Read New Revised Asante Twi Bible Amos 4 Bible Online

Amos 4 - New Revised Asante Twi Bible bible

Amos 4

¹Montie asɛm yi, Basan anantwibereɛ a mowɔ Samaria bepɔ soɔ, mo a monyema mmɔborɔfoɔ na mohyɛ ahiafoɔ soɔ, na moka kyerɛ mo wuranom sɛ: Fa bra na yɛnnom no.

²AWURADE Nyankopɔn aka ne kronkronyɛ ho ntam sɛ: Hwɛ, nna bi bɛba mo so a wɔde ntɔnkɔgyei bɛtwe mo akorɔ, ne mo akyirikafoɔ nso, apofofoɔ nnarewa ano.

³Na ɔfasuo tokuro mu na mobɛfa anantenante mo anim tee afiri adie, na wɔbɛsunsum mo atwene Harmon, AWURADE asɛm nie.

⁴ Monkɔ Betel nkɔto mmara, monkɔ Gilgal mma mmarato nnɔɔso, na momfa mo kum afɔdeɛ mmra daa anɔpa, ne mo ntotosoɔ du du daa nnansa.

⁵ Na momfa mmɔreka paanoo nhye aseda afɔdeɛ na mompae ayamyi ayɛyɛdeɛ mma wɔnte. Na saa na mopɛ, mo Israelfoɔ, AWURADE Nyankopɔn asɛm nie.

⁶Na me nso memaa mo se so daa mpan, mo nkuro nyinaa mu na modii aduanekɔm, mo tenabea nyinaa mu; nanso moansane amma me nkyɛn, AWURADE asɛm nie.

⁷ Na me nso mekamee mo osutorɔ abosome mmiɛnsa a ɛdi otwa anim no mu, na metɔɔ osuo guu kuro baako so, na mantɔ bi angu kuro baako so. Afuo baako nyaa osuo, na afuo a ebi antɔ angu soɔ no hyee.

⁸Na nkuro mmienu anaa mmiɛnsa kyinkyini kɔɔ kuro baako so kɔnom nsuo, nanso wɔammee; nanso moansane amma me nkyɛn, AWURADE asɛm nie.

⁹ Memaa ɔhoɔ ne ɔpoɔ baa mo so; mo nturo ne mo bobe nturo ne mo borɔdɔma ne mo ngo nnua dodoɔ no, ntutummɛ wee; nanso moansane amma me nkyɛn, AWURADE asɛm nie.

¹⁰ Mesomaa ɔyaredɔm a ɛte sɛ Misraim deɛ no baa mo mu, mede afena mekunkumm mo mmeranteɛ na mefaa mo apɔnkɔ nnommum, na memaa mo nsraban mu kankan sɔre hyɛnee mo hwene mu; nanso moansane amma me nkyɛn, AWURADE asɛm nie.

¹¹ Mebutuu mo mu binom sɛdeɛ mebutuu Sodom ne Gomora no, na moyɛɛ sɛ gyentia a wɔatu afiri ogya mu; nanso moansane amma me nkyɛn, AWURADE asɛm nie.

¹²Enti sei na mɛyɛ woɔ, O Israel; ɛsiane sɛ mɛyɛ wo seyie nti, siesie wo ho kɔhyia wo Nyankopɔn.

¹³ Na hwɛ, deɛ ɔnwonoo mmepɔ na ɔbɔɔ mframa na ɔkyerɛ onipa deɛ ɛwɔ n’adwene mu no, deɛ ɔyɛ adekyehema esum, na ɔtiatia asase sorɔnsorɔmmea soɔ no, AWURADE, asafo Nyankopɔn ne ne din.