Read New Revised Asante Twi Bible Kwadwom 4 Bible Online

Kwadwom 4 - New Revised Asante Twi Bible bible

Kwadwom 4

¹ Ao, sɛ sika abiri tumm, hyerɛmmoɔ pa no asakyera nie! Wɔatoto kronkronbea aboɔ no agu mmorɔno nyinaa so.

²Sion mma a wɔn boɔ yɛ den a wɔde sika amapa kari wɔn no, ɛsii sɛn na wɔbuu wɔn sɛ dɔteɛ nkukuo, ɔnwomfoɔ nsa ano adwuma yi?

³Ɛserɛ so kraman mpo twetwe wɔn nufo ma wɔn mma nnum; me man babaa adane otirimuɔdenfoɔ te sɛ ɛserɛ so nsohori.

⁴Sukɔm ma akɔkoaa tɛkyerɛma fam ne dodo mu, mmotafowa srɛ aduane, obi nni hɔ a ɔbu bi ma wɔn.

⁵Wɔn a wɔdii adɔkɔdɔkɔdeɛ no ayɛ pasaa mmorɔno so; wɔn a wɔyɛne wɔn ɔtankɔkɔɔ soɔ no yɛ sumina atuu.

⁶ Na me man babaa amumuyɛ so akatua sene Sodom bɔne no deɛ, ɛno nti na wɔbutuu no amonom, a ɛnyɛ nsa na ɛsɛe no.

⁷Ne mmapɔmma ho te sene sukyerɛmma, wɔhoa nso sene nufosuo; wɔn honam bere sene ntwoma, wɔn nipadua te sɛ hoaboɔ.

⁸Afei deɛ wɔn anim biri sene gyabidie, wɔhu wɔn mmorɔno so a, wɔnhu wɔn: Wɔn wedeɛ afemfam wɔn nnompe ho, akyen wirekyee, ayɛ sɛ dua.

⁹Wɔn a wɔtotɔ afena ano deɛ yɛ sene wɔn a wɔtotɔ ɛkɔm ano a afuo mu nnɔbaeɛ a abɔ wɔn nti wɔkusa hyeɛ no.

¹⁰ Mmaa a wɔn yam hyehye wɔn de wɔn nsa noaa wɔn ara wɔn yafumma; wɔde wɔn yɛɛ aduane, me man babaa sɛeɛ no mu.

¹¹AWURADE ayi n’abufuhyeɛ no adi awie, wahwie n’abufuo a ano yɛ den no agu; wasɔ Sion mu gya ama no ahye ne nnyinasoɔ.

¹²Asase so ahemfo ne wiasefoɔ nyinaa annye anni, sɛ ɔhohiahiafoɔ ne ɔtamfoɔ bɛba abɛhyɛne Yerusalem apono mu.

¹³N’adiyifoɔ bɔne, ne n’asɔfoɔ amumuyɛ nti na ɛbaa saa; ma wɔhwiee teneneefoɔ mogya wɔn mfimfini.

¹⁴Wɔkeka sɛ anifirafoɔ wɔ mmorɔno so, wɔde mogya agugu wɔn ho fi a enti wɔntumi nka wɔn ntadeɛ.

¹⁵Wɔteaa mu kyerɛɛ wɔn sɛ: Momfiri ha! Mo a mo ho akum! Mommane, mommane, mommfa mo nsa nnka! Wɔdwane kɔkyinkyiniiɛ no, wɔkaa no amanaman mu sɛ: Wɔrenkɔ so ntena ha bio.

¹⁶ AWURADE ankasa na apansam wɔn, ɔrenkɔ so nhwɛ wɔn; wɔnhwɛ asɔfoɔ anim, mpanin anim amma nyam.

¹⁷Yɛn ani da so rehwɛ yɛn mmoa a ɛremma no kwan, yɛn ahwɛeɛ hɔ no, yɛhwɛɛ ɔman a wɔntumi nnye yɛn nkwa no kwan ara.

¹⁸Wɔtoaa yɛn anammɔn, na yɛantumi annante yɛn mmɔntene so. Yɛn awieeɛ abɛn, yɛn nna ahi, aane, yɛn awieeɛ adu.

¹⁹Yɛn atifoɔ ho yɛ hare sene ɔsoro akɔdeɛ; wɔti yɛn yerɛdɛyerɛdɛ mmepɔ so, wɔtetɛ yɛn ɛserɛ so.

²⁰ Yɛn hwene mu ahome, deɛ AWURADE asra no no, wɔakyere no wɔn amena mu, ɔno a yɛkaa sɛ: Ne nwunu ase na yɛbɛnya nkwa, amanaman mu no.

²¹ Ma wo ho nsane wo na w’ani nnye, Edom babaa a wote Us asase soɔ no; wo nso wo so na amanehunu no rebɛtwam aba, wobɛboro na w’adagya ada adi.

²² O Sion babaa, w’amumuyɛ so akatua asa! Ɔremma wo nkɔ so ntena otukorɔ mu; nanso, Edom babaa, ɔbɛba abɛtua w’amumuyɛ so ka, ɔbɛyi wo bɔne so.