Read New Revised Asante Twi Bible Amos 2 Bible Online

Amos 2 - New Revised Asante Twi Bible bible

Amos 2

¹ Sɛ AWURADE seɛ nie: Moab amumuyɛ ntoatoasoɔ nti merennane n’asotwe no, sɛ ɔde Edom hene nnompe hyee akaadoo nti.

²Na mɛto Moab mu gya, na ahye Keriot aban denden no, na Moab bɛwu hooyɛ mu, osebɔ ne totorobɛnto gyegyeɛ mu.

³ Na mɛtwa emu temmufoɔ no atwene, na makunkum ne mmapɔmma nyinaa aka ne ho, AWURADE na ɔseɛ.

⁴Sɛ AWURADE seɛ nie: Yuda amumuyɛ ntoatoasoɔ nti merennane n’asotwe no, sɛ wɔapo AWURADE mmara na wɔanni n’ahyɛdeɛ soɔ, na wɔn torɔ a wɔn agyanom dii akyire no ma wɔwɔ ntwɛtwɛdɛ nti.

⁵Na mɛto Yuda mu gya, na ahye Yerusalem aban denden no.

⁶ Sɛ AWURADE seɛ nie: Israel amumuyɛ ntoatoasoɔ nti merennane n’asotwe no, sɛ wɔtɔn ɔteneneeni gye dwetɛ, na mpaboa nti wɔtɔn ohiani.

⁷ Wɔn kɔn dɔ mmɔborɔni atifi dɔteɛ mpo, na wɔkyea amanehunufoɔ kwan, na obi ne n’agya kɔ ababaa korɔ ho, sɛ wɔde regu me din kronkron ho fi,

⁸ na wɔda awowa ntoma soɔ, afɔrebukyia nyinaa nkyɛn mu, na wɔnonom wɔn a wɔabɔ wɔn ka nsa, wɔn anyame fie.

⁹ Nanso mesɛee wɔn anim Amorini a ne kɛseɛ te sɛ ntweneduro kɛseɛ na ne ho yɛ den sɛ adum nnua no, na mesɛee n’aba wɔ soro ne n’ase nhini no.

¹⁰Na me nso meyii mo firii Misraim asase so na mede mo nantee ɛserɛ so mfirinhyia aduanan, sɛ mommɛfa Amorini asase nni.

¹¹ Na mememaa mo mma binom so mesisii adiyifoɔ, ne mo mmeranteɛ binom meyeyɛɛ ahotuafoɔ. Ɛnte saa, O Israelfoɔ? AWURADE asɛm nie.

¹² Nanso momaa ahotuafoɔ nsa nomee na mohyɛɛ adiyifoɔ sɛ: Monnhyɛ nkɔm!

¹³Hwɛ, me ara mɛnyema mo akɔ fam, sɛdeɛ teaseɛnam a ayuo afiafi ayɛ no ma nyema no.

¹⁴Na dwane bɛbɔ ɔhoɔharefoɔ, na ɔhoɔdenfoɔ nso ahoɔden abɔ no, na dɔmmarima rennye ne ho nkwa.

¹⁵Na taduakurani rennyina, na deɛ ne nan yɛ herɛ remfiri mu mfi, na ɔpɔnkɔsotefoɔ rennye ne ho nkwa.

¹⁶Na nnɔmmarima mu kokoɔdurufoɔ de adagya bɛdwane ɛda no, AWURADE asɛm nie.