Read New Revised Asante Twi Bible Amos 6 Bible Online

Amos 6 - New Revised Asante Twi Bible bible

Amos 6

¹Wɔnnue, wɔn a wɔte Sion dwoodwoo ne wɔn a wɔde wɔn ho to Samaria bepɔ soɔ, wɔn a wɔdɛnso amanaman mu adikanfoɔ mu, wɔn a Israel fie kɔ wɔn nkyɛn no.

² Monsene nkɔ Kalne nkɔhwɛ, na momfiri hɔ nkɔ Hamat kɛseɛ, na monsiane nkɔ Filistifoɔ Gat. Wɔyɛ sene ahennie yi, anaasɛ wɔn hyeɛ mu trɛ sene mo hyeɛ anaa?

³ Mo a motu dabɔne hyɛ akyirikyirie na mode nhyɛsoɔ adwa twe pini.

⁴ Wɔdeda asonse mpadua so, na wɔtwe wɔn mu wɔn nnaeɛ so, na wɔdi nnwanten mma a wɔfiri nnwankuo mu ne nantwie mma a wɔfiri ɔyɛn dan mu.

⁵ Wɔto ahuhudwom de yi sankuo ano, na wɔbɔ wɔn tirim yɛ asankuo sɛ Dawid.

⁶Wɔnom nsa nkoraa mu, na wɔde ngohwam sra wɔn ho, na Yosef sɛeɛ deɛ, ɛnyɛ wɔn ya.

⁷Enti afei wɔn na wɔbɛdi atukɔfoɔ kan atu akorɔ, na sadwaasefoɔ gyegyeegye no agyae.

⁸AWURADE Nyankopɔn aka ne ho ntam, AWURADE, (asafo Nyankopɔn, asɛm nie): Me deɛ, mekyi Yakob ahantan, na metane n’aban denden no, na mɛyi kuro no ne ne mayɛ ama.

⁹Na sɛ wɔgya nnipa du efi korɔ mu a, ewuo ara na wɔbɛwuwuo.

¹⁰ Na obi busuani, deɛ ɔhyeɛ no bɛma no so sɛ ɔreyi nnompe no afiri fie hɔ, na ɔbɛbisa deɛ ɔwɔ efie mpiakyire mu no sɛ: Obi da so ne wo wɔ hɔ anaa? Na ɔbɛka sɛ: Wɔasa! Na ɔno nso bɛka sɛ: Mua w’ano, na wɔmmɔ AWURADE din so.

¹¹Na hwɛ, AWURADE ahyɛ, na wɔbɛbɔ efi kɛseɛ no pasapasa ne efi ketewa no nso dukuduku.

¹² Apɔnkɔ tutu ɔbotan so mmirika anaasɛ wɔde anantwie funtum hɔ anaa? Sɛ modane atemmuo awuduro na modane tenenee aba bɔnwono?

¹³Mo a mo ani gye Lo-debar[1] ho na moka sɛ: Ɛnyɛ yɛn ahoɔden na yɛde agye Karnaim mmɛn afa?

¹⁴Na hwɛ, merema ɔman bi asɔre atia mo, Israel fie, AWURADE, asafo Nyankopɔn asɛm nie, na wɔabɛha mo afiri deɛ wɔfa kɔ Hamat akɔsi mpaperɛ so subonhwa Araba no ano.