Read New Revised Asante Twi Bible Kwadwom 3 Bible Online

Kwadwom 3 - New Revised Asante Twi Bible bible

Kwadwom 3

¹Mene ɔbarima a wahunu amaneɛ, n’anibereɛ abaa no ano.

²Waka me de me kɔ sum mu, deɛ hann nnie;

³me nko me so na ɔdane ba, ɔdane ne nsa ba me so daa nyinaa.

⁴Wama me honam ne me wedeɛ ayɛ afo, wabubu me nnompe mu.

⁵Wato fasuo afa me ho, na ɔde borɔ ne ɔbrɛ atwa me ho ahyia.

⁶ Ɔde me atena sum mu, sɛ tete nteredee awufoɔ.

⁷ Wato me ho ban, na mentumi mfiri adi, wama me nkɔnsɔnkɔnsɔn ayɛ duru;

⁸ nso sɛ meteam na mesu mefrɛ no a, ɔsi me mpaebɔ kwan;

⁹ɔde aboɔ a wɔatwa ayɛ m’akwan mu fasuo, wakyeakyea m’akwan.

¹⁰ Ɔyɛ me sisire a ɔtɛ, ne tasuo mu gyata;

¹¹wahima m’akwan atete me mu, wayɛ me pasaa.

¹²Wakuntunu ne tadua mu na ɔde me asi hɔ sɛ botaeɛ ama agyan;

¹³wama ne kotokuo mu agyan ahyɛne m’akoma mu.

¹⁴ Mayɛ me man nyinaa asereseredeɛ ne wɔn dwom daa daa nyinaa.

¹⁵Wama ade nwononwono ara nko amee me, wama ɔnwono abo me.

¹⁶Wama me se awe mmosea, wabrɛ me ase ahyɛ nso mu.

¹⁷Woasum me kra afiri asomdwoeɛ ho, me werɛ afiri sɛdeɛ ahotɔ teɛ,

¹⁸na mese: M’anidasoɔ ne deɛ mehwɛ AWURADE kwan wɔ ho no ayera!

¹⁹Kae m’amaneɛ ne m’ahometeɛ, ɔnwono ne borɔ no.

²⁰Me kra kae daa, na abrɛ ase me mu.

²¹Mede yei mehyɛ m’akoma mu, yei ho na mɛtwɛn ara:

²² Ɛyɛ AWURADE adɔeɛyɛ nti na yɛnwiee sa, na ne mmɔborɔhunu to ntwae.

²³Ɛyɛ foforɔ daa anɔpa, wo nokorɛdie dɔɔso.

²⁴ Me kra se: AWURADE ne me kyɛfa, ɛno nti m’ani da ne so ara.

²⁵AWURADE yɛ ma wɔn a wɔhwɛ no kwan, ma ɔkra a ɔhwehwɛ n’akyiri kwan no.

²⁶ Ɛyɛ sɛ wɔyɛ komm twɛn AWURADE nkwagyeɛ;

²⁷ɛyɛ ma ɔbarima sɛ ɔsoa kɔnnua ne mmeranteberɛ mu.

²⁸Sɛ ɔde to ne so a, ma ɔno nko ara ntena ase, na ɔnyɛ komm;

²⁹ma no mfa n’ano mmutu dɔteɛ mu, ebia na anidasoɔ bi wɔ hɔ;

³⁰ma no mfa n’afono mma deɛ ɔbɔ no, ma ahohora mmee no.

³¹Na AWURADE rento ntwene daa,

³² na sɛ ɔhyɛ wo awerɛhoɔ mpo a, ne yam hyehye no, sɛdeɛ n’adɔeɛyɛ dodoɔ no teɛ;

³³ɛfiri sɛ ɛnyɛ ne pɛ sɛ ɔbɛhyɛ obi yea anaa ɔbɛha nnipa mma.

³⁴Obi pɛkyɛ asase so nneduafoɔ nyinaa ne nan ase,

³⁵obi bu obi ntɛnkyea, ɔsorosoroni no anim,

³⁶obi dane obi asɛm ani a, AWURADE mpene so saa!

³⁷ Hwan na ɔka na ɛba mu, berɛ a AWURADE nhyɛeɛ?

³⁸Ɛnyɛ ɔsorosoroni no anomu na mmusuo ne papa fire?

³⁹Adɛn nti na onipa a ɔte aseɛ di amaneɛ ho abooboo, ɔbarima a ɔte ne bɔne mu?

⁴⁰Momma yɛmpeepee yɛn akwan mu nhwehwɛ mu, na yɛnsane mmra AWURADE nkyɛn.

⁴¹Momma yɛmmema yɛn akoma ne yɛn nsa so nkyerɛ Onyankopɔn wɔ ɔsoro.

⁴² Yɛn ara na yɛato mmara na yɛate atua, wo nso woamfa amfiri.

⁴³Wode abufuo kataa wo ho, na wotii yɛn, woakum, woanni adɔna.

⁴⁴Wode mununkum kataa wo ho, na mpaebɔ amfa mu amma wo hɔ.

⁴⁵Wode yɛn ayɛ nwira dodoɔ ne akyiwadeɛ, aman no mfimfini.

⁴⁶Yɛn atamfoɔ nyinaa ahaahaa wɔn anomu atia yɛn.

⁴⁷Ehu ne amena, ɔsɛeɛ ne pasaayɛ abɛda yɛn hɔ.

⁴⁸ M’ani pore nisuo sɛ asutene, me man babaa sɛeɛ ho.

⁴⁹M’ani pore nisuo, na ɛnnyae, ɛnnya atwayɛ

⁵⁰kɔsi sɛ AWURADE bɛsi ne tiri ase afiri soro ahwɛ.

⁵¹ M’ani hyɛ me awerɛhoɔ me man mmammaa nyinaa nti.

⁵²M’atamfoɔ apamo me kwa sɛ anomaa.

⁵³Wɔto me twene amena mu animono, na wɔasi me aboɔ;

⁵⁴nsuo bu kataa me tiri so; na mese: Wɔatwa me atwene.

⁵⁵ Mefiri abura ase tɔnn meteaa mu mefrɛɛ wo din, AWURADE.

⁵⁶Wotee me nne; nsi w’aso wɔ m’ahomeguo ne me sufrɛ ho.

⁵⁷Wotwe pinii da a mefrɛɛ woɔ no; wokaa sɛ: Nsuro!

⁵⁸O AWURADE, woadi me kra asɛm ama me; woagye me nkwa.

⁵⁹AWURADE, woahunu asɛmmɔne a wɔdii me; bu atɛn ma me!

⁶⁰Woahunu wɔn aweretɔ no nyinaa, wɔn tirimbɔ a wɔbɔ no me ho nyinaa,

⁶¹AWURADE, woate wɔn nsopa nyinaa, wɔn tirimbɔ a wɔbɔ no me ho nyinaa,

⁶²wɔn a wɔsɔre tia me no ano, ne wɔn adwene a wɔdwene me ho daa daa nyinaa no;

⁶³ hwɛ wɔn asetena ne wɔn sɔreɛ no ɛ! Mene wɔn nnwom mu nsɛm akɛseɛ.

⁶⁴ AWURADE, hyɛ wɔn ananmu, sɛdeɛ wɔn nsa ano nneyɛɛ teɛ.

⁶⁵Ma nkatasoɔ nkata wɔn akoma so, na wo nnome mmra wɔn so.

⁶⁶Ti wɔn abufuo mu, na sɛe wɔn firi ɔsoro ase, O AWURADE.