Read New Revised Asante Twi Bible Yona 2 Bible Online

Yona 2 - New Revised Asante Twi Bible bible

Yona 2

¹Na Yona firi apataa no yam bɔɔ AWURADE ne Nyankopɔn mpaeɛ sɛ:

² Mefiri m’ahohiahia mu mesu mefrɛɛ AWURADE, na ɔtiee me; mefiri Asamando ebunu mu meteaa mu, na woate me nne.

³ Na wotoo me twenee ebunu mu, ɛpo akoma mu, na ɔhweamo twaa me ho hyiae; w’asorɔkyeɛ ne w’aworɔ nyinaa bu faa me so.

⁴ Na me nso mese: Wɔatu me afiri w’anim, nanso mɛkɔ so mahwɛ w’asɔrefie kronkron no kwan so.

⁵ Nsuo bɛtwaa me ho hyiae bɛduruu ɔkra ho, ebunu twaa me ho buka sii, ɛpo mu wira kyekyeree me ti.

⁶ Mesiane mekɔɔ mmepɔ nhini ho, mekɔɔ Asamando, na wɔtoo me twenee koransan, nanso wo AWURADE me Nyankopɔn woyii me firii Amena mu.

⁷ Me kra tɔɔ me mu piti no, mekaee AWURADE, na me mpaebɔ duruu wo nkyɛn, aane w’asɔrefie kronkron hɔ.

⁸ Wɔn a wɔn ani sɔ atorɔ ahoni no, wɔpo wɔn ara wɔn ADOM.

⁹ Na me deɛ, mede aseda nne bɛbɔ wo afɔdeɛ, deɛ mahyɛ ho bɔ no, mɛtua; ɛfiri sɛ, nkwagyeɛ wɔ AWURADE!

¹⁰Ɛnna AWURADE ka kyerɛɛ apataa no maa ɔkɔfee Yona too asase pɛsɛɛ so.