Read New Revised Asante Twi Bible Hesekiel 42 Bible Online

Hesekiel 42 - New Revised Asante Twi Bible bible

Hesekiel 42

¹Ɛnna ɔde me firii adi faa atifi fam kwan so kɔɔ ɛho fam abannwa no soɔ, na ɔde me kɔɔ dammoa a ɛda adihɔ ne ɛhɔ dan no ntentensoɔ a ɛhwɛ atifi fam no ho,

² ne ntwemu no, ɛyɛ basafa aduonum, ɛpono ano wɔ atifi fam, na ne trɛ yɛ basafa aduonu nnum;

³ ɛda abannwa a ɛwɔ fie no ntentensoɔ, ɛyɛ basafa du; abrannaa hwɛ abrannaa anim, nsamsoɔ a ɛtɔ so mmiɛnsa mu,

⁴na adammoa no anim na ɔkwan a ne trɛ yɛ basafa nnum wɔ fie afa mu, ɛkɔ basafa aduonum kwan a ɛwɔ mu no so; na apono no ano hwɛ atifi fam.

⁵Na soro dammoa no yɛ ntiantia, ɛfiri sɛ mmrannaa no afa fa, na ɛntrɛ sɛ ɛdan no mfimfini no ase deɛ no,

⁶ɛfiri sɛ ɛyɛ aborɔsansa, na ɛnni adum sɛ mmannwa no adum no. Ne saa nti na wɔadwom afiri aseɛ deɛ ne mfimfini deɛ no so, firi fam.

⁷Na aboɔ ban a ɛwɔ adihɔ fam siane dammoa no, ɛho fam abannwa no mu hwɛ dammoa no anim, ne ntwemu basafa aduonu nnum,

⁸na adammoa a ɛhwɛ ɛho fam abannwa no ntwemu yɛ basafa aduonu nnum, na hwɛ, asɔredan no anim deɛ na ɛyɛ basafa aduonum;

⁹na adammoa yi pue aboɔ ban no so; ɔkwan a obi firi ɛho fam abannwa no so reba mu a ɔfa soɔ no da apueeɛ fam.

¹⁰Abannwa no fasuo trɛ a ɛhwɛ apueeɛ fam no, atuntunatoɔ ne ɛhɔ dan ntentensoɔ mu na adammoa wɔ,

¹¹na ɔkwan da anim. Ɛte sɛ adammoa a ɛwɔ atifi fam no, ne ntwemu ne ne trɛ saa ara ne n’adifire akwan nyinaa ne ne nsiesieeɛ; na sɛdeɛ n’apono ano teɛ no,

¹²saa ara nso na adammoa a ɛwɔ anafoɔ fam no teteɛ, ɛpono ano wɔ ɔkwan no ti, ɛne ɔkwan a ɛda ɛho aban no anim, ɔkwan a wɔfiri apueeɛ fam nam so ba mu no.

¹³Na ɔka kyerɛɛ me sɛ: Atifi fam adammoa ne anafoɔ fam adammoa a ɛsisi adihɔ no anim no ne adammoa kronkron a asɔfoɔ a wɔbɛn AWURADE no bɛdi akronkronneɛ mu akronkronneɛ no; ɛhɔ na wɔmfa akronkronneɛ mu akronkronneɛ nguguo, aduane afɔdeɛ ne bɔne ho afɔdeɛ ne asodie ho afɔdeɛ no, na ɛhɔ yɛ kronkron.

¹⁴Asɔfoɔ no hyɛne mu a, wɔmmfiri kronkronbea hɔ mmfiri adi nnkɔ ɛho fam abannwa no so, na emu hɔ na wɔmfa wɔn ntadeɛ a wɔde som nguo, na ɛyɛ kronkron. Wɔnhyehyɛ ntadeɛ foforɔ ansa na wɔabɛn deɛ ɛyɛ ɔman no deɛ ho.

¹⁵Na ɔwiee dan a ɛwɔ mu no susuo no, ɔde me firii adi faa ɛpono kɛseɛ a ani hwɛ apueeɛ fam no kwan so, na ɔsusu hyiaa twan,

¹⁶ɔde susuo demmire no susuu apueeɛ fam deɛ no basafa ahanu aduonum, susuo demmire no so de twa hyiae.

¹⁷Ɔsusuu atifi fam deɛ no basafa ahanu aduonum, susuo demmire no so, de twa hyiae.

¹⁸Ɔsusuu anafoɔ fam deɛ no basafa ahanu aduonum, susuo demmire no so;

¹⁹ɔdane kɔɔ atɔeɛ fam kɔsusuu basafa ahanu aduonum, susuo demmire no so.

²⁰Afa nnan no so na ɔsusuu no. Ɔfasuo twa ho hyia twan; ne ntwemu yɛ basafa ahanu aduonum ne ne trɛ yɛ basafa ahanu aduonum, sɛ ɛntwa kronkronbea ne anihumafoɔ deɛ ntam.