Read New Revised Asante Twi Bible Kwadwom 1 Bible Online

Kwadwom 1 - New Revised Asante Twi Bible bible

Kwadwom 1

¹ Ao, kuro a anka emu nkurɔfoɔ dɔɔso no, ɔno nko ara te hɔ sɛn nie! Deɛ anka ɔso amanaman mu no, wayɛ sɛ okunafoɔ. Deɛ ɔdi nsase ahodoɔ so hemmaa no, wayɛ deɛ ɔyi toɔ.

² Esu ara na ɔsu anadwo, na nisuo sensane n’afono ho. Ɔnnya n’adɔfo nyinaa mu ɔwerɛkyekyefoɔ biara; ne mfɛfoɔ nyinaa atwitwa no nkontompo, wɔadanedane n’atamfoɔ.

³Amaneɛ ne ɛsom dodoɔ nti Yuda atukɔfoɔ mu. Ɔte amanaman mu, nanso ɔnnya homegyebea. N’atifoɔ nyinaa kɔtoo no n’ahokyerɛ mu.

⁴Sion akwan di abooboo, sɛ obiara mma afahyɛ no ase nti, n’aponkɛseɛ nyinaa ayɛ afo; n’asɔfoɔ gu ahome, ne mmabaa ayɛ mmɔbɔmmɔbɔ, na ɔno ara nso, ayɛ no nwono.

⁵N’ahohiahiafoɔ ayɛ akannifoɔ, n’atamfo di yie; na ne mmarato dodoɔ nti AWURADE ahyɛ no awerɛhoɔ. Ne mmotafowa adi ɔtamfoɔ anim kɔ nnommumfa mu.

⁶Na Sion babaa ahokeka nyinaa afiri ne ho kɔ; ne mmapɔmma ayɛ sɛ atwe a wɔnnya adidibea, na wɔadwane atifoɔ anim a wɔnni ahoɔden.

⁷ Yerusalem amaneɛ ne n’ahometeɛ nna yi mu wakae n’afɛfɛdeɛ a na ɛwɔ hɔ firi tete nna mu no nyinaa; ne nkurɔfoɔ hwee ɔhohiahiafoɔ nsam na wannya ɔboafoɔ biara no, n’ahohiahiafoɔ ani gyee, na wɔseree no n’ahweaseɛ mu.

⁸ Bɔne kɛseɛ na Yerusalem ayɛ, ɛno nti na wadane akyiwadeɛ. Wɔn a anka wɔdi no ni nyinaa bu no animtiaa, ɛfiri sɛ wɔahunu n’adagya; ɔno nso gu ahome, na wadane n’ani.

⁹Ne ho figuo akeka n’atadeɛ mmuano mu; wankae n’awieeɛ, enti na wabrɛ ase ama no ayɛ nwanwa; ɔnni ɔwerɛkyekyefoɔ biara. O AWURADE, hwɛ m’amaneɛ, ɛfiri sɛ, ɔtamfoɔ adi nkonim!

¹⁰ Ɔhohiahiafoɔ no atene ne nsa n’afɛfɛdeɛ nyinaa so, aane wahunu amanaman, sɛ wɔrehyɛne ne kronkronbea hɔ, nnipa a wohyɛɛ sɛ wɔnnhyɛne w’asafo mu no.

¹¹Ne nkurɔfoɔ nyinaa gu ahome hwehwɛ aduane; wɔde wɔn afɛfɛdeɛ ma gye aduane de hyɛ wɔn ho den. O AWURADE, hwɛ na hunu; na wɔbu me animtiaa!

¹² Ɛmfa mo a mofa ɔkwan so twam nyinaa ho bi? Monhwɛ na monhunu sɛ ɔyea bi wɔ hɔ a ɛte sɛ me yea, a aka me yi, a AWURADE de aho me werɛ n’abufuhyeɛ da no!

¹³Wama ogya firi soro; aduru me nnompe mu, na adidi mu; wasum me nan fidie, wama masane m’akyi. Wama mayɛ pasaa, meyɛ hodwoo daa nyinaa.

¹⁴Ɔde ne nsa akyekyere me mmaratodeɛ ayɛ no kɔnnua; ɛtoatoa mu gu me kɔn mu, wama m’ahoɔden asa, AWURADE ayi me ahyɛ wɔn a mentumi nnyina wɔn anim no nsa,

¹⁵ AWURADE ato m’akunini a ɛwɔ me mu nyinaa agu. Ɔfrɛɛ nnipa dɔm maa wɔhyiaa mu tiaa me, sɛ wɔnnwerɛ me mmeranteɛ; AWURADE atiatia Yuda babaa so sɛdeɛ wɔtiatia nsa-kyi-amena mu.

¹⁶ Yeinom nti na mesu. M’aniwa kyi nisuo gu fam, ɛfiri sɛ me werɛkyekyefoɔ a ɔbɛdwodwo me kra ne me ntam ware; me mma ayɛ pasaa, ɛfiri sɛ ɔtamfoɔ adi nim.

¹⁷ Sion atrɛ ne nsam, nanso ɔnni ɔwerɛkyekyefoɔ biara. AWURADE ahyɛ no Yakob ho sɛ wɔn a atwa ne ho ahyia nyɛ n’ahohiahiafoɔ; Yerusalem adane wɔn mu afideɛ.

¹⁸ AWURADE di bem, ɛfiri sɛ me na mate n’anomu asɛm ho atua. Aman nyinaa, montie, na monhwɛ me yea. Me mmabaa ne me mmeranteɛ kɔ nnommumfa mu.

¹⁹ Mefrɛɛ m’adɔfo, nanso wɔdaadaa me; na m’asɔfoɔ ne me mpanimfoɔ repɛ aduane de ahyɛ wɔn ho den no, wɔtotɔɔ piti kuro no mu.

²⁰AWURADE, hwɛ sɛ me ho hiahia me yi, m’ayamdeɛ kyinkyim, m’akoma adane wɔ me yam, ɛfiri sɛ mate atua kɛseɛ nti. Afena twitwa me mma abɔntene so, na ewuo nso wɔ fie.

²¹ Wɔte sɛ meresi apini, nanso menni ɔwerɛkyekyefoɔ; m’atamfoɔ nyinaa ate m’amaneɛ; wɔn ho sɛpɛ wɔn sɛ woayɛ me saa; wobɛma ɛda a woahyɛ no adu, na wɔn nso ayɛ sɛ me.

²²Ma wɔn nnebɔne nyinaa mmra w’anim, na yɛ wɔn sɛdeɛ me mmaratodeɛ nyinaa nti wɔyɛɛ me no; na m’apinisie adɔɔso, na m’akoma atɔ piti.