Read New Revised Asante Twi Bible Yeremia 4 Bible Online

Yeremia 4 - New Revised Asante Twi Bible bible

Yeremia 4

¹O Israel, sɛ wosane w’akyiri a, AWURADE asɛm nie, me nkyɛn na sane bra. Na sɛ woyi w’akyiwadeɛ firi m’anim a, worenhinhim,

² na sɛ woka ntam sɛ: AWURADE teasefoɔ nokorɛ mu, atemmuo ne tenenee mu a, amanaman ahyirahyira wɔn ho wɔ ne mu, na ɔno mu wɔahyehyɛ wɔn ho.

³ Na sɛdeɛ AWURADE ka kyerɛ Yudafoɔ ne Yerusalemfoɔ nie: Monnɔ asase foforɔ mfa, na monngu nwerɛ wɔ mu.

⁴ Montwitwa mo ho twetia mma AWURADE, na monyi mo akoma momonoto, Yuda mmarima ne Yerusalemfoɔ, anyɛ saa a, m’abufuo bɛfiri sɛ ogya abɛhye a obiara nni hɔ a ɔbɛdum no, mo nneyɛɛ mu bɔne ntira.

⁵Monka wɔ Yuda, momma wɔnte wɔ Yerusalem, mommɔ din, monhyɛne totorobɛnto asase no so, monteam mma no nyɛ den, na monka sɛ: Mommoaboa mo ano mma yɛnkɔ nkuro a ɛyɛ den mu.

⁶ Monsi frankaa nkyerɛ Sion fam, mommɔ mo ho adwaa, monnnyina hɔ, na adebɔne na merema no afiri atifi fam aba ne ɔsɛeɛ kɛseɛ.

⁷Gyata bi afiri ne dɔtɔ mu reba, na amanaman sɛefoɔ afiri adi; watu afiri ne tenabea reba, sɛ ɔrebɛyɛ w’asase no amamfo, na wo nkuro abobɔ a obi nte mu bio.

⁸Yei nti momfira ayitoma, montwa agyaadwo na mommɔ bena denden, ɛfiri sɛ AWURADE abufuhyeɛ no nnane mfirii yɛn so!

⁹Na ɛbɛba sɛ da no, AWURADE asɛm nie, ɔhene ne asafohene akoma bɛtu, na asɔfoɔ no ho adwiri wɔn, na adiyifoɔ ani so ayɛ wɔn yaa.

¹⁰ Na mese: Ao, AWURADE Nyankopɔn, ampa ara woadi ɔman yi ne Yerusalem hwammɔ sɛ woka sɛ: Asomdwoeɛ bɛba ama mo, nanso afena da mene mu!

¹¹Ɛberɛ no mu na wɔbɛka akyerɛ ɔman yi ne Yerusalem sɛ: Mframa a emu yɛ hyeɛ bɛfiri anwea pradada so mpampa so afa me man ababaa kwan so aba, ɛnyɛ deɛ ɛbɛpo soɔ anaa deɛ ɛbɛhu soɔ,

¹²mframa a emu yɛ den sene saa firi hɔnom ara bɛba ama me. Afei me na meka atemmusɛm gu wɔn soɔ.

¹³Hwɛ! Ɔreforo aba sɛ mununkum, na ne nteaseɛnam te sɛ mframa a ɛdi kyinhyia; n’apɔnkɔ ho yɛ hare sene akɔdeɛ. Yɛnnue! Na yɛawie sɛe!

¹⁴ Hohoro w’akoma ho firi bɔne mu, O Yerusalem, na wɔagye wo. Da bɛn na w’abusudwene ntena wo mu nkɔsie?

¹⁵Na obi nne team firi Dan, na ɔma wɔte mmusuo nka firi Efraim bepɔ so.

¹⁶Mommɔ amanaman no kɔkɔ sɛ ɔreba; momma wɔnte wɔ Yerusalem. Atɛfoɔ firi akyirikyiri asase so reba, na wɔrebɛma wɔn nne so Yuda nkuro so.

¹⁷ Wɔasɔre atia no atwa ne ho ahyia sɛ mfuo awɛmfoɔ, ɛfiri sɛ wate me so atua, AWURADE asɛm nie.

¹⁸Wo kwan ne wo nneyɛɛ na ama yeinom aba wo soɔ, yei ne w’atemmuo na ɛyɛ nwono na ɛduru w’akoma mu pɛɛ.

¹⁹ Me yam hyehye me, me yam hyehye me! Merebrɛ yea mu! O m’akoma afasuo mu! M’akoma pere me, mentumi memmua m’ano. Ɛfiri sɛ mete totorobɛntohyɛn, ɔko mu sebɔ.

²⁰Abuo bɔ abuo so, asase no nyinaa asɛe. Mpofirim na me ntomadan asɛe, me ntwamutam asɛe amonom.

²¹Ɛnkɔsi da bɛn na menhunu frankaa na mente totorobɛntohyɛn?

²²Ɛfiri sɛ me man agyimi. Wɔnnim me, wɔyɛ mma nkwaseafoɔ, na wɔnni nhunumu. Wɔyɛ bɔne ho anyansafoɔ, na papayɛ deɛ, wɔnnim.

²³Mehwɛɛ asase, na hwɛ, na ɛyɛ sakasaka ne amamfo. Na mehwɛɛ ɔsoro, na ne hann nni hɔ.

²⁴Mehwɛɛ mmepɔ, na hwɛ, na ɛrewoso, na nkokoɔ nyinaa rehinhim.

²⁵Mehwɛe, na hwɛ, na onipa biara nni hɔ, na ewiem nnomaa nyinaa atutu kɔ.

²⁶Mehwɛe, na hwɛ, na mfuo adanedane anwea pradada, na ɛso nkuro nyinaa abubu, AWURADE anim, n’abufuo a emu yɛ hyeɛ no anim.

²⁷ Na sɛ AWURADE seɛ nie: Asase no nyinaa bɛdane amamfo, nso wie deɛ, merenwie no sɛe.

²⁸Ɛno nti na asase di abooboo na ɔsoro biri tumm wɔ soɔ, ɛfiri sɛ maka, mabɔ me tirim, na merennu me ho, na merensane memfiri ho.

²⁹Apɔnkɔfoɔ ne agyantofoɔ kitikitiyɛ nti kuro no nyinaa dwane. Wɔhyɛnehyɛne adɔtɔ mu, na wɔforo abotan. Nkuro nyinaa adeda mpan, na obiara nte mu bio.

³⁰Na wo nso, wo a wɔasɛe woɔ yi, worekyerɛ sɛn ni na wofira tam kɔkɔɔ, na wode sika ahyehyɛdeɛ hyehyɛ wo ho, na wode adubire keka w’ani yi? Ɔkwa ara kwa na wohyehyɛ wo ho fɛfɛɛfɛ. Adɔfo apo wo, wɔrepɛ wo aku wo.

³¹Na metee nne a ɛte sɛ ɔbaa a ɔreko awoɔ deɛ, ahohiahia a ɛte sɛ ɔbaa a ɔrebone awoɔ deɛ, Sion babaa nne, ɔsi apini, ɔtrɛ ne nsam sɛ: Mennue! Na me kra atɔ awudifoɔ nsam piti.