Read New Revised Asante Twi Bible Amos 3 Bible Online

Amos 3 - New Revised Asante Twi Bible bible

Amos 3

¹Montie asɛm yi a AWURADE aka wɔ mo, Israelfoɔ ho; Mo a moyɛ mmusua a meyii mo firii Misraim asase so baeɛ sɛ:

² Mo nko ara na menim mo, asase so mmusua nyinaa mu, ɛno nso nti na mɛtua mo mo amumuyɛ nyinaa so ka.

³Baanu bɔ mu nante a wɔanyɛ nokorɔ ansa?

⁴Gyata bobom kwaeɛ mu a aboa biara nni n’anim anaa? Gyataburuwa ma ne nne so firi ne tu mu a ɔnkyere biribie?

⁵Anomaa tɔ fidiem wɔ ɛfam a kantankoraa bi nni hɔ mma no? Fidie bi hwan firi fam a ɛnyii biribi anaa?

⁶ Anaasɛ wɔhyɛne totorobɛnto kuro mu a ɔman mmɔ binim? Anaasɛ bɔne bi ba kuro bi mu a ɛnyɛ AWURADE na ɔma no baeɛ?

⁷Ampa ara, AWURADE Nyankopɔn renyɛ biribi gye sɛ wayi n’agyina adi akyerɛ ne nkoa adiyifoɔ no ansa.

⁸Gyata abobom, hwan na ɔrensuro? AWURADE Nyankopɔn akasa, hwan na ɔrenhyɛ nkɔm?

⁹Momma no mfa Asiria aban so na wɔnte, ne Misraim asase so aban so, na monka sɛ: Mommoa mo ano wɔ Samaria mmepɔ so, na mommɛhwɛ emu kitikiti bebree ne nhyɛsoɔ a ɛwɔ ne mu no.

¹⁰Ɛfiri sɛ wɔnnim adetenenee yɛ, AWURADE asɛm nie, wɔn a wɔboa atirimuɔden ne dwotwa ano wɔ wɔn aban mu no.

¹¹Enti sɛ AWURADE Nyankopɔn seɛ nie: Ɔhohiahiafoɔ bɛtwa asase no ho ahyia, na wayi w’ahoɔden afiri wo ho ahwe fam, na wafom w’aban denden no afa.

¹²Sɛ AWURADE seɛ nie: Sɛdeɛ odwanhwɛfoɔ hwim nnyawa mmienu anaa asokoraa firi gyata anomu no, saa ara na wɔbɛhwim Israelfoɔ a wɔtete Samaria, te sɛ nnaeɛ ntweaso sini anaa mpa so ntoma sini bi.

¹³Montie, na monni Yakob fie adanseɛ, AWURADE Nyankopɔn asafo Nyankopɔn, asɛm nie:

¹⁴Sɛ ɛda a mɛba abɛtwe Israel mmarato ho aso no, mɛtwe Betel afɔrebukyia nso aso, na wɔatwitwa afɔrebukyia no mmɛn, na agu fam.

¹⁵ Na mɛbobɔ awɔberɛ fie ne ahuhuberɛ fie, na asonse fie nso asɛe na afie bebree nso ase ahye koraa, AWURADE asɛm nie.