Read New Revised Asante Twi Bible Kwadwom 5 Bible Online

Kwadwom 5 - New Revised Asante Twi Bible bible

Kwadwom 5

¹AWURADE, kae deɛ aba yɛn soɔ, hwɛ na hunu yɛn ahohora!

²Yɛn agyapadeɛ adane ahɔhoɔ deɛ, yɛn afie ayɛ ananafoɔ deɛ;

³yɛadanedane nwisiaa ne nnyanka, yɛn nanom te sɛ akunafoɔ.

⁴Nsuo a yɛnom, yɛtua ka, yɛn nnyina nso, wɔtɔn ma yɛn.

⁵Wɔkura yɛn kɔn akyi ka yɛn kɔ, yɛbrɛ, wɔmma yɛnnya ahomeyɛ.

⁶Yɛde yɛn ho ma Misraim ne Asiria, na yɛanya aduane adi amee.

⁷ Yɛn agyanom ayɛ bɔne, nso wɔnni hɔ, na yɛn na yɛso wɔn amumuyɛ.

⁸Nkoa di yɛn so, deɛ ɔbɛgye yɛn afiri wɔn nsa mu nni hɔ.

⁹Yɛn nkwa kurakura yɛn nsam, na yɛkɔpɛ yɛn aduane wɔ ɛserɛ so, afena no anim.

¹⁰Yɛn wedeɛ ayɛ hyehyeehye sɛ fononoo, ɛkɔm a ano yɛ hyeɛ no nti.

¹¹Wɔabrɛ Sion mmaa, ne Yuda nkuro mu mmabaa, ase.

¹²Wɔde wɔn nsa sensɛne mmapɔmma, wɔnni mpanin ni.

¹³Wɔma mmeranteɛ yam ayuyammoɔ so, na mmɔfra hwehwe ase nnyina ase.

¹⁴Mpanimfoɔ agyae kuro apono mu ba, mmeranteɛ agyae wɔn sankubɔ.

¹⁵Yɛn akoma ahosan agyae, yɛn asa adane abooboodie.

¹⁶ Yɛn abotire ayi atɔ fam. Yɛn ara yɛnnue, na yɛayɛ bɔne.

¹⁷Yei nti, na yɛn akoma atɔ piti, yeinom ho na yɛn ani so ayɛ kusuu.

¹⁸Sion bepɔ a ayɛ amamfo nti, ɛserɛ so kraman nenam so.

¹⁹Wo AWURADE, wote hɔ daa, w’adwa tim hɔ, awoɔ ntoatoasoɔ nyinaa mu.

²⁰ Ɛdeɛn nti na wo werɛ firi yɛn ma no kyɛre saa, na woagya yɛn dadadada yi?

²¹AWURADE, sane yɛn bra wo nkyɛn, na yɛnsane, ma yɛn nna nyɛ foforɔ sɛ tete deɛ no.

²²Anaasɛ poɔ na woapo yɛn koraa, wo bo afu yɛn mmoroso?