Read New Revised Asante Twi Bible Hosea 10 Bible Online

Hosea 10 - New Revised Asante Twi Bible bible

Hosea 10

¹ Israel yɛ obobe pa a ɛso n’aba nsɔ; dodoɔ ara a n’aba dɔɔso no, dodoɔ a wama afɔrebukyia nso adɔɔso. N’asase yie a ɛyɛ nti no, wɔanya ahoni adum asiyɛ nso.

²Wɔn akoma mu apaepae, afei ɛso bɛbua wɔn. AWURADE[8] bɛdwiri wɔn afɔrebukyia agu, na wasɛe wɔn ahoni adum no.

³Na afei wɔbɛka sɛ: Yɛnni hene, ɛfiri sɛ yɛansuro AWURADE, na ɔhene nso, ɛdeɛn na ɔbɛyɛ ama yɛn?

⁴Wɔakeka nsɛm, wɔakeka ntanhunu de apam apam, na atemmuo fu sɛ nkonyabi wɔ afuo mu nkofie so.

⁵ Bet-awen nantwie mma nti na Samariafoɔ bɛsuro; na ne man di ne ho abooboo, na n’asɔfoɔ ho popo n’animuonyam ho, sɛ wɔatu afiri wɔn mu korɔ.

⁶ Ɛno nso wɔbɛfa akɔ Asiria de akɔkyɛ Ɔhene Yareb. Aniwuo bɛka Efraim, na Israel ani awu n’agyinatuo ho.

⁷Samaria deɛ, wɔbɛtwa ne hene atwene sɛ nsuo ani ahuro.

⁸ Na wɔbɛsɛe Bet-awen sorɔnsorɔmmea a ɛne Israel bɔne no; nkasɛɛ ne nnɛnkyɛnse bɛfifiri wɔn afɔrebukyia so, na wɔbɛka akyerɛ mmepɔ sɛ: Mommɛkata yɛn so! ne nkokoɔ sɛ: Mommɛhwe yɛn so!

⁹ Israel, wofiri Gibea nna no so ayɛ bɔne; ɛhɔ na wɔtoaa soɔ; Gibea sa a wɔtuu no mmabusufoɔ no soɔ no anto wɔn.

¹⁰Ɛberɛ a mepɛ na mɛtwe wɔn aso, na wɔahyiahyia aman aba wɔn so abɛtua wɔn wɔn amumuyɛ mmɔho no so ka.

¹¹Na Efraim yɛ nantwiburuwa a wɔakyerɛ no na ɔpɛ ayuporeɛ, nanso mede kɔnnua bɛto ne kɔn fɛfɛ no so; mɛma Efraim atwe adeɛ, Yuda bɛfuntum, Yakob bɛka asram so afa.

¹² Mongu aba mma tenenee mfifiri mma mo, montwa adɔeɛ so adeɛ. Monnɔ kwaeɛbirentuo mfa, na aduru berɛ a wɔde hwehwɛ AWURADE akyiri kwan, kɔsi sɛ ɔbɛba abɛtɔ tenenee suo ama mo.

¹³ Moafuntum abɔnefosɛm, mmusuo na moatwa, moadi atorɔ aba. Na wode wo ho too wo kwan, wo nnɔmmarima dodoɔ no so.

¹⁴Enti hooyɛ bɛsɔre wo man no mu, na wɔabɛsɛe w’abandenden nyinaa, sɛdeɛ Salman sɛee Bet-arbel, ɔko da no, wɔbɛtete ɛna mu agu mma so.

¹⁵Saa na ayɛ mo: Betel mo bɔne mu bɔne no nti; adeɛ reba abɛkye no na wɔayi Israel hene no hɔ koraa.