Read New Revised Asante Twi Bible Hesekiel 24 Bible Online

Hesekiel 24 - New Revised Asante Twi Bible bible

Hesekiel 24

¹ Na AWURADE asɛm baa me nkyɛn afe a ɛtɔ so nkron, bosome a ɛtɔ so du no da a ɛtɔ so du no sɛ:

²Onipa ba, twerɛ da yi din, da yi ara. Babel hene atua Yerusalem da yi ara.

³Na bu asowuiɛ fie no bɛ ka kyerɛ wɔn sɛ: Sɛ AWURADE Nyankopɔn seɛ nie: Fa ɛsɛn no si so, na hwie nsuo nso gu mu.

⁴Fa ne nankum nso gu mu, nankum pa nyinaa, srɛ ne basa, nnompe a ɛyɛ nyinaa, na fa hyɛ mu ma;

⁵fa nnwan no mu deɛ ɔyɛ no, na fa nnyina hyehyɛ nnompe no ase ma no nhuru yie, na ne nnompe nso mmen wɔ mu.

⁶ Ɛno nti sɛ AWURADE Nyankopɔn seɛ nie: Due, mogya kuro! Ɛsɛn a emu awe nnaakyen a ne nnaakyen mfiri ne mu. Yiyi mu adeɛ, nankum, nankum. Wɔnnyiyi mu.

⁷Na ne mogya wɔ ne mu; waka agu ɔbotan kwawee so, wanhwie angu fam, na wɔde dɔteɛ akata so.

⁸Deɛ ɛbɛyɛ na ahwanyan anibereɛ na ama aweredie aba nti, na memaa ne mogya guu ɔbotan pataa soɔ, a wɔankata soɔ yi.

⁹ Saa nti sɛ AWURADE Nyankopɔn seɛ nie: Due, mogyahwiegu kuro! Me nso mɛma aseɛ mmaboa adɔɔso.

¹⁰Ma nnyina nnɔɔso, ma ogya no nnɛre, ma nam no nhono, nu mu ma no mpi na nnompe no nhye.

¹¹Na fa ɛsɛn no mpan si nsramma no so, deɛ ɛbɛyɛ na ne kɔbere adɔ ayɛ kɔɔ, na emu fi no anane na ne nnaakyen asa.

¹²Brɛ ara na mabrɛ agu, ɛfiri sɛ ogya rentumi nhye ne nnaakyen pii no mfiri ne ho nkɔ.

¹³ Wo fi mu wɔ abusudeɛ; sɛ matwi wo ho na amfire nti, wo ho rente mfiri wo fi no mu bio, de bɛkɔ akɔsi sɛ mɛma m’abufuhyeɛ ano adwo wo soɔ.

¹⁴Me, AWURADE, na maka. Ɛbɛba na mɛyɛ. Merennyae na merennodo ho, na merennu me ho; sɛdeɛ w’akwan teɛ ne sɛdeɛ wo nneyɛɛ teɛ no, saa ara na wɔbɛbu wo atɛn, AWURADE Nyankopɔn asɛm nie.

¹⁵Na AWURADE asɛm baa me nkyɛn sɛ:

¹⁶ Onipa ba, hwɛ, merebɛbɔ wo de ayi w’ani adeɛ a ɛpɛ no afiri wo ho. Na ntwa adwo, nsu, na mma wo nisuo nkyi.

¹⁷Gu ahome komm, nni owufoɔ ho abooboo, fa w’abɔtire bɔ wo ti, na fa wo mpaboa hyɛ wo nan, na nkata w’ano, na nni nnipa aduane.

¹⁸Na mekasa kyerɛɛ ɔman no anɔpa, na me yere wuu anwummerɛ, na anɔpa meyɛɛ sɛdeɛ ɔhyɛɛ me no.

¹⁹Na nkurɔfoɔ no ka kyerɛɛ me sɛ: Worenkyerɛ yɛn adekodeɛ a yeinom a woreyɛ yi kyerɛ wɔ yɛn ho anaa?

²⁰Na meka kyerɛɛ wɔn sɛ: AWURADE asɛm baa me nkyɛn sɛ:

²¹Kasa kyerɛ Israel fie sɛ: Sɛ AWURADE Nyankopɔn seɛ nie: Hwɛ, meregu me kronkronbea ho fi, mo ahoɔden ahokyerɛ no, mo ani adeɛ a ɛpɛ ne mo kra adeɛ a ɛdɔ no; na mo mmabanin ne mo mmammaa nkaeɛ no bɛtotɔ nkrantɛ ano.

²²Na mobɛyɛ sɛdeɛ mayɛ yi, morenkata mo ano na morenni nnipa aduane,

²³na mo abotire bɛbobɔ mo ti, na mo mpaboa ahyehyɛ mo nan. Morentwa adwo na morensu, na mode awerɛhoɔ bɛhunu amane wɔ mo amumuyɛ mu, na moasisi apini akyerɛkyerɛ mo ho.

²⁴ Na Hesekiel ayɛ mo nsɛnkyerɛnneɛ; sɛdeɛ wayɛ yi nyinaa, mobɛyɛ no berɛ a ɛbɛba mu no, na moahunu sɛ mene AWURADE Nyankopɔn.

²⁵Na wo, onipa ba, ɛda no ara a mɛgye wɔn nsam ahoɔden, wɔn ahyehyɛdeɛ ho ahosɛpɛ, wɔn ani adeɛ a ɛpɛ ne wɔn kra adeɛ a ɛpɛ, wɔn mmabanin ne wɔn mmammaa no,

²⁶ da no ara na deɛ wafiri mu afire bi bɛba wo nkyɛn abɛma w’aso ateɛ.

²⁷Ɛda no ara na wo ne deɛ wafiri mu afire no ano bɛbue, na wobɛkasa na worentɔre mum bio, na wobɛyɛ wɔn nsɛnkyerɛnneɛ na wɔahunu sɛ mene AWURADE.