Read New Revised Asante Twi Bible Numeri 24 Bible Online

Numeri 24 - New Revised Asante Twi Bible bible

Numeri 24

¹Na Bileam hunuu sɛ asɔ AWURADE ani sɛ ɔhyira Israel no, wankɔ abisa sɛdeɛ ɔkɔɔ kane no, na mmom ɔde n’ani kyerɛɛ ɛserɛ no so.

²Na Bileam maa n’ani so, na ɔhunuu Israel sɛ wɔgu hɔ mmusua mmusua; na Nyankopɔn honhom baa ne so,

³ na ɔkasae sɛ: Beor ba Bileam asɛm a wanya sɛ ɔreka, ɔbarima a n’ani hunu adeɛ yie no asɛm a wanya,

⁴ deɛ ɔte Nyankopɔn nsɛm no na ɔreka yi, deɛ ɔhunu Tweaduampɔn anisoadeɛ, na ɔrehwe ase a, wɔte n’ani soɔ no:

⁵Sɛdeɛ wo ntomadan si yɛ fɛ, O Yakob, wo tenabea no, O Israel!

⁶Ɛyere sɛ asubɔnka, sɛ asuo ho nturo, te sɛ pɛprɛ nnua a AWURADE atɛ, te sɛ nsuo ho ntweneduro.

⁷Na ne mmokiti mu nsuo bu so, na n’asefoɔ tena nsuo pii mu. Ne hene so sene Agag, na wɔbɛma n’ahennie so.

⁸Onyankopɔn na ɔyii no firii Misraim, n’ahoɔden te sɛ ɛkoɔ deɛ. Ɔbɛmene amanaman a wɔyɛ n’atamfo, na wadwerɛ wɔn nnompe, na ɔde n’agyan awowɔ wɔn.

⁹ Ɔkoto, ɔbutu sɛ gyata ne gyatabereɛ, hwan na ɔbɛma no asɔreɛ? Nhyira ne wɔn a wɔhyira woɔ, na nnome ne wɔn a wɔdome woɔ.

¹⁰Ɛnna Balak bo fuu Bileam, na ɔbɔɔ ne nsam; na Balak ka kyerɛɛ Bileam sɛ: M’atamfoɔ nnome nti na mehyiaa woɔ, na hwɛ, nhyira na woahyira wɔn mprɛnsa yi.

¹¹Na afei dwane kɔ deɛ wofire! Mekaa sɛ anka mɛhyɛ wo animuonyam, na hwɛ, AWURADE asi w’animuonyam ho kwan.

¹²Na Bileam ka kyerɛɛ Balak sɛ: Manka mankyerɛ w’abɔfoɔ a wosomaa wɔn me nkyɛn no nso sɛ:

¹³ Sɛ Balak de ne fie a dwetɛ ne sika ahyɛ mu ma, ma me mpo a, merentumi mentra AWURADE asɛm memfiri m’akomam menkɔyɛ papa anaa bɔne; deɛ AWURADE bɛka no, ɛno na mɛka?

¹⁴Na afei, hwɛ, merekɔ me man mu: Bra na menkasa menkyerɛ wo deɛ ɔman yi bɛyɛ wo man nna a ɛdi akyire no mu.

¹⁵ Na ɔkasaa sɛ: Beor ba Bileam asɛm a wanya sɛ ɔreka, ɔbarima a n’ani hunu adeɛ yie no asɛm a wanya,

¹⁶deɛ ɔte Nyankopɔn nsɛm a ɔhunu ɔsorosoroni no ho nimdeɛ no, deɛ ɔhunu Tweaduampɔn anisoadeɛ na ɔrehwe ase a, wɔte n’ani soɔ no:

¹⁷ Mehu no, nso ɛnyɛ seesei, mehwɛ no, nso ɔmmɛn: Nsoromma bɛpue Yakob mu, na ahempoma bɛfiri Israel mu asɔre, na wadwerɛ Moab afanan nyinaa na wabubu ɔko huuyɛ mma no nyinaa.

¹⁸ Na ɔbɛfa Edom adi so, na wafa n’atamfo asase Seir adi so, na Israel bɛyɛ ahoɔdenneɛ ara.

¹⁹ Na obi a ɔfiri Yakob mu bɛdi tumi, na wasɛe wɔn a wɔaka wɔ kuro no mu no.

²⁰ Afei ɔhwɛɛ Amalek na ɔtoaa ne kasa no so sɛ: Amanaman mu dikanfo ne Amalek, nanso n’awieeɛ bɛwie no ɔsɛeɛ mu.

²¹ Na ɔhwɛɛ Kenifoɔ toaa ne kasa no so kaa sɛ: Wo tenabea si hɔ pintinn, na wode wo pirebuo asie ɔbotan mu;

²²nanso wɔbɛsɛe Kain, de akɔsi sɛ Asur bɛfa wo nnommum.

²³Na ɔwiee ne kasa no so kaa sɛ: Buei, sɛ Onyankopɔn reyɛ yei a, hwan na ɔbɛnya nkwa?

²⁴Na ahyɛn bɛfiri Kitim fam aba, na wɔabɛbrɛ Asur ase abrɛ Eber ase; na ɔno ara nso, awie no ɔsɛeɛ mu.

²⁵ Ɛnna Bileam sɔreeɛ, na ɔsii mu sane kɔɔ n’atenaeɛ; na Balak nso kɔɔ ne kwan.