Read New Revised Asante Twi Bible Hesekiel 28 Bible Online

Hesekiel 28 - New Revised Asante Twi Bible bible

Hesekiel 28

¹Na AWURADE asɛm baa me nkyɛn sɛ:

² Onipa ba, ka kyerɛ Tiro man panin sɛ: Sɛ AWURADE Nyankopɔn seɛ nie: Ɛsiane sɛ woama wo ho soɔ, na wose: Meyɛ onyame, anyamedwa so na meteɛ, ɛpo mfimfini, nanso woyɛ onipa, na wonyɛ onyame, na wobu wo ho sɛ onyame.

³ Hwɛ, woyɛ onyansafoɔ sene Daniel anaa, ahuntasɛm biara anhunta wo,

⁴wo nyansa ne wo nhunumu so na woanya adeɛ afa, na woanya sika ne dwetɛ agu w’akoradeɛ mu,

⁵wo nyansa dodoɔ ne w’adwadie na wode ama w’ahodeɛ adɔɔso, na w’adeɛ no nti w’akoma ahuhuru,

⁶enti, sɛ AWURADE Nyankopɔn seɛ nie: Ɛsiane sɛ woyɛ wo ho sɛ onyame nti,

⁷hwɛ, mede ananafoɔ mereba wo so, amanaman mu aniɛdenfoɔ, na wɔabɛtwetwe wɔn nkrantɛ atia wo nyansa ahoɔfɛ no, na wɔagu wo hyerɛn ho fi.

⁸ Amena mu na wɔde wo bɛsiane akorɔ, na woawu atɔfoɔ wuo, ɛpo mfimfini.

⁹ Ka na wobɛka sɛ: Onyame ne me, wɔn a wɔkum woɔ no anim? Na wo deɛ, woyɛ onipa na wonyɛ onyame, deɛ ɔhwire wo mu no nsam.

¹⁰Momonotofoɔ wuo na wobɛwuo ananafoɔ nsam, na me na maka, AWURADE Nyankopɔn asɛm nie.

¹¹Na AWURADE Nyankopɔn asɛm baa me nkyɛn sɛ:

¹² Onipa ba, twa Tiro hene ho kwadwom, na ka kyerɛ no sɛ: Sɛ AWURADE Nyankopɔn seɛ nie: Wo deɛ, wone abɔdeɛ afɛfɛ mu deɛ ɔyɛ, nyansa ahyɛ wo ma, w’ahoɔfɛ di mu.

¹³Nyankopɔn turo Eden mu na woteɛ, aboɔden aboɔ nyinaa yɛ wo nkataho, bogyanamboɔ, akarateboɔ ne bɔwerɛboɔ, sikabereɛboɔ, apopobibireboɔ ne ahwehwɛboɔ, hoaboɔ, nsrammaboɔ ne ahahammonoboɔ ne sika; wo mpintin ne bɔmmaa som w’anim, ɛda a wɔbɔɔ woɔ no na wɔsiesieeɛ.

¹⁴ Wo ne kerub a wɔasra no a ɔkata soɔ, na mede wo mesii hɔ, Nyankopɔn bepɔ kronkron no so na wowɔ, ogya aboɔ ntam na na wonenam.

¹⁵Na mfomsoɔ biara nni wo ho, firi da a wɔbɔɔ woɔ ara de kɔsii da a wɔhunuu wo mu abusudeɛ no.

¹⁶W’adwadie dodoɔ nti na wɔde amimdie hyɛɛ wo mu ma, na woyɛɛ bɔne, na metoo wo firi Nyankopɔn bepɔ so sɛ afideɛ, na kerub a ɔbɔ wo ho ban no, pamm wo firi ogya aboɔ no ntam.

¹⁷W’ahoɔfɛ nti w’akoma ahuhuru, woasɛe wo nyansa ne wo hyerɛn, mato wo atwene fam, mede wo ato ahemfo anim sɛ wɔnhwɛ wo.

¹⁸W’amumuyɛ dodoɔ so, w’adwadie abusudeɛ mu woagu w’akronkronneɛ ho fi, enti mama ogya afiri wo mu, na ahye wo, na madane wo nso, asase so, wɔn a wɔhwɛ woɔ nyinaa anim.

¹⁹ Wɔn a wɔnim woɔ, aman nyinaa mu, wo ho bɛyɛ wɔn ahodwiri; woapatu asɛe, na wonni hɔ bio de kɔsi daa.

²⁰Na AWURADE asɛm baa me nkyɛn sɛ:

²¹ Onipa ba, dane w’ani kyerɛ Sidon, na hyɛ ne ho nkɔm,

²² na ka sɛ: Sɛ AWURADE Nyankopɔn seɛ nie: Hwɛ, me ne wo anya, O Sidon, na mɛnya wo mu animuonyam, na sɛ meyɛ ne mu atemmudeɛ na meyi ne mu kronkronyɛ adi a, wɔahunu sɛ mene AWURADE.

²³Na merema owuyadeɛ aba ne mu na mogya agu ne mmorɔno so, na apirafoɔ atotɔ ne mu, nkrantɛ a ɛfiri mmaa nyinaa bɛba ne soɔ no ano, na wɔahunu sɛ mene AWURADE.

²⁴Na kasɛɛ a ɛwɔ onipa ne hwerɛmo a ɛyɛ ya renka hɔ mma Israel fie bio, mfiri wɔn a wɔatwa wɔn ho ahyia a wɔbu wɔn animtia no nyinaa mu, na wɔahunu sɛ mene AWURADE Nyankopɔn.

²⁵Sɛ AWURADE Nyankopɔn seɛ nie: Sɛ menya boa Israel fie ano firi aman a wɔapete wɔn mu no mu a, mɛyi me kronkronyɛ adi wɔ wɔn mu amanaman no ani so, na wɔbɛtena wɔn asase a mede maa m’akoa Yakob no so.

²⁶Na wɔbɛtena so dwoodwoo, asi adan, ayeyɛ bobe nturo, na wɔatena ase dwoodwoo, ɛfiri sɛ mɛyɛ atemmudeɛ, wɔn a wɔatwa wɔn ho ahyia bu wɔn animtia no nyinaa mu, na wɔahunu sɛ mene AWURADE wɔn Nyankopɔn.