Read New Revised Asante Twi Bible Yeremia 51 Bible Online

Yeremia 51 - New Revised Asante Twi Bible bible

Yeremia 51

¹Sɛ AWURADE seɛ nie: Hwɛ merehwanyan ɔsɛefoɔ honhom atia Babel ne wɔn a wɔtete nnipa a wɔne me anya no mu,

² na masoma nhusofoɔ akɔ Babel, na wɔahu no so, na wɔama n’asase ada mpan, ɛfiri sɛ wɔbɛtwa ne ho ahyia, ɛda bɔne no so.

³Deɛ ɔkuntunu ne tadua mu no, ma taduakuntunfoɔ nkuntunu ne tadua mu ntia no, ne deɛ ɔma ne ho soɔ, ne dadeɛ nkataboɔ mu no. Na monnnodo ne mmeranteɛ ho, monsɛe ne dɔm nyinaa pasapasa.

⁴Na atɔfoɔ abɛgugu Kaldeafoɔ asase so, na wɔn a wɔahwire wɔn mu agugu ne mmorɔno so.

⁵ Na Israel ne Yuda Nyankopɔn, asafo AWURADE no, nnyae wɔn. Na wɔn deɛ, wɔn asase no, Israel Kronkronni no ho asodie ahyɛ so ma.

⁶ Monnwane mfiri Babel mu, na mommema mo kra mfiri mu mfi, na monnnwerɛ wɔ n’amumuyɛ mu, na AWURADE aweretɔ berɛ nie, ɔretua no ne nneyɛɛ so ka.

⁷ Babel yɛ AWURADE nsam sika kuruwa a ɛma asase nyinaa borɔ; amanaman anom ne nsa no bi, enti na amanaman abobɔ dam.

⁸ Mpofirim na Babel ahwe aseɛ na wɔabubu no. Montwa ne ho agyaadwo, momfa ne yea ano aduro mmra, ebia wɔsa a, ɛbɛyɛ yie.

⁹Anka yɛresa Babel yadeɛ, nanso ansa. Monnya no mma yɛnkɔ yɛn nsase so, na n’atemmuo akɔduru ɔsoro, na wɔama so de akɔduru wiem tɔnn.

¹⁰AWURADE ayi yɛn tenenee adi; mommra mma yɛmmɛka AWURADE yɛn Nyankopɔn nneyɛe wɔ Sion.

¹¹ Monse agyan, monsɔ akyɛm mu! AWURADE akanyan Media ahemfo honhom, na wabɔ Babel ho atirimpɔ sɛ ɔbɛsɛe no, na AWURADE aweretɔ, n’asɔrefie aweretɔ ne no.

¹²Monsi frankaa ntia Babel afasuo, momma ɔwɛn mu nyɛ den, momfa awɛmfoɔ nsisi hɔ, monsiesie atɛfoɔ, na AWURADE dwene ne tirim, nso ɔreyɛ deɛ waka no Babelfoɔ ho no.

¹³ O, wo a wote nsuo bebree soɔ a w’akoradeɛ dɔɔso no, w’awieeɛ aba, deɛ wɔasusuo a wɔbɛtwa no wo soɔ no aduru so.

¹⁴Asafo AWURADE aka ne ho ntam sɛ: Ampa ara, mede nnipa bɛhyɛ wo ma sɛ mmɛbɛ, na wɔabɔ wo so se.

¹⁵ Ɔno na ɔde ne tumi yɛɛ asase de ne nyansa maa wiase timm hɔ, na ɔde ne nhunumu de ɔsoro trɛɛ hɔ.

¹⁶Aprannaa bom a, ɔma nsu dodoɔ ba ɔsoro, na ɔma nsuwisie tu firi asase ano nohoa; ɔyɛ anyinam ka osuo ho, ɔtu mframa firi n’adekorabea hɔnom.

¹⁷Nnipa nyinaa yɛ nkwaseafoɔ a wɔnni nimdeɛ, sikadwumfoɔ nyinaa ani wuwu ahoni ho, ɛfiri sɛ wɔn agudeɛ yɛ atorɔ, na ahome nni wɔn mu;

¹⁸wɔyɛ ahuhudeɛ nko, nnadaa adwuma, wɔn asotwe berɛ mu no, wɔbɛyera.

¹⁹Yakob kyɛfa nte sɛ yeinom, ɛfiri sɛ nnoɔma nyinaa yɛfoɔ ne no, na Israel ne n’agyapadeɛ abusuakuo, asafo AWURADE ne ne din.

²⁰ Woyɛ me asaeɛ ne akodeɛ, na mede wo mebobɔ amanaman, na mede wo mesɛesɛe ahennie;

²¹na mede wo mebobɔ ɔpɔnkɔ ne ne sotefoɔ; na mede wo mebobɔ teaseɛnam ne mutenafoɔ;

²²na mede wo mebobɔ ɔbarima ne ɔbaa, na mede wo mebobɔ akɔkoraa ne abɔfra, na mede wo mebobɔ aberanteɛ ne ababaa;

²³na mede wo mebobɔ odwanhwɛfoɔ ne ne nnwankuo, na mede wo mebobɔ okuafoɔ ne n’anantwie mpamho, na mede wo mebobɔ amradofoɔ ne ɔman mpanimfoɔ.

²⁴ Na mɛtua Babel ne Kaldeafoɔ nyinaa nnebɔne a wɔde ayɛ Sion no nyinaa so ka, mo ani so, AWURADE asɛm nie.

²⁵Hwɛ, me ne wo anya, bepɔ sɛefoɔ, AWURADE asɛm nie, wo a wosɛe asase nyinaa, wo so na matene me nsa, na mamunimuni wo afiri ɔbotan so, na mayɛ wo bepɔ a ahyeɛ.

²⁶Na wɔremfa wo mu ɔboɔ a wɔde bɛto ntweasoɔ ne ɔboɔ a wɔde bɛto fapem, na mmom wobɛdane daa amamfo, AWURADE asɛm nie.

²⁷ Monsi asase no so frankaa, monhyɛne ntotorobɛnto amanaman mu; monsiesie amanaman nkyere ne so sa, monhyia Ararat, Mini ne Askenas ahennie ntia no. Monsi sahene ntia no, momfa apɔnkɔ mmra sɛ mmɛbɛ kuro a wɔretu.

²⁸Monsiesie amanaman nkyere ne so sa, Media ahemfo, wɔn amradofoɔ ne wɔn amanpanin ne wɔn ahennie nsase nyinaa.

²⁹Na asase no woso na ɛpopo, ɛfiri sɛ AWURADE tirimbɔ no ba mu, Babel ho, sɛ ɔrebɛyɛ Babel asase amamfo a obiara nte soɔ.

³⁰Babel nnɔmmarima agyae ko tete wɔn aban mu, wɔn mmaninyɛ to atwa, wɔadanedane mmaa; wɔato wɔn afie mu gya, wɔabubu akyire adaban.

³¹Mmirikatuni tu mmirika hyia mmirikatuni, ɔbɔfoɔ nam hyia ɔbɔfoɔ sɛ ɔrekɔbɔ Babel hene amanneɛ, sɛ wɔafa ne kuro, tia ne tia,

³²na wɔagye asuo atwaeɛ, na wɔde ogya ahye mmɛwa tadeɛ no, na akofoɔ no ani atane.

³³Na sɛ asafo AWURADE, Israel Nyankopɔn, seɛ nie: Babel babaa te sɛ ayuporebea, berɛ a wɔtiatia soɔ no. Aka kakraa bi na twaberɛ aduru ama no.

³⁴Babelhene Nebukadnessar atete me, wayam me, ɔde me asi hɔ sɛ adeɛ a hwee nni mu. Wamene me sɛ asuo mu bɔpɔn bi, wayɛ me nnɔkɔnnɔkɔwadeɛ de me ahyɛ ne yafunu ma, wapu me agu sɛ nsuo.

³⁵Atirimuɔden a wɔbɔɔ me ne me honam no, wɔmfa mmisa Babel, deɛ ɔte Sion no na ɔka saa; na me mogya ngu Kaldeafoɔ so, Yerusalem na ɔka saa.

³⁶Enti sɛ AWURADE seɛ nie: Hwɛ, meredi w’asɛm mama wo, na matɔ no were mama wo; na mama ne po no mu awo, na n’asubura awe;

³⁷ na Babel ayɛ akuakuo ne ɛserɛ so kraman tenabea, ahodwirideɛ ne fɛdie, na obiara rentena hɔ.

³⁸Wɔn nyinaa bobom sɛ agyata, wɔpopɔ so sɛ agyata mma.

³⁹Sɛ wɔn ho yɛ wɔn hye a, mɛto wɔn nsapono, na mama wɔabobo na wɔn ho asɛpɛ wɔn, na wɔada daa nna, na wɔannyane, AWURADE asɛm nie.

⁴⁰Mɛtwe wɔn asiane sɛ nnwammaa a wɔrekɔkum wɔn, sɛ adwennini ne mpapo nyinaa.

⁴¹ Sɛdeɛ wɔasi afa Sesak a ɛne Babel agye asase nyinaa ayeyie no! Sɛdeɛ Babel asi adane amanaman mu ahodwirideɛ!

⁴²Ɛpo abɛsram Babel so, n’asorɔkyeɛ huuyɛ akata so.

⁴³Ne nkuro adanedane amamfo, asase pɛsɛɛ ne anwea pradada asase a obiara nte soɔ na onipa ba biara mfa soɔ.

⁴⁴ Na mɛba mabɛtwe Bel aso, Babel hɔ, na mayi deɛ wɔamene no afiri n’anomu, na amanaman rensene nkɔ ne nkyɛn bio; Babel afasuo nso ahwe ase.

⁴⁵ Me man, momfiri adi mfiri ne mu, na monnyegye mo kra mfiri AWURADE abufuo mu gya no ano.

⁴⁶Nso mommma mo akoma nntu, na monnsuro akwansosɛm a wɔbɛte no asase soɔ no ho, na akwansosɛm bɛba afe bi so, na ɛno akyi afe no, akwansosɛm foforɔ bɛba: Sɛ nhyɛsoɔ wɔ asase no so, na deɛ ɔdi tumi sɔre tia deɛ ɔdi tumi.

⁴⁷Ɛno nti hwɛ, nna bi reba a mɛba mabɛbu Babel ahoni no atɛn, na n’asase nyinaa ani awu, na n’atɔfoɔ nyinaa ahwehwe ase wɔ so.

⁴⁸ Na ɔsoro ne asase ne deɛ ɛwom nyinaa bɛto Babel no ahurisie dwom, na asɛefoɔ bɛfiri atifi fam aba ne so, AWURADE asɛm nie.

⁴⁹Babel nso, sɛdeɛ wɔmaa Israel atɔfoɔ hwehwee aseɛ no, saa ara na Babel nso asase nyinaa so atɔfoɔ bɛhwehwe aseɛ.

⁵⁰ Mo a moafiri mu afiri afena ano no, monnante nkɔ, monnnyina! Momfiri akyirikyiri nkae AWURADE, Yerusalem nso mmra mo akoma mu.

⁵¹Yɛn ani awuwu, na yɛate nsopa, ahohora akata yɛn anim, ɛfiri sɛ ananafoɔ aba AWURADE fie akronkronneɛ no.

⁵²Ɛno nti, hwɛ, nna bi reba, AWURADE asɛm nie, sɛ mɛba mabɛbu n’ahoni no atɛn, na atɔfoɔ bɛpenepene n’asase nyinaa so.

⁵³Sɛ Babel foro kɔ ɔsoro mpo, na sɛ ɔhyɛ n’aban a ɛkorɔn mu den sɛn ara a, me nkyɛn ara na asɛefoɔ bɛfiri aba ne soɔ, AWURADE asɛm nie.

⁵⁴Wɔte nteamu firi Babel ne agyaadwo kɛseɛ firi Kaldeafoɔ asase so.

⁵⁵Na AWURADE resɛe Babel, na wama gyegyeegye kɛseɛ no ayera wɔ mu. Na wɔn asorɔkyeɛ yɛ huu sɛ nsuo bebree, wɔn nne hooyɛ gyegye.

⁵⁶ Na ɔsɛefoɔ ba ɔno Babel so, na wɔkyekyere ne nnɔmmarima, wɔbubu wɔn tadua mu, ɛfiri sɛ ananmuhyɛ Nyankopɔn ne AWURADE, tua nso na ɔtua ka.

⁵⁷ Na mɛma ne mmapɔmma ne n’anyansafoɔ ne n’amradofoɔ ne ne man mpanimfoɔ ne ne nnɔmmarima abobo, na wɔadeda daa nna a wɔrennyane, ɔhene a ne din ne asafo AWURADE no asɛm nie.

⁵⁸ Sɛ asafo AWURADE seɛ nie: Babel afasuo a atrɛ tɛtrɛɛ no, wɔbɛdwiridwiri ama aseɛ ada hɔ petee, na kuro ano apono a ɛkorɔn no, wɔde ogya bɛhye, na aman adwuma a wɔyɛeɛ no ayɛ hunu, na ogya ahye deɛ nkurɔfoɔ dodoɔ abrɛ ho no.

⁵⁹ Asɛm a Odiyifoɔ Yeremia de hyɛɛ Mahseia ba Neria ba Seraia ano, ɛberɛ a ɔne Yudahene Sedekia kɔɔ Babel, afe a ɛtɔ so nnan no mu; nso na Seraia di apiafohene.

⁶⁰Na Yeremia twerɛɛ mmusuo a ɛbɛba Babel soɔ no hyɛɛ nwoma baako mu, nsɛm a wɔatwerɛ no Babel ho yi nyinaa.

⁶¹Na Yeremia ka kyerɛɛ Seraia sɛ: Sɛ woduru Babel a, hwɛ na kenkan nsɛm yi nyinaa,

⁶²na ka sɛ: AWURADE, wo na woakasa atia ha yi sɛ wobɛtutu, a obiara rentena mu, ɛfiri nnipa so kɔsi afieboa so, na adane daa amamfo ara nko!

⁶³ Na sɛ wowie nwoma yi kenkan a, wode ɔboɔ akyekyere ho, na woato atwene Eufrate mu

⁶⁴aka sɛ: Saa ara na Babel bɛmem a ɛrensɔre bio, mmusuo a mede mereba soɔ no nyinaa nti, na wɔawie sa. Ɛha na Yeremia nsɛm no pem.