Read New Revised Asante Twi Bible Yeremia 36 Bible Online

Yeremia 36 - New Revised Asante Twi Bible bible

Yeremia 36

¹ Na Yudahene Yehoiakim a ɔyɛ Yosia ba afe a ɛtɔ so nnan mu, asɛm yi firii AWURADE nkyɛn baa Yeremia nkyɛn sɛ:

²Fa nwoma mmobɔeɛ bi kura, na twerɛ nsɛm a maka makyerɛ woɔ no nyinaa, Israel ne Yuda ne amanaman no nyinaa ho, firi da a mekasa mekyerɛɛ woɔ, firi Yosia berɛ so de bɛsi nnɛ da yi no hyɛ mu.

³ Ebia Yuda fie bɛtie bɔne a mabɔ me tirim sɛ mɛyɛ wɔn no nyinaa, na wɔasane afiri wɔn akwammɔne so, na mede wɔn amumuyɛ ne wɔn bɔne makyɛ wɔn.

⁴ Ɛnna Yeremia frɛɛ Neria ba Baruk, na Baruk twerɛɛ AWURADE nsɛm a ɔka kyerɛɛ Yeremia no nyinaa firii n’anomu de hyɛɛ nwoma mmobɔeɛ no mu.

⁵Na Yeremia hyɛɛ Baruk sɛ: Me deɛ, wɔato me mu, mentumi menkɔ AWURADE fie.

⁶Enti wo deɛ, kɔ na kɔkenkan AWURADE nsɛm a woatwerɛ afiri m’anomu no, mmobɔeɛ no mu, gu ɔman no aso mu, AWURADE fie, mmuada da no, na kenkan gu Yudafoɔ a wɔfiri wɔn nkuro so ba no nyinaa aso mu nso.

⁷ Ebia wɔn nkotosrɛ bɛduru AWURADE anim, na wɔasane afiri wɔn akwammɔne so, ɛfiri sɛ abufuo ne abufuhyeɛ asɛm a AWURADE aka no ɔman yi ho no so kokuroo.

⁸Na Neria ba Baruk yɛɛ sɛdeɛ Odiyifoɔ Yeremia hyɛɛ no no nyinaa, na ɔkenkan AWURADE nsɛm a ɛwɔ nwoma no mu wɔ AWURADE fie.

⁹Na Yudahene Yehoiakim a ɔyɛ Yosia ba afe a ɛtɔ so nnum, bosome a ɛtɔ so nkron no, Yerusalem mu nkurɔfoɔ nyinaa ne nkurɔfoɔ a wɔfiri Yuda nkuro mu baa Yerusalem no paee AWURADE anim mmuadadie.

¹⁰Ɛnna Baruk kenkann Yeremia nsɛm a ɛwɔ nwoma no mu no guu ɔman no nyinaa aso mu, AWURADE fie, Safan ba Ɔtwerɛfoɔ Gemaria pia a ɛwɔ atifi abannwa mu no mu, AWURADE fie ponkɛseɛ foforɔ no ano.

¹¹Na Safan ba Gemaria ba Mikaia tee AWURADE nsɛm a ɛwɔ nwoma no mu no nyinaa no,

¹²ɔsiane kɔɔ ahemfie kɔɔ ɔtwerɛfoɔ pia mu, na hwɛ, ɛhɔ na na mmapɔmma no nyinaa, Ɔtwerɛfoɔ Elisama ne Semaia ba Delaia ne Akbor ba Elnatan ne Safan ba Gemaria ne Hanania ba Sedekia ne mmapɔmma no nyinaa teteɛ.

¹³Na Mikaia kaa nsɛm a Baruk rekenkan nwoma no agu ɔman no aso mu no ɔteeɛ no nyinaa kyerɛɛ wɔn.

¹⁴Ɛnna mmapɔmma no nyinaa somaa Kusi ba Selemia ba Netania ba Yehudi kɔɔ Baruk nkyɛn sɛ: Mmobɔeɛ a wokenkan guu ɔman no aso mu no, fa kura wo nsam bra. Na Neria ba Baruk faa mmobɔeɛ no kuraa ne nsam de baa wɔn nkyɛn.

¹⁵Na wɔka kyerɛɛ no sɛ: Tena ase ɛ, na kenkan gu yɛn aso mu. Ɛnna Baruk kenkan guu wɔn aso mu.

¹⁶Na wɔtee nsɛm no nyinaa no, wɔde ahodwirie hwehwɛɛ wɔn anim, na wɔka kyerɛɛ Baruk sɛ: Yɛbɛka nsɛm yi nyinaa akyerɛ ɔhene.

¹⁷Na wɔbisaa Baruk sɛ: Ka kyerɛ yɛn, wotwerɛɛ nsɛm yi nyinaa firii n’anomu anaa?

¹⁸Na Baruk ka kyerɛɛ wɔn sɛ: Ɔde n’ano na ɛkaa nsɛm yi nyinaa kyerɛɛ me, na me nso mede adubire twerɛ hyɛɛ nwoma mu.

¹⁹Na mmapɔmma no ka kyerɛɛ Baruk sɛ: Kɔ na kɔhunta, wo ne Yeremia, na obiara anhunu deɛ mowɔ.

²⁰Na wɔkɔɔ ɔhene no nkyɛn abannwa no mu, na wɔde mmobɔeɛ no siee Ɔtwerɛfoɔ Elisama pia mu, na wɔkɔkaa nsɛm no nyinaa guu ɔhene aso mu.

²¹Na ɔhene somaa Yehudi sɛ ɔnkɔfa mmobɔeɛ no mmra; na ɔkɔfa firii Ɔtwerɛfoɔ Elisama pia no mu bae; na Yehudi kenkanee, ɔhene ne mmapɔmma a wɔgyinagyina ɔhene ho no nyinaa aso mu.

²²Na ɔhene te awɔberɛ dan mu, bosome a ɛtɔ so nkron no mu, na adeɛ mu gya a ɛredɛre no si n’anim.

²³Na ɛbaa sɛ, sɛ Yehudi kenkan nkrataa mmiɛnsa anaa nnan no, ɔde ɔtwerɛfoɔ sekan sunsuanee, na ɔde guu ogya a ɛwɔ adeɛ mu no mu kɔsii sɛ mmobɔeɛ no nyinaa hyeeɛ, ogya a ɛwɔ adeɛ mu no mu.

²⁴ Na wɔn akoma antu, na ɔhene ne ne nkoa a wɔtee nsɛm yi nyinaa no nyinaa ansunsuane wɔn ntadeɛ mu.

²⁵Nanso Elnatan ne Delaia ne Gemaria paa ɔhene kyɛw sɛ ɔnnhye mmobɔeɛ no, nanso wantie wɔn.

²⁶Na ɔhene no hyɛɛ Ɔheneba Yerahmeel ne Asriel ba Seraia ne Abdeel ba Selemia, sɛ wɔnkɔfa Ɔtwerɛfoɔ Baruk ne Odiyifoɔ Yeremia mmra; nanso AWURADE koraa wɔn so.

²⁷ Na ɔhene hyee mmobɔeɛ ne nsɛm a Baruk twerɛ firii Yeremia anomu no akyiri no, AWURADE asɛm baa Yeremia nkyɛn sɛ:

²⁸Sane fa mmobɔeɛ foforɔ, na twerɛ akane nsɛm a ɛwɔ kane mmobɔeɛ no mu a Yudahene Yehoiakim hyeeɛ no nyinaa hyɛ mu.

²⁹ Na Yudahene Yehoiakim ho na ka no sɛ: Sɛ AWURADE seɛ nie: Wo deɛ, woahye mmobɔeɛ yi aka sɛ: Adɛn nti na wotwerɛɛ emu sɛ: Babel hene bɛba abɛsɛe asase yi, na wahye ɛso nnipa ne mmoa ase?

³⁰ Ɛno nti, sɛ AWURADE ka no Yudahene Yehoiakim ho nie: Ɔrennya obiara a ɔbɛtena Dawid adwa soɔ, na ne funu nso, wɔbɛto atwene, na ahuhuro afa so awia, na awɔ afa so anadwo.

³¹Na ɔno ne n’asefoɔ ne ne nkoa amumuyɛ no nti, mɛba mabɛtua wɔn so ka, na wɔn ne Yerusalemfoɔ ne Yuda mmarima so na mede bɔne a meka tiaa wɔn na wɔantie no nyinaa bɛba.

³²Ɛnna Yeremia faa mmobɔeɛ foforɔ de maa Neria ba Ɔtwerɛfoɔ Baruk, na ɔtwerɛɛ nwoma a Yudahene Yehoiakim de ogya hyeeɛ no mu nsɛm no nyinaa firi Yeremia anomu hyɛɛ mu, na wɔde nsɛm pii a ɛte sɛ ɛno nso kaa ho.