Read New Revised Asante Twi Bible Hesekiel 27 Bible Online

Hesekiel 27 - New Revised Asante Twi Bible bible

Hesekiel 27

¹Na AWURADE asɛm baa me nkyɛn sɛ:

² Afei wo, onipa ba, twa Tiro ho kwadwom,

³ na ka kyerɛ Tiro sɛ: Wo a wote ɛpo aboboano, aman batani a wokɔ nsupɔ bebree soɔ, sɛ AWURADE Nyankopɔn seɛ nie: Tiro, wo deɛ, woka sɛ: Me na me ho wie fɛ yɛ!

⁴W’ahyeɛ wɔ po mfimfini, w’abantofoɔ awie wo fɛ yɛ,

⁵ Senir pepeaa na wɔde pempam w’ahyɛn afasuo, Lebanon ntweneduro na wɔfa de yɛɛ w’ahyɛn mu nnua;

⁶Basan adum na wɔde yɛɛ w’atabono, wɔyɛɛ no asonse mango a ɛhyehyɛ kwabɔhorɔ nnua a ɛfiri Kipro mpoano mu mu;

⁷ nwera a wɔakyere mu a ɛfiri Misraim yɛ wo mframatoma a ɛyɛɛ wo frankaa; bibitoma ne ntoma a ɛberedum a ɛfiri Elisa mpoano mu yɛ wo nkatasoɔ;

⁸Sidonfoɔ ne Arwadfoɔ yɛɛ w’aharefoɔ; w’anyansafoɔ wɔ wo Tiro no ara mu, wɔne w’ahyɛn kwankyerɛfoɔ;

⁹ Gebal mpanimfoɔ ne emu anyansafoɔ nso wɔ wo mu repempam w’agoago; ɛpo so ahyɛn nyinaa ne wɔn hyɛn mufoɔ wɔ wo mu di w’adwadeɛ ho nsesadwa.

¹⁰Persia ne Lidia ne Put wɔ wo dɔm mu, yɛ w’akofoɔ, wɔde kyɛm ne dadeɛ kyɛ sensɛne wo mu, wɔn na wɔmaa w’anim baa nyam.

¹¹Arwadfoɔ ne wo dɔm wɔ w’afasuo so hyia, na Gamadfoɔ wɔ w’aban atentene mu, wɔde wɔn akyɛm sensɛne w’afasuo ho hyia, wɔn na wɔmaa w’ahoɔfɛ wiee yie yɛ.

¹²Tarsis ne w’adamfo, w’adeɛ nyinaa dodoɔ nti; dwetɛ, dadeɛ, sanya, ne sumpii na wɔde bɛsesa wo hɔ adeɛ.

¹³ Yawan, Tubal ne Mesek ne wo di dwa, nnipa ne kɔbere mfrafraeɛ adeɛ na wɔde gye w’adwadeɛ.

¹⁴Bet-togarma fie na wɔfiri de apɔnkɔ ne ɔko mu apɔnkɔ ne mfunumupɔnkɔ ba de bɛsesa wo hɔ adeɛ;

¹⁵Dedan mma ne wo di dwa; mpoano aman bebree so na wo nsa ano adwadeɛ korɔ; asonse amuamu ne duaboɔ nnua na wɔde bɛtua wo ka;

¹⁶Siria ne wo di dwa, w’adeɛ a woyɛeɛ no dodoɔ nti. Nsrammaboɔ, ntoma a ɛberedum ne nkyeremu ne nwera pa ne bota ne nnenkyenema na wɔde bɛsesa wo hɔ adeɛ.

¹⁷Yuda ne Israel asase ne wo di dwa; Minit ayuo, atokoɔ,[3] ɛwoɔ, ngo ne aneneduhwam na wɔde gye w’adwadeɛ,

¹⁸Damasko ne wo di dwa, w’adeɛ a woyɛeɛ no dodoɔ so, ahodeɛ nyinaa dodoɔ nti; wɔde Helbon bobesa ne nnwan nwi fitaa ba.

¹⁹Wedan ne Yewan firi Usal bɛne wo di nsesadwa; dadeɛ a wɔabɔ, bɛwewonua ne mmetire yɛ wo nsesa adeɛ.

²⁰Dedan de apɔnkɔtoma a wɔtena soɔ ne wo di dwa.

²¹ Arabia ne Kedar aberempɔn nyinaa yɛ wo nsa ano adwadifoɔ: Nnwammaa ne adwennini ne mpapo dwa na wɔne wo die;

²²Seba ne Rama abatafoɔ ne wo di dwa, wɔde nnuhwam nyinaa mu titire ne aboɔden aboɔ nyinaa mu sika ne wo bɛdi nsesadwa;

²³Haran ne Kane ne Eden, Seba abatafoɔ, Asur, Kilmad ne wo di dwa;

²⁴wɔn na wɔyɛ w’abatafoɔ, ntoma afɛfɛ mu, bibitoma ne nkyeremu ngusoɔ mu ne asaawa a wɔafira ademudeɛ, nhoma a wɔafira na wɔakyinkyim, wɔde gye wo adwadeɛ.

²⁵Tarsis ahyɛn no ne w’akwantufoɔ di w’adwadie mu akɔneaba, na woayɛ ma, na wɔsoaa wo nnesoa pii wɔ ɛpo ahodoɔ no mfimfini.

²⁶W’aharefoɔ no de wo kɔ nsuo bebree so, apueeɛ mframa bobɔ wo wɔ ɛpo ahodoɔ no mfimfini.

²⁷W’adeɛ dodoɔ ne w’adetɔnneɛ, wo nsesa adwadeɛ, w’ahyɛn mufoɔ ne w’ahyɛn kwankyerɛfoɔ, wo mu agoago pempamfoɔ ne w’adwadeɛ sesafoɔ ne wo mu akofoɔ nyinaa ne w’asafo a wɔwɔ wo mu nyinaa, bɛmem ɛpo mu, w’ahweaseɛ da no mu.

²⁸W’ahyɛn kwankyerɛfoɔ nteamu nne ma mpoano asase wosowoso,

²⁹na wɔn a wɔkurakura atabono nyinaa, ahyɛn mufoɔ, po ani kwankyerɛfoɔ nyinaa fifiri wɔn ahyɛn mu sianesiane bɛgyinagyina fam,

³⁰na wo so na wɔmema wɔn nne soɔ, na wɔteam yayaaya de dɔteɛ gugu wɔn atifi yantamyantam nso mu,

³¹na wɔbobɔ tikwa ma wo, firafira ayitoma na wɔde ɔkra awerɛhoɔ ne agyaadwotwirɛ yaya su ma wo,

³²na wɔbɛtwa wo ho kwadwom, wɔn adwotwa no mu ato wo ho dwom sɛ: Hwan na ɔte sɛ Tiro a wɔama n’asase ayɛ dinn, ɛpo mu yi?

³³W’adwadeɛ firi po nyinaa mu baeɛ no, wode maa aman bebree mee, w’ahonyadeɛ ne w’adwadeɛ dodoɔ na wode maa asase so ahemfo nyaa wɔn ho.

³⁴Afei a wɔabobɔ wo afiri ɛpo ani de wo ahyɛ nsu donkodonko mu yi, w’adwadeɛ ne w’asafo a ɛwɔ wo mu no nyinaa atotɔ.

³⁵Nsuano aman nyinaa, wo nti wɔn ho dwiri wɔn, na awɔse gu wɔn ahemfo so, wɔn anim akusa.

³⁶ Aman mu adwadifoɔ bɔ wo so hwerɛma hwee hwee. Woapatu asɛe, na wonni hɔ bio de kɔsi daa.