Read New Revised Asante Twi Bible Hesekiel 21 Bible Online

Hesekiel 21 - New Revised Asante Twi Bible bible

Hesekiel 21

¹Na AWURADE asɛm baa me nkyɛn sɛ:

²Onipa ba, fa w’ani kyerɛ Yerusalem, na ma w’asɛm nsosɔ ngu kronkronbea hɔ na hyɛ nkɔm tia Israel asase no,

³na ka kyerɛ Israel asase no sɛ: Sɛ AWURADE seɛ nie: Hwɛ, me ne wo anya, na mɛtwe me nkrantɛ afiri ne bɔha mu, na matwitwa wo mu ateneneefoɔ ne abɔnefoɔ.

⁴Ɛsiane sɛ mɛtwa wo mu ateneneefoɔ ne abɔnefoɔ nti, me nkrantɛ bɛfiri ne bɔha mu atia honam nyinaa, afiri anafoɔ fam akɔsi atifi fam,

⁵na honam nyinaa ahunu sɛ me, AWURADE, matwe me nkrantɛ afiri ne bɔha mu, na ɛrensane nkɔ mu bio.

⁶Na wo, onipa ba, fa akoma a abubuo si apini, na gu ahome yaya wɔ wɔn anim.

⁷Na sɛ wɔbisa wo sɛ: Ɛdeɛn ho na woresi apini a? Ka sɛ: Akwansosɛm ntira, ɛfiri sɛ ɛreba, na akoma nyinaa bɛnane, na nsa nyinaa mu agogo, na honhom nyinaa ano akum, na anankoroma nyinaa adanedane nsuo. Hwɛ, ɛreba na abɛyɛ hɔ, AWURADE Nyankopɔn asɛm nie.

⁸Na AWURADE asɛm baa me nkyɛn sɛ:

⁹ Onipa ba, hyɛ nkɔm, na ka sɛ: Sɛ AWURADE seɛ nie: Ka sɛ: Nkrantɛ a wɔase ano na wɔapɔ ho nso,

¹⁰wɔase ano sɛ ɛnkum, wɔapɔ ho sɛ ɛntwa nyinamnyinam. Ɛbɛyɛ dɛn na yɛama yɛn ho asɛpɛ yɛn? Me ba woabu abaa, ne atenetene nyinaa animtia?[2]

¹¹Na ɔde maa sɛ wɔmpɔ ho sɛ wɔde nsa rekura, wɔase nkrantɛ no na wɔapɔ ho nso, sɛ wɔde rehyɛ okumfoɔ nsa.

¹²Onipa ba, su na twa adwo, sɛ ɛno bɛba me man so, ɛno bɛba Israel aberempɔn nyinaa so; wɔde wɔn ne me man ato hɔ ama nkrantɛ, enti hwe wo srɛ mu.

¹³ Na wɔasɔ ahwɛ; na sɛ poma a ɛbu animtia no mpo nyɛ hwee a, ɛdeɛn na ɛbɛyɛ? AWURADE Nyankopɔn asɛm nie.

¹⁴Na wo, onipa ba, hyɛ nkɔm na bɔ nsam, na nkrantɛ no bɛba mprenu ne mprɛnsa, atɔfoɔ nkrantɛ no; ɛyɛ ɔtɔfoɔ kɛseɛ nkrantɛ na atwa wɔn ho ahyia no.

¹⁵Deɛ ɛbɛyɛ na akoma atuo, na suntidua adɔɔso nti, mede nkrantɛ hyerɛn asisi wɔn kuro apono nyinaa ho. Aa! Wɔayɛ no sɛ ɛnyɛ sɛ anyinam, wɔase ano de rebɛkum.

¹⁶Dane wo ho koraa kɔ nifa, dane w’ano kɔ benkum, baabiara a wɔahyɛ sɛ w’ani nkyerɛ.

¹⁷Na me nso mɛbɔ me nsam, na mama m’anibereɛ ano adwo. Me, AWURADE, na maka.

¹⁸Na AWURADE asɛm baa me nkyɛn sɛ:

¹⁹ Na wo, onipa ba, sensan akwan mmienu fa, na Babel hene nkrantɛ mfa so mmra. Ma ne mmienu nyinaa mfiri asase korɔ so, na kurukyire akyerɛkyerɛkwan bi, nkuro nkwanta na kurukyire no.

²⁰Siesie ɔkwan a nkrantɛ no mfa so mmra Amonfoɔ kuro Raba ne Yuda kuro a ɛwɔ Yerusalem a ɛyɛ den no mu.

²¹Na Babel hene gyina tempɔn nkwanta so, akwan mmienu no ti, sɛ wɔnhyɛ nkɔm mma no, ɔwoso agyan, bisa abusua honi adeɛ, hwɛ mmerɛboɔ mu;

²²nkɔmhyɛ a ɛba ne nifa mu ne Yerusalem, sɛ wɔnsisi adwennini a ɛdwiri ɔfasuo, mmue ano okum mu, sɛ wɔnsisi adwennini a wɔde bɛdwiri aponkɛseɛ, ngu epie nsisi ntua aban.

²³Na ɛbɛyɛ wɔn sɛ nkɔntorɔ wɔ wɔn ani so; wɔanka ntankɛseɛ; nanso ɔno deɛ, ɔkae wɔn amumuyɛ, sɛ wɔnkyere wɔn.

²⁴Ɛno nti sɛ AWURADE Nyankopɔn seɛ nie: Ɛsiane sɛ momma wɔkae mo amumuyɛ ma mo mmarato da adie na wɔhunu mo bɔne, mo nneyɛɛ nyinaa mu nti, na ɛsiane sɛ wɔkae mo nti, wɔde nsa bɛkyere mo.

²⁵Na wo, ɔbɔnefoɔ a woatɔ, Israel berempɔn a ne da aduro, awieeɛ amumuyɛ berɛ mu no,

²⁶ sɛ AWURADE Nyankopɔn seɛ nie: Yi abotire no, na tu ahemmotire no; nnoɔma nnkɔ so ara nyɛ saa ara daa. Ma deɛ abrɛ ase so, na brɛ deɛ ama ne ho soɔ no ase.

²⁷ Nnaneani, nnaneani, nnaneani na mɛdane no. Na yei nso rentena hɔ, de bɛkɔ akɔsi sɛ deɛ atemmuo wɔ no no, ɛbɛba ama no.

²⁸ Na wo, onipa ba, hyɛ nkɔm sɛ: Sɛ AWURADE Nyankopɔn se Amonfoɔ ne wɔn ahohorabɔ no ho nie, na ka sɛ: Nkrantɛ, nkrantɛ a wɔtwe rebɛkum, wɔapɔ ho sɛ ɛnni nam, sɛ ɛnyɛ nyinamnyinam.

²⁹Ɛberɛ a wɔhunu adehuhuo ma woɔ na wɔrehyɛ wo nkɔntorɔ no, wɔde wo bɛto abɔnefoɔ atɔfoɔ a wɔn da aduro, awieeɛ amumuyɛ berɛ mu no kɔn ho.

³⁰Fa wo nkrantɛ sane hyɛ ne bɔha mu, faako a wɔbɔɔ woɔ no, w’awoɔ asase so na mɛbu wo atɛn,

³¹na mɛhwie m’abufuhyeɛ agu wo so, mɛfite m’anibereɛ gya no mu atia wo, na mɛyi wo ahyɛ mmarima atirimuɔdenfoɔ a wɔnim sɛeɛ ho nyansa no nsa.

³²Wobɛdane ogya mmabowa ama wo mogya agu asase no mfimfini; wɔrenkae wo bio, na me, AWURADE na maka.