Read New Revised Asante Twi Bible Numeri 1 Bible Online

Numeri 1 - New Revised Asante Twi Bible bible

Numeri 1

¹Na Israelfoɔ firii Misraimfoɔ asase so akyi afe a ɛtɔ so mmienu, ne bosome a ɛtɔ so mmienu no da a ɛdi kan no, AWURADE kasa kyerɛɛ Mose wɔ Sinai serɛ so wɔ ahyiaeɛ ntomadan mu sɛ:

² Wo ne Aaron mommu Israel nyinaa ano sɛdeɛ wɔn mmusua ne wɔn mpanimfie teɛ, nhunu mmarima nyinaa mmaako mmaako, wɔn din dodoɔ,

³ɛfiri wɔn a wɔadi mfeɛ aduonu so de rekorɔ, Israel mu obiara a ɔbɛtumi akɔ ɔsa; wo ne Aaron nkan wɔn sɛdeɛ wɔn dɔm teɛ,

⁴na abusuakuo biara mu ɔbarima bi mmɛka mo ho, ɔbarima a ɔyɛ ne mpanimfie mu otitire.

⁵Na mmarima a wɔmfiri mmusuakuo no mu mmɛboa mo no din nie: Ruben deɛ ne Sedeur ba Elisur.

⁶Simeon deɛ: Surisadai ba Selumiel.

⁷ Yuda deɛ: Aminadab ba Nahason.

⁸Isakar deɛ: Suar ba Netanel.

⁹Sebulon deɛ: Helon ba Eliab.

¹⁰ Yosef mma no deɛ: Efraim deɛ: Amihud ba Elisama. Manase deɛ: Pedahsur ba Gamaliel.

¹¹Benyamin deɛ: Gideoni ba Abidan.

¹²Dan deɛ: Amisadai ba Ahieser.

¹³Aser deɛ: Okran ba Pagiel.

¹⁴Gad deɛ: Deguel ba Eliasaf.

¹⁵Naftali deɛ: Enan ba Ahira.

¹⁶Yeinom ne asafo no mu nnipa a wɔwɔ din a wɔyɛ wɔn nananom mmusuakuo mu mmapɔmma ne Israel mpem mpem so atitire nie.

¹⁷Na Mose ne Aaron faa mmarima a wɔabobɔ wɔn din yi,

¹⁸na wɔhyiaa asafo no nyinaa boaa ano, bosome a ɛtɔ so mmienu no da a ɛdi kan, na wɔkaa wɔn awoɔ ntoatoasoɔ sɛdeɛ wɔn mmusua ne wɔn mpanimfie teɛ, wɔn din dodoɔ, ɛfiri wɔn a wɔadi mfirinhyia aduonu so de rekorɔ, mmaako mmaako;

¹⁹sɛdeɛ AWURADE hyɛɛ Mose no, saa na ɔkan wɔn Sinai serɛ soɔ.

²⁰Na Israel abakan Ruben mma, wɔn asefoɔ, sɛdeɛ wɔn mmusua ne wɔn mpanimfie teɛ, sɛdeɛ wɔn din dodoɔ sie mmaako mmaako, mmarima a wɔadi mfeɛ aduonu ne akyire no nyinaa, wɔn a wɔbɛtumi akɔ ɔsa nyinaa,

²¹wɔn a wɔkan wɔn maa Ruben abusuakuo no yɛ mpem aduanan nsia ne ahanum.

²²Simeon mma, wɔn asefoɔ, sɛdeɛ wɔn mmusua ne wɔn mpanimfie teɛ, wɔn a wɔkan wɔn sɛdeɛ wɔn din dodoɔ sie mmaako mmaako, mmarima a wɔadi mfeɛ aduonu ne akyire no nyinaa, wɔn a wɔbɛtumi akɔ ɔsa nyinaa,

²³wɔn a wɔkan wɔn maa Simeon abusuakuo no yɛ mpem aduonum nkron ne ahasa.

²⁴Gad mma, wɔn asefoɔ, sɛdeɛ wɔn mmusua ne wɔn mpanimfie teɛ, sɛdeɛ wɔn din dodoɔ sie, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

²⁵nnipa a wɔkan wɔn maa Gad abusuakuo no yɛ mpem aduanan nnum ne ahansia aduonum.

²⁶Yuda mma, wɔn asefoɔ, sɛdeɛ wɔn mmusua ne wɔn mpanimfie teɛ, sɛdeɛ wɔn din dodoɔ sie, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

²⁷nnipa a wɔkan wɔn maa Yuda abusuakuo no yɛ mpem aduɔson nnan ne ahansia.

²⁸Isakar mma, wɔn asefoɔ, sɛdeɛ wɔn mmusua ne wɔn mpanimfie teɛ, sɛdeɛ wɔn din dodoɔ sie, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

²⁹nnipa a wɔkan wɔn maa Isakar abusuakuo no yɛ mpem aduonum nnan ne ahanan.

³⁰Sebulon mma, wɔn asefoɔ, sɛdeɛ wɔn mmusua ne wɔn mpanimfie teɛ, sɛdeɛ wɔn din dodoɔ sie, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

³¹nnipa a wɔkan wɔn maa Sebulon abusuakuo no yɛ mpem aduonum nson ne ahanan.

³²Yosef mma, Efraim mma, wɔn asefoɔ, wɔn mmusua ne wɔn mpanimfie so din dodoɔ, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

³³nnipa a wɔkan wɔn maa Efraim abusuakuo no yɛ mpem aduanan ne ahanum.

³⁴Manase mma, wɔn asefoɔ, wɔn mmusua ne wɔn mpanimfie so din dodoɔ, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

³⁵nnipa a wɔkan wɔn maa Manase abusuakuo no yɛ mpem aduasa mmienu ne ahanu.

³⁶Benyamin mma, wɔn asefoɔ, wɔn mmusua ne wɔn mpanimfie so din dodoɔ, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

³⁷nnipa a wɔkan wɔn maa Benyamin abusuakuo no yɛ mpem aduasa nnum ne ahanan.

³⁸Dan mma, wɔn asefoɔ, wɔn mmusua ne wɔn mpanimfie so din dodoɔ, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

³⁹nnipa a wɔkan wɔn maa Dan abusuakuo no yɛ mpem aduosia mmienu ne ahanson.

⁴⁰Aser mma, wɔn asefoɔ, wɔn mmusua ne wɔn mpanimfie so din dodoɔ, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

⁴¹nnipa a wɔkan wɔn maa Aser abusuakuo no yɛ mpem aduanan baako ne ahanum.

⁴²Naftali mma, wɔn asefoɔ, wɔn mmusua ne wɔn mpanimfie so din dodoɔ, ɛfiri wɔn a wɔadi mfeɛ aduonu so de rekorɔ, wɔn a wɔbɛtumi akɔ ɔsa nyinaa,

⁴³nnipa a wɔkan wɔn maa Naftali abusuakuo no yɛ mpem aduonum mmiɛnsa ne ahanan.

⁴⁴Yeinom ne wɔn a wɔkan wɔn a Mose ne Aaron ne Israel mmapɔmma no kaneeɛ no, mmarima dummienu a wɔtuatua wɔn mpanimfie ano mmaako mmaako no.

⁴⁵Na Israelfoɔ mu nnipa a wɔkan wɔn nyinaa, sɛdeɛ wɔn mpanimfie teɛ, wɔn a wɔadi mfeɛ aduonu ne akyire, Israel mu ɔbarima biara a ɔbɛtumi akɔ ɔsa no,

⁴⁶ nnipa a wɔkan wɔn no nyinaa yɛ ɔpehansia mmiɛnsa ne ahanum aduonum.

⁴⁷Na Lewi mma deɛ, sɛdeɛ wɔn nananom abusuakuo teɛ no, wɔankan wɔn amfra wɔn.

⁴⁸Na AWURADE kasa kyerɛɛ Mose sɛ:

⁴⁹ Lewi abusuakuo no nko deɛ, nkan wɔn, nanso mmu wɔn dodoɔ ano mfra Israelfoɔ,

⁵⁰ na wo ara, fa Lewi mma no sisi adanseɛ tenabea no ne ɛho nnoɔma nyinaa ne adeɛ biara a ɛka ho no so, wɔn na wɔnsoa tenabea no ne ɛho nnoɔma nyinaa, na wɔn na wɔnyɛ ho adwuma, na tenabea no ho ara na wɔnkyere wɔn nsraban nhyia.

⁵¹ Sɛ wɔretu tenabea no a, Lewifoɔ no na wɔntutu, na sɛ wɔresi tenabea no a, Lewifoɔ no na wɔnsie; na ɔhɔhoɔ a ɔtwe pini no, wɔnku no.

⁵²Na Israelfoɔ no mmobɔ nsraban wɔn ara wɔn nsraban mu ne wɔn frankaa ho sɛ wɔn dɔm ahodoɔ no teɛ mmaako mmaako.

⁵³Na Lewifoɔ no deɛ, wɔmmɔ adanseɛ tenabea no ho nsraban nhyia, na AWURADE abufuo amma Israelfoɔ asafo no so. Na Lewifoɔ no nkura adanseɛ tenabea no so hwɛ mu.

⁵⁴Na Israelfoɔ no yɛɛ sɛdeɛ AWURADE hyɛɛ Mose no nyinaa.