Read New Revised Asante Twi Bible Yeremia 9 Bible Online

Yeremia 9 - New Revised Asante Twi Bible bible

Yeremia 9

¹ O sɛ me tiri yɛɛ nsuo na m’ani yɛɛ nisuo abura a, anka mɛsu me man babaa wuo no awia ne anadwo.

²Sɛ merenya akwantemfoɔ asoɛeɛ wɔ anwea pradada so ɛ! Anka mɛgya me man hɔ, na mafiri wɔn nkyɛn makɔ! ɛfiri sɛ wɔn nyinaa yɛ awaresɛefoɔ, nkɔnkɔnsafoɔ asafo.

³Na wɔkuntunu wɔn tɛkyerɛma de yɛ wɔn tadua atorɔ na ɛnyɛ nokorɛ na atim wɔ asase no so, na wɔfiri bɔne mu kɔ bɔne mu, na me deɛ, wɔnnim me, AWURADE asɛm nie.

⁴ Monhwɛ mo ho yie mo ayɔnkofoɔ ho, na obiara mmfa ne ho nnto onua biara so, na onua biara, nsisie ara na ɔsisie, na ɔyɔnko biara nam di nsekuro.

⁵Na wɔn nyinaa twitwa wɔn mfɛfoɔ nkontompo, na nokorɛ deɛ, wɔnka. Wɔma atorosɛm ka kokwa wɔn tɛkyerɛma so, wɔdi abɔnefosɛm, na wɔnnu wɔn ho.

⁶Wo tenabea wɔ nnaadaa ntam; nnaadaa nti wɔmpɛ sɛ wɔhu me, AWURADE asɛm nie.

⁷Enti sɛ asafo AWURADE seɛ nie: Hwɛ, mɛnane wɔn na masɔ wɔn mahwɛ, na menyɛ dɛn, me man babaa no ho?

⁸Wɔn tɛkyerɛma yɛ agyan a ɛkum nipa, nnaadaasɛm na ɛka; wɔde wɔn ano ka asomdwoeɛsɛm kyerɛ ɔyɔnko, na wɔn mu deɛ, wɔtetɛ no.

⁹ Meremmɛtwe wɔn aso wɔ yei nti anaa? AWURADE asɛm nie, anaasɛ me kra rentɔ ɔman a wɔte sɛɛ no so were?

¹⁰ Mmepɔ no nti, metue esu ne benabɔ mu, na ɛserɛ so adidibea no nti, meto esu dwom, ɛfiri sɛ ahye na obiara mfa hɔ, na wɔnte mmoakuo nne bio, ewiem nnomaa ne afieboa nyinaa atutu kɔ.

¹¹ Na mɛyɛ Yerusalem nkunkumaboɔ akuakuo, ɛserɛ so kraman tenabea, na madane Yuda nkuro amamfo a obiara nte hɔ.

¹² Hwan ne ɔba nyansafoɔ a ɔbɛte yei aseɛ? Na hwan ne deɛ AWURADE ano akasa akyerɛ no a ɔbɛka? Ɛdeɛn nti na asase no asɛeɛ, ahye sɛ ɛserɛ, na obiara mfa soɔ?

¹³Na AWURADE se: Ɛfiri sɛ wɔagya me mmara a mede mesii wɔn anim, na wɔantie me, na wɔannante mu ntira.

¹⁴ Na wɔdii wɔn akoma denyɛ akyi ne Baalim akyi, sɛdeɛ wɔn agyanom kyerɛɛ wɔn no.

¹⁵ Enti sɛ asafo AWURADE, Israel Nyankopɔn no seɛ nie: Hwɛ, mede ɔnwono bɛma ɔman yi adi, na mede nsuo a ɛborɔ wɔ mu ama wɔanom.

¹⁶ Na mɛbɔ wɔn apete amanaman a wɔne wɔn agyanom nhunuu wɔn da mu, na mama afena adi wɔn akyi akɔsi sɛ mɛwie wɔn sɛeɛ.

¹⁷Sɛ asafo AWURADE seɛ nie: Monnwene ho na momfrɛ mmaa a wɔnim su mmra, na monsoma ma wɔnkɔhyia mmaa anyansafoɔ na wɔmmra,

¹⁸na wɔnyɛ ntɛm ntue yɛn ho su, na yɛn ani mporepore nisuo, na yɛn anisuatɛtɛ nsene nsuo.

¹⁹Na wɔte esu nka firi Sion: Sɛdeɛ yɛasi asɛe afa! Yɛn ani awu pii, ɛfiri sɛ yɛagya asase no, na wɔasunsum yɛn tenabea agu.

²⁰Na mo mmaa, montie AWURADE asɛm, na n’anomu asɛm nkɔ mo aso mu, na monkyerɛ mo mmammaa su na monkyerɛkyerɛ mo ho kwadwom.

²¹Na owuo aforo afa yɛn mpomma mu, waforo aba yɛn aban fɛfɛ mu, sɛ ɛbɛtwa mmotafowa afiri mmorɔno so ne mmeranteɛ afiri mmɔntene so.

²² Ka sɛ: Sɛ AWURADE seɛ nie: Nnipa afunu bɛgugu hɔ sɛ mfuo so nwira dodoɔ, sɛ ayutwafoɔ akyiri afiafi, na obiara remmoa ano.

²³Sɛ AWURADE seɛ nie: Mma onyansafoɔ nnhyehyɛ ne ho ne nyansa ho, na ɔhoɔdenfoɔ nnhyehyɛ ne ho n’ahoɔden ho, na ɔdefoɔ nso nnhyehyɛ ne ho n’ahodeɛ ho,

²⁴ na yei ho mmom na ma deɛ ɔhyehyɛ ne ho no nhyehyɛ ne ho, sɛ ɔnim de, na wahu me, sɛ mene AWURADE a ɔyɛ adɔeɛ, na ɔbu atɛntenenee, yɛ adetenenee, asase soɔ, na yei na ɛsɔ m’ani, AWURADE asɛm nie.

²⁵Hwɛ, nna bi reba, AWURADE na ɔseɛ, a mɛba mabɛtwe twetiafoɔ a wɔatena ase sɛ momonotofoɔ no nyinaa aso,

²⁶ Misraimfoɔ, Yudafoɔ, Edomfoɔ, Amonfoɔ, Moabfoɔ ne wɔn a wɔtete anwea pradada soɔ na wɔatwitwa wɔn nwi de di awufoɔ nni nyinaa; ɛfiri sɛ amanaman yi nyinaa yɛ momonotofoɔ, na Israel fie nyinaa yɛ akoma mu momonotofoɔ.