Read New Revised Asante Twi Bible Amos 5 Bible Online

Amos 5 - New Revised Asante Twi Bible bible

Amos 5

¹Israel fie, montie asɛm yi a merema so mo ho a ɛyɛ kwadwom:

²Ababaa Israel atɔ, ɔrensɔre bio, wɔahwe no ase n’asase so, deɛ ɔbɛma no soɔ nni hɔ.

³Na sɛ AWURADE Nyankopɔn seɛ nie: Kuro a wɔde apem firi adie bɛka ɔha, na kuro a wɔde ɔha firi adie bɛka du ama Israel fie.

⁴ Na sɛ AWURADE ka kyerɛ Israel fie nie: Monhwehwɛ m’akyiri kwan na monnya nkwa.

⁵ Na monnhwehwɛ Betel akyiri kwan, na monnkɔ Gilgal, na monntwam nnkɔ Beer-seba; ɛfiri sɛ Gilgal bɛgyina akɔ otukorɔ mu, na Betel bɛdane huhuo.

⁶Monhwehwɛ AWURADE akyiri kwan na monnya nkwa, na wampue sɛ ogya Yosef fie, na wanhye a obi a ɔbɛdum nni hɔ mma Betel;

⁷ mo a modane atemmuo bɔnwono na mode tenenee hwehwe fam no!

⁸ Ɔno na ɔyɛɛ nsoromma a ebi ne Akokɔbaatan-ne-ne-mma ne Nwenwenente, na ɔdane esum kabii adekyeeɛ, na ɔma awia duru sum sɛ anadwo, ɔfrɛ ɛpo mu nsuo hwie gu asase ani, AWURADE ne ne din.

⁹Ɔma ɔsɛeɛ ba otumfoɔ so sɛ anyinam, na ɔsɛeɛ nso ba aban a ɛyɛ den so.

¹⁰ Wɔtane deɛ ɔtenetene, kuro pono mu, na wɔkyiri deɛ ɔka nsɛm a ɛyɛ nokorɛ.

¹¹ Enti ɛnam sɛ motiatia mmɔborɔni soɔ na mogye ne hɔ ayuo nti, mode aboɔ a wɔatwa atoto aban, nanso morentena mu, moatɛ bobe nturo a ɛyɛ fɛ, nanso morennom mu nsa.

¹²Na menim sɛ mo mmarato dɔɔso na mo bɔne mu yɛ den. Mohiahia ɔteneneeni ho na mogyegye mpata, na mokyea ahiafoɔ asɛm kuro pono mu.

¹³Saa nti ɔba nimdefoɔ mua n’ano, ɛberɛ no mu, ɛfiri sɛ ɛyɛ berɛ bɔne.

¹⁴Monhwehwɛ papa, na ɛnyɛ bɔne, na moanya nkwa, na AWURADE, asafo Nyankopɔn ne mo atena, sɛdeɛ moka no.

¹⁵ Montane bɔne na monnɔ papa, na momma atɛmpa ntim kuro apono mu; ebia AWURADE, asafo Nyankopɔn bɛhunu Yosef nkaeɛ no mmɔbɔ.

¹⁶Enti sɛ AWURADE, asafo Nyankopɔn, AWURADE no seɛ nie: Adwotwa wɔ mmɔntene nyinaa so, na wɔka no mmorɔno nyinaa so sɛ: Buee, buee! Na wɔfrɛ okuafoɔ ma no bɛsu, ne wɔn a wɔnim su ma wɔbɛtwa agyaadwo.

¹⁷Na adwotwa wɔ bobe nturo nyinaa mu, ɛfiri sɛ mɛsane mafa wo mu, AWURADE na ɔseɛ.

¹⁸ Wɔnnue, wɔn a wɔfe AWURADE da no! AWURADE da yi bɛyɛ mo dɛn? Ɛyɛ esum, na ɛnyɛ hann.

¹⁹Ɛte sɛdeɛ obi dwane firi gyata anim na osisire hyia no, na ɔba efie na ɔde ne nsa twere ɔfasuo na ɔwɔ ka no.

²⁰AWURADE da no ɛnyɛ sum anaa? Ɛnyɛ hann! Ɛnyɛ kusuu anaa? Ɛnhyerɛn!

²¹ Metane na mepo mo nnapɔnna, na m’ani nnye mo afahyɛ nhyiamu ho.

²² Na sɛ mobɔ mo hyeɛ afɔdeɛ ma me na mode mo aduane ayɛyɛdeɛ brɛ me a, m’ani rensɔ, na mo nyɛmmoa asomdwoeɛ afɔdeɛ nso, merenhwɛ.

²³Yi wo dwontoɔ gyegyeegyeyɛ firi me so, na wo sankubɔ nso, merentie.

²⁴Na atemmuo mmuni mmra sɛ nsuo, na tenenee mmra sɛ asuo a ɛsene daa.

²⁵ Israel fie, mode okum afɔdeɛ ne aduane ayɛyɛdeɛ brɛɛ me ɛserɛ so mfirinhyia aduanan?

²⁶Mmom mosoa mo hene Sikut ne mo ahoni Kiun no, mo nyame a moyɛ faeɛ no nsoromma.

²⁷Enti mɛtu mo akɔ Damasko akyire nohoa, AWURADE na ɔseɛ, asafo Nyankopɔn ne ne din.