Read New Revised Asante Twi Bible Yeremia 5 Bible Online

Yeremia 5 - New Revised Asante Twi Bible bible

Yeremia 5

¹Montu mmirika nkyini Yerusalem mmorɔno so, na monhwɛ ɛ, na monhunu, na monhwehwɛ ne mmɔntene so, sɛ mobɛhunu onipa bi, sɛ obi wɔ hɔ a ɔdi asɛntenenee, na ɔhwehwɛ nokorɛ, na memfa nkyɛ no.

²Ɛwom sɛ wɔka sɛ: Sɛ AWURADE te aseɛ yi deɛ, nanso ntam hunu na wɔkeka.

³ O AWURADE, w’ani nsa nokorɛ anaa? Wobobɔ wɔn, nanso wɔnte yea biara; wodwɛre wɔn, nanso wɔpo atenetene. Wɔahyɛ wɔn anim den sene ɔbotan, na wɔmpɛ sɛ wɔnu wɔn ho.

⁴Ɛnna mese: Yeinom yɛ mmɔborɔfoɔ, nkwaseafoɔ ne wɔn, ɛfiri sɛ wɔnnim AWURADE kwan ne wɔn Nyankopɔn mmara.

⁵ Mɛkɔ nnipa akɛseɛ nkyɛn makɔkasa akyerɛ wɔn, ɛfiri sɛ wɔn na wɔnim AWURADE kwan ne wɔn Nyankopɔn mmara no. Nanso wɔn nyinaa abubu kɔnnua no atete nkyehoma no mu.

⁶ Saa nti kwaeɛ mu gyata bɛkum wɔn, anwea pradada so pataku bɛsɛe wɔn, ɔsebɔ rewɛn wɔn nkuro ho. Obiara a ɔbɛfiri adie no, wɔbɛtete no asinasini. Na wɔn mmarato dɔɔso, na wɔn akyirisan no so.

⁷Yei deɛ, ɛbɛyɛ dɛn na mede bɛkyɛ woɔ? Wo mma agya me, na wɔkeka wɔn a wɔnyɛ anyame ntam. Na mema wɔmee mpo a, wɔsɛe awadeɛ ara, na wɔbɔ yuu kɔ nnwamamfoɔ fie.

⁸Wɔte sɛ apɔnkɔnini abrane a wɔkɔ anwan, wɔpore wɔn hwene mu wɔ wɔn mfɛfoɔ yerenom ho.

⁹ Merentua yeinom so ka anaa? AWURADE asɛm nie, anaasɛ merentɔ were ɔman a ɛte sɛɛ so anaa?

¹⁰ Momforo n’afasuo na monsɛe ne nyinaa, nanso monnsɛe no nnwie mompempane ne mman, na wɔnyɛ AWURADE dea.

¹¹Ɛfiri sɛ Israel fie ne Yuda fie atwa me nkontompo, AWURADE asɛm nie.

¹²Wɔadi torɔ AWURADE ho aka sɛ: Ɔrenyɛ hwee. Na bɔne biara remma yɛn so, na yɛrenhunu afena anaa ɛkɔm.

¹³Na adiyifoɔ no bɛdanedane mframa a asɛm biara nni wɔn anomu. Sɛdeɛ ɛbɛyɛ wɔn ne no.

¹⁴Enti sɛ AWURADE, asafo Nyankopɔn no seɛ nie: Ɛsiane sɛ moka saa asɛm yi nti, hwɛ, merema me nsɛm ayɛ ogya w’anomu, na ɔman yi adane nnyina, na ogya ahye wɔn.

¹⁵ Hwɛ, mede ɔman bi mefiri akyirikyiri mereba mo so, Israel fie, AWURADE asɛm nie. Ɔman a wɔyɛ ɔmantease, ɔman a wɔfiri teteete, ɔman a wonnim wɔn kasa, na wonte deɛ wɔka no aseɛ.

¹⁶Wɔn agyan kotokuo te sɛ damena a ano da hɔ, wɔn nyinaa yɛ nnɔmmarima.

¹⁷Na wɔbɛdi wo nnɔbaeɛ ne w’aduane; wɔbɛkum wo mmammarima ne wo mmammaa, na wɔbɛdi wo nnwan ne w’anantwie, wɔbɛdi wo bobe ne w’aborɔdɔma, na wɔde afena abobɔ wo nkuro a ɛyɛ den a wode wo ho too soɔ no.

¹⁸Nanso saa nna no mu nso, AWURADE asɛm nie, merensɛe mo menwie.

¹⁹Na sɛ wo nkurɔfoɔ ka sɛ: Adɛn nti na AWURADE yɛn Nyankopɔn ayɛ yɛn saa adeɛ yi nyinaa a? Wobɛka akyerɛ wɔn sɛ: Sɛdeɛ moagya me, na moakɔsom amannɔne anyame mo asase soɔ no, saa ara nso na mobɛsom ahɔhoɔ, asase bi a ɛnyɛ mo deɛ soɔ.

²⁰Monka yei Yakob fie, na momma wɔnte no Yuda sɛ:

²¹ Montie yei ɛ, ɔman nkwaseafoɔ a wɔnni tire, wɔwɔ ani, nso wonhunu adeɛ, wɔwɔ aso, nso wɔnte asɛm.

²² Monsuro me? AWURADE asɛm nie, anaasɛ mo akoma ntu m’anim? Me a mede anwea meto po ano hyeɛ, daa hyeɛ a ɛntumi ntra; na sɛ mpo n’asorɔkyeɛ bɔ a, ɛntumi no, na sɛ ɛhuru sɛ deɛn ara a, ɛntumi ntra.

²³Na ɔman yi wɔ atuateɛ ne asoɔden akoma; wɔte atua, na wɔkɔ;

²⁴ na wɔnka no wɔn akoma mu sɛ: Momma yɛnsuro AWURADE yɛn Nyankopɔn, na ɔno na ɔma osuo tɔ wɔ ne berɛ mu, asusɔ ne bereamporɔsuo, ɔhwɛ twaberɛ nnapɛn a wahyɛ no so ma yɛn.

²⁵ Mo amumuyɛ na ama yeinom adane, na mo bɔne na ama adepa abɔ mo.

²⁶Ɛfiri sɛ wɔhunu abɔnefoɔ me man mu; wɔtetɛ sɛdeɛ nnomaayifoɔ butubutuo; wɔsunsum mfidie yiyi nnipa.

²⁷Sɛdeɛ nnomaa hyɛ kɛntɛn ma no, sɛ nsisie ayeyɛ wɔn afie mu ma ma ne no. Enti wɔayɛ akɛseɛ na wɔanya wɔn ho.

²⁸ Wɔadodɔre sradeɛ, wɔn ho srasra. Nso wɔdi nsɛmmɔne tra so, wɔmmu atɛntenenee, wɔnni nwisiaa asɛm, na ama wɔadi yie; na ahiafoɔ nso wɔmmu atɛn mma wɔn.

²⁹ Merentua yeinom so ka anaa? AWURADE asɛm nie, anaasɛ merentɔ ɔman a ɛte sei so were?

³⁰Ahobodeɛ ne ahodwirideɛ na wɔayɛ no asase no soɔ.

³¹Adiyifoɔ hyɛ nkɔntorɔ, na asɔfoɔ nam wɔn pɛ so di wɔn koko so asɛm; me man nso pɛ no saa, nanso n’awieeɛ no mobɛyɛ no dɛn?