Read New Revised Asante Twi Bible Hesekiel 19 Bible Online

Hesekiel 19 - New Revised Asante Twi Bible bible

Hesekiel 19

¹Na wo deɛ, twa Israel aberempɔn ho kwadwom

²na ka sɛ: Adɛn na wo na, gyatabereɛ no butu agyatanini ntam yɛne ne mma gyataburuwa mu?

³Na ɔyɛnee ne mma mu baako, ɔyɛɛ gyataburuwa na ɔsuaa ahayɔ; ɔdii nnipa nam,

⁴ na amanaman tee ne nka, na wɔkyeree no wɔn amena mu, na wɔde hwene mu kaa twee no kɔɔ Misraim asase so.

⁵Na ne na hunuu sɛ watwɛn, nanso n’anidasoɔ ayera no, ɔfaa ne mma mu bi de no yɛɛ gyataburuwa.

⁶ Na ɔnenam agyata mu no, ɔyɛɛ gyataburuwa, na ɔsuaa ahayɔ; ɔdii nnipa nam.

⁷Na ɔhunuu wɔn akunafoɔ, na ɔbobɔɔ wɔn nkuro, na ne mmobomu gyegyeegye nti, asase no ne ne mayɛ sɛee.

⁸Ɛnna amanaman a wɔfiri nsase soɔ no ba bɛtwaa ne ho hyiaeɛ, na wɔde wɔn asau trɛɛ ne so, wɔkyeree no wɔ wɔn amena mu,

⁹ na wɔde hwene mu kaa hyɛɛ no de no hyɛɛ ebuo mu, na wɔde no kɔmaa Babel hene, na wɔde no siee abankɛseɛ mu, deɛ ɛbɛyɛ na wɔnte ne nne bio wɔ Israel mmepɔ soɔ.

¹⁰ Anka wo na te sɛ bobeturo mu bobe a wɔatɛ no nsuo ho, nsuo pii nti n’aba ne ne mman baa yie.

¹¹Na ɔnyaa mpoma a na ɛyɛ den na ɛyɛɛ ahemfo mpoma, na ne kɛseyɛ korɔn kɔduruu mununkum kusuu ntam, na wɔhunuu no ne korɔn mu, ne ne mman dodoɔ mu.

¹² Na wɔtuu no anibereɛ so too no hwee fam, na apueeɛ mframa kusaa n’aba no; ne mpoma a na ɛyɛ den no bubui na ɛtwintwamee, na ogya hyee.

¹³Na afei wɔatɛ no ɛserɛ so, asase pɛsɛɛ a ɛdi sukɔm so.

¹⁴Na ogya afiri ne mman mpoma bi mu ahye n’aba, na poma a ɛyɛ den a ɛbɛyɛ ahennie poma biara nni hɔ bio. Kwadwom nie, na abɛyɛ kwadwom.