia 2 - New Revised Asante Twi Bible bible

Yeremia 2

¹Na AWURADE asɛm baa me nkyɛn sɛ:

²Kɔ na kɔpae gu Yerusalem aso mu sɛ: Sɛ AWURADE seɛ nie: Mekae wo mmabaaberɛ mu adɔeɛ, w’ayeforɔ berɛ mu dɔ no, m’akyiri a wodiiɛ wɔ ɛserɛ soɔ, asase a wɔnnua so adeɛ no so.

³Israel yɛɛ kronkron maa AWURADE, ɛyɛ ne nnɔbaeɛ mu aduanekan; wɔn a wɔdiiɛ nyinaa dii fɔ; mmusuo baa wɔn so, AWURADE asɛm nie.

⁴Montie AWURADE asɛm, O Yakob fiefoɔ ne Israel fie mmusua nyinaa.

⁵ Sɛ AWURADE seɛ nie: Bɔne bɛn na mo agyanom hunuu no me ho a enti wɔfirii me ho kɔɔ akyirikyiri na wɔkɔdii ahuhudeɛ akyi na wɔadanedane hunu yi?

⁶Na wɔanka sɛ: AWURADE a ɔyii yɛn firii Misraim asase soɔ, na ɔmaa yɛfaa serɛ soɔ, nkyɛkyerɛ ne amena asase soɔ, pɛsɛɛyɛ ne esum kabii asase soɔ, asase a obi mfa soɔ na onipa bi nte soɔ no wɔ hen?

⁷Na mede mo mebaa turo asase so, sɛ monni ɛso aba ne ɛso nnepa. Nanso mobaeɛ no, mobɛguu m’asase ho fi, na mode m’agyapadeɛ yɛɛ akyiwadeɛ.

⁸Asɔfoɔ no ammisa sɛ: Ɛhe na AWURADE wɔ? Na mmarakyerɛfoɔ no nnim me, na ahwɛfoɔ no afom me, na adiyifoɔ no nam Baal so hyɛɛ nkɔm, na wɔdii nnoɔma a ɛho nni mfasoɔ akyi.

⁹Enti me ne mo da so ham, AWURADE asɛm nie, na me ne mo mma mma bɛham.

¹⁰Na montwam nkɔ Kiprofoɔ nsupɔ so nkɔhwɛ, na monsoma nkɔ Kedar nkɔpeepee mu yie, na monhwɛ sɛ adeɛ a ɛte sei aba hɔ pɛn anaa?

¹¹ Ɔman bi asakyera n’anyame, anyame a wɔnyɛ anyame? Nanso me man de n’animuonyam asesa deɛ ɛho nni mfasoɔ.

¹²Momma yei nyɛ mo nwanwa, ɔsoro, ahodwirie ne nketenkete nkuta mo, AWURADE asɛm nie.

¹³ Na bɔne mmienu na me man ayɛ: Wɔagya me a meyɛ nkwa asutire no, sɛ wɔrekɔbɔre mmura a apaepae a ɛntumi nkura nsuo.

¹⁴Israel yɛ akoa? Ɔyɛ efienipa? Adɛn nti na wadane fomfa adeɛ yi?

¹⁵Gyataburuwa bobom na wɔpɔ so wɔ ne so; na wɔayɛ n’asase amamfo, wɔahyehye ne nkuro, na obi nte mu.

¹⁶ Memfis ne Tapanes mma nso asɛe w’ahenkyɛ.

¹⁷ Ɛnyɛ wo ara na wode yei baa wo soɔ, sɛ wogyaa AWURADE wo Nyankopɔn, berɛ a ɔde wo nam ɔkwan no soɔ no?

¹⁸Na afei ɛdeɛn na wobɛnya no Misraim korɔ mu, a enti worekɔ akɔnom Nil mu nsuo yi? Anaasɛ ɛdeɛn na wobɛnya no Asiria korɔ mu a enti worekɔ akɔnom Eufrate mu nsuo yi?

¹⁹Wo bɔne bɛtwe w’aso, na wo nsaneakyire atwi w’anim, na hunu na hwɛ sɛ gya a wogyaa AWURADE wo Nyankopɔn, ne me ho hu a wonnie no so aba ne awerɛhoɔ. AWURADE, asafo AWURADE asɛm nie.

²⁰ Na mefiri teteete na mebubuu wo kɔnnua tetee wo nkyehoma mu, na wokaa sɛ: Merensom! Ɛfiri sɛ nkokoɔ a ɛkorɔn nyinaa so ne nnua frɔmfrɔm nyinaa ase na woda bɔ adwaman.

²¹ Na me deɛ, metɛɛ wo sɛ bobe pa, wofiri deɛ ɛyɛ nko ara mu. Na ɛyɛɛ dɛn na woadane me amannɔne bobe nhoma yi?

²²Na mpo sɛ wode dɔw dware, na wofa samina ma no dɔɔso a, w’amumuyɛ yɛ m’anim nkekaeɛ ara, AWURADE NYANKOPƆN asɛm nie.

²³Ɛyɛ dɛn na woka sɛ: Me ho nguu fi, Baalim akyiri nso mennii? Hwɛ wo kwan bonhwa no mu, hunu deɛ woayɛ. Yomabereɛ a wagyigya, a ɔkontonkonton ne kwan,

²⁴wura mu afunumu a ɛserɛ so akokwa no a ne kra akɔnnɔ mu ɔsɔ mframa no, hwan na ɔbɛsianka no? Wɔn a wɔhwehwɛ no nyinaa remmrɛ, ne bosome mu na wɔbɛhu no.

²⁵Kata wo nan ho, na anna hɔ ne wo mene nso, na sukɔm anne wo. Na wo deɛ, wokaa sɛ: Ɔkwa! Dabi! Na madɔ ananafoɔ, na wɔn akyiri na mɛdie.

²⁶Sɛdeɛ wɔkyere owifoɔ a n’ani wuo no, saa na Israel fie ani bɛwuo, wɔn, wɔn ahemfo, wɔn asafohene ne wɔn asɔfoɔ ne wɔn adiyifoɔ

²⁷a wɔka kyerɛ dua sɛ: M’agya ne wo, ne ɔboɔ nso sɛ: Wo na wowoo me, no; ɛfiri sɛ wɔadanedane wɔn akyiri akyerɛ me, na ɛnyɛ wɔn anim; na wɔn amanehunu berɛ mu deɛ, wɔka sɛ: Sɔre na gye yɛn.

²⁸ Na ɛhe na w’anyame a woyɛ faeɛ no wɔ? Ma wɔnsɔre, sɛ wɔbɛtumi agye wo, w’amanehunu berɛ mu anaa? Na sɛdeɛ wo nkuro dodoɔ teɛ no, saa ara na w’anyame dodoɔ teɛ, O Yuda!

²⁹Ɛdeɛn nti na monwiinwii tia me? Mo nyinaa moayɛ me dɔm, AWURADE asɛm nie.

³⁰ Kwa ara kwa na mepiraa mo mma; wɔannye atenetene. Mo afena akunkum mo adiyifoɔ sɛ gyata a ɔsɛe adeɛ.

³¹Mo, nnɛɛmma, montie AWURADE asɛm. Madane ɛserɛ so ama Israel, anaasɛ asase a aduru sum kabii? Ɛdeɛn nti na me man ka sɛ: Yɛafa yɛn ho adi, yɛremma wo nkyɛn bio?

³²Ababaa werɛ bɛfiri n’ahyehyɛdeɛ, anaa ayeforɔ werɛ bɛfiri n’atadeɛ? Nanso me man deɛ, wɔn werɛ afiri me nna a wɔntumi nkan.

³³Hwɛ sɛdeɛ wosiesie wo kwan de pɛ adɔfoɔ! Ɛno nti nso mmaa bɔne mpo woakyerɛ wɔn w’akwan.

³⁴Nso w’atadeɛ mmuano mu na wɔhunu ahiafoɔ a wɔdi bem no mogya. Ɛwom sɛ woanhunu sɛ wɔrebubu adan kɔ mu, nanso yeinom nyinaa akyiri no

³⁵ woka sɛ: Medi bem. Ampa ara, n’abufuo adane afiri me so. Hwɛ, me ne wo bɛdi, sɛ woka sɛ: Menyɛɛ bɔne, no nti.

³⁶Hwɛ sɛdeɛ wonenam kwa danedane wo kwan! Misraim ho nso w’ani bɛwu, sɛdeɛ w’ani wuu Asiria ho no.

³⁷Ɛhɔ nso na wobɛfiri aba a wode wo nsa agu wo tire, ɛfiri sɛ AWURADE apa wɔn a wode wo ho to wɔn soɔ no, na worenni yie wɔn nkyɛn.