Read New Revised Asante Twi Bible Numeri 10 Bible Online

Numeri 10 - New Revised Asante Twi Bible bible

Numeri 10

¹Na AWURADE kasa kyerɛɛ Mose sɛ:

² Yɛ dwetɛ ntotorobɛnto mmienu fa, dwetɛ a wɔaborɔ na fa yɛ, na wɔde afrɛ asafo no aba, na wɔde ama wɔatu nsraban no akɔ.

³Na sɛ wɔhyɛne ne mmienu nyinaa a, asafo no nyinaa ano nhyia wo nkyɛn ahyiaeɛ ntomadan no ano.

⁴Na sɛ wɔhyɛne baako a, mmapɔmma a wɔdi Israel apem apem so atitire no mmɛhyia wo nkyɛn.

⁵Na sɛ mohyɛne osebɔ nnyegyeeɛ a, nsraban a ɛdeda anim fam no ntu;

⁶na sɛ mohyɛne osebɔ tɔ so mmienu a, nsraban a ɛdeda anafoɔ fam no ntu: Wɔrebɛtuo no, osebɔ na wɔnhyɛne.

⁷Na sɛ wɔrebɛma asafo no abɔ dwa a, monhyɛne, na nnyɛ osebɔ nnyegyeeɛ.

⁸Na Aaron mma asɔfoɔ no na wɔnhyɛne ntotorobɛnto no; na ɛnyɛ mo daa ahyɛdeɛ mo awoɔ ntoatoasoɔ nyinaa mu.

⁹Na sɛ morekɔ ɔsa mo asase so ne ahohiahiafoɔ a wɔhiahia mo ho akɔko a, ɛnneɛ momfa ntotorobɛnto nhyɛne osebɔ nnyegyeeɛ, na wɔnkae mo, AWURADE mo Nyankopɔn anim, na wɔnnye mo nkwa mo atamfoɔ no nsam.

¹⁰ Na mo anigyeɛ nna ne mo afa a mohyɛ ne mo bosome foforɔ no mu nso monhyɛne ntotorobɛnto, mo hyeɛ afɔdeɛ ne mo asomdwoeɛ afɔdeɛ no so, na ɛnyɛ nkaeɛ mma mo, mo Nyankopɔn anim: Mene AWURADE mo Nyankopɔn.

¹¹Na afe a ɛtɔ so mmienu no bosome a ɛtɔ so mmienu no da a ɛtɔ so aduonu no, mununkum no maa ne ho so firii adanseɛ tenabea no so.

¹²Na Israelfoɔ no tutuu wɔn nsraban sii mu firii Sinai serɛ so, na mununkum no kɔgyinaa Paran serɛ so.

¹³Na yei ne deɛ ɛdi kan a wɔnam AWURADE asɛm a ɛnam Mose soɔ no so tuiɛ.

¹⁴Na Yuda mma nsraban frankaa no tuu kane, sɛdeɛ wɔn dɔm ahodoɔ teɛ; na ne dɔm no so na Aminadab ba Nahason die;

¹⁵na Isakar mma abusuakuo dɔm no so na Suar ba Natanel die;

¹⁶na Sebulon mma abusuakuo dɔm no so na Helon ba Eliab die.

¹⁷Ɛnna wɔhwinhwan tenabea no, na Gerson mma ne Merari mma soasoaa tenabea no tui.

¹⁸Na Ruben mma nsraban frankaa no tuu sɛdeɛ wɔn dɔm ahodoɔ teɛ; na ne dɔm no so na Sedeur ba Elisur die;

¹⁹na Simeon mma abusuakuo dɔm no so na Surisadai ba Selumiel die;

²⁰na Gad mma abusuakuo dɔm no so na Deuel ba Eliasaf die.

²¹Ɛnna Kohatfoɔ no soasoaa akronkronneɛ no tuiɛ; na wɔsii tenabea no de kɔsii sɛ wɔbaeɛ.

²²Na Efraim mma nsraban frankaa no tuu sɛdeɛ wɔn dɔm ahodoɔ teɛ; na ne dɔm no so na Amihud ba Elisama die;

²³na Manase mma abusuakuo dɔm no so na Pedahsur ba Gamaliel die;

²⁴na Benyamin mma abusuakuo dɔm no so na Gideoni ba Abidan die.

²⁵Ɛnna Dan mma nsraban frankaa no tu bɔɔ nsraban no nyinaa kyidɔm sɛdeɛ wɔn dɔm ahodoɔ no teɛ; na ne dɔm no so na Amisadai ba Ahieser die;

²⁶na Aser mma abusuakuo dɔm no so na Okran ba Pagiel die;

²⁷na Naftali mma abusuakuo dɔm no so na Enan ba Ahira die.

²⁸Yei ne Israelfoɔ tuo a wɔtuu sɛdeɛ wɔn dɔm ahodoɔ teɛ no.

²⁹ Na Mose ka kyerɛɛ n’ase Reuel a ɔyɛ Midianni ba Hobab no sɛ: Yɛretu akɔ deɛ AWURADE kaa ho asɛm sɛ: Ɛha na mede bɛma mo no; bra ma yɛnkɔ, na yɛbɛyɛ wo yie, ɛfiri sɛ AWURADE aka Israel ho asɛmpa.

³⁰Na ɔka kyerɛɛ no sɛ: Merenkɔ, na mmom me ara m’asase so ne m’abusua mu na mɛkorɔ.

³¹Na ɔse: Yei deɛ, nnya yɛn hɔ, na wo na wonim deɛ yɛbɛkyere nsraban ɛserɛ no soɔ nti, yɛ yɛn aniwa;

³²na sɛ wo ne yɛn nante a, papa ko a AWURADE de bɛyɛ yɛn no, yɛde bi bɛyɛ wo.

³³Ɛnna wɔtutu firii AWURADE bepɔ no ho nantee nnansa kwan, na AWURADE apam adaka no tu dii wɔn anim nnansa sɛ ɛrekyerɛ wɔn asoɛeɛ;

³⁴ na wɔtu firi nsraban no mu a, na AWURADE mununkum no wɔ wɔn so awia.

³⁵Na sɛ adaka no retu a, Mose ka sɛ: AWURADE, sɔre na w’atamfo mmɔ mpete na wɔn a wɔkyiri woɔ nnwane w’anim.

³⁶ Na sɛ ɛsoɛ a, ɔka sɛ: AWURADE, sane bra Israel mpempem no nkyɛn.