Read New Revised Asante Twi Bible Hesekiel 7 Bible Online

Hesekiel 7 - New Revised Asante Twi Bible bible

Hesekiel 7

¹Na AWURADE asɛm baa me nkyɛn sɛ:

²Wo onipa ba, sɛ AWURADE Nyankopɔn ka kyerɛɛ Israel asase nie: Awieeɛ! awieeɛ na ɛreba asase no ntwea nnan soɔ.

³Afei awieeɛ reba wo so, na mɛsoma m’abufuo aba wo so, na mabu wo w’akwan ho ntɛn, na mede w’akyiwadeɛ nyinaa bɛba wo so.

⁴Na m’ani renni wo ho adɔna, na merenhunu wo mmɔbɔ, na w’akwan na mɛma no aba wo soɔ, na w’akyiwadeɛ atena wo mu, na moahunu sɛ mene AWURADE.

⁵Sɛ AWURADE Nyankopɔn seɛ nie: Adebɔne, adebɔne baako bi, hwɛ, ɛreba!

⁶Awieeɛ aba, awieeɛ no aba, asɔre atia wo, hwɛ ɛreba!

⁷ Asase soteni, deɛ wɔahyɛ no reba wo so; ɛberɛ no aduru, ɛda no abɛn, hooyɛ berɛ, na ɛnyɛ mmepɔ so anigyeɛ huro!

⁸Afei ɛrenkyɛre na mahwie m’abufuhyeɛ agu wo so, na mawie m’abufuo wo mu, na mabu wo w’akwan ho atɛn, na mɛtea wo wɔ w’akyiwadeɛ nyinaa ho.

⁹Na m’ani rennodo wo ho, na merenhunu wo mmɔbɔ; w’akwan ho ntea na mede bɛma woɔ, na w’akyiwadeɛ atena wo mu, na moahunu sɛ me, AWURADE na mebobɔ.

¹⁰ Hwɛ, ɛda no nie, hwɛ, ɛreba; deɛ wɔahyɛ no refifi, aban no refefɛ, ahantan no ahanehane.

¹¹Atiritirasɛm asɔre ayɛ abɔnefosɛm abaa; wɔn ne wɔn asafo yuu ne wɔn hooyɛ no mu hwee nka, na yie biara nni wɔn mu.

¹²Ɛberɛ no aba, ɛda no rebɛn; mma ɔdetɔfoɔ ani nnnye na ɔdetɔnfoɔ nnni abooboo, na abufuhyeɛ no aba n’asafo yuu nyinaa so;

¹³ na ɔdetɔnni, sɛ ɔda so te ase nso a, ɔrensane mma deɛ watɔn no ho, na adehunu a ɛfa n’asafo yuu nyinaa ho no rensane, na obiara remfa n’amumuyɛ nhyɛ ne nkwa mu den.

¹⁴Wɔhyɛne totorobɛnto na wɔsiesie ade nyinaa deɛ, nanso deɛ ɔkɔ ɔsa nni hɔ; na m’anibereɛ ba wɔn asafo yuu nyinaa so.

¹⁵Nkrantɛ wɔ mfikyire, na owuyadeɛ ne ɛkɔm wɔ efie. Deɛ ɔwɔ wiram bɛwu nkrantɛ ano, na deɛ ɔwɔ kuro mu no, ɛkɔm ne owuyadeɛ bɛkum no.

¹⁶Na wɔn mu adwanefoɔ firi mu a, wɔbɛkɔ akɔtena mmepɔ so, na wɔn nyinaa ayɛ sɛ mmonhwa mu mmuburo a wɔsisi apini, obiara n’amumuyɛ ho.

¹⁷Nsa nyinaa mu bɛgogo, na nkotodwe nyinaa ahono sɛ nsuo;

¹⁸na wɔafirafira ayitoma, na awɔse agu wɔn so; na aniwuo akata anim nyinaa, na wɔn nyinaa atifi bɛpa.

¹⁹ Wɔbɛtoto wɔn dwetɛ agugu mmorɔno so, na wɔn sika adane sɛ sumina; wɔn dwetɛ ne wɔn sika rentumi nnye wɔn AWURADE abufuo da no mu, wɔremfa mma wɔn kra mmee, na wɔremfa nhyɛ wɔn ayamdeɛ mu mama, ɛfiri sɛ ɛyɛɛ wɔn amumuyɛ ho suntidua.

²⁰Na wɔn ahokekadeɛ fɛfɛ no, wɔde dii ahantansɛm, na wɔde yɛɛ wɔn akyiwadeɛ mfonini, wɔn atantanneɛ no, ɛno nti na mɛma no adane efi ama wɔn.

²¹Na mede bɛhyɛ ananafoɔ nsa, na wɔafom, ne asase so abɔnefoɔ nsa, na ayɛ wɔn asadeɛ, na wɔagu ho fi.

²²Na mɛdane m’ani afiri wɔn so, na wɔagu m’akoradeɛ ho fi, na adwotwafoɔ bɛhyɛne mu agu ho fi.

²³Yɛ nkɔnsɔnkɔnsɔn! Na mogya ho atemmuo ayɛ asase no ma, na atirimuɔden ahyɛ kuro no ma;

²⁴enti mede amanaman nnipa bɔne bɛba, na wɔbɛfa wɔn afiafi afa, na mɛtwa ahoɔdenfoɔ ahantan to ma wɔagu wɔn akronkronneɛ ho fi.

²⁵Ɔsɛeɛ reba; na wɔhwehwɛ asomdwoeɛ, nso ebi nni hɔ.

²⁶Mmusuo pae mmusuo so, akwansosɛm pae akwansosɛm so. Na wɔhwehwɛ odiyifoɔ hɔ adehunu, na mmara bɔ ɔsɔfoɔ, na afotuo bɔ mpanimfoɔ.

²⁷Ɔhene di abooboo, na ɔberempɔn fira ahodwirie, na asase no so aman aba mu abu. Wɔn akwan ho adeɛ na mɛyɛ wɔn, na wɔn atemmudeɛ na mede bɛbu wɔn atɛn, na wɔahunu sɛ mene AWURADE.