Read New Revised Asante Twi Bible Numeri 34 Bible Online

Numeri 34 - New Revised Asante Twi Bible bible

Numeri 34

¹Na AWURADE kasa kyerɛɛ Mose sɛ:

² Hyɛ Israelfoɔ no mmara na ka kyerɛ wɔn sɛ: Sɛ moduru Kanaan asase no so a, (yei ne asase a ɛbɛyɛ mo agyapadeɛ, Kanaan asase no, sɛdeɛ n’ahyeɛ teɛ).

³ Mo anafoɔ fam nkyɛn mfiri Sin serɛ so Edom nkyɛn mu. Na mo anafoɔ fam hyeɛ no mfiri Nkyene Po awieeɛ wɔ apueeɛ;

⁴na mo hyeɛ no mmra Akrabim aforoeɛ anafoɔ fam, na ɛntwam nkɔ Sin, na ɛmfiri hɔ nkɔ Kades-barnea anafoɔ fam, na ɛmfiri hɔ nkɔ Hasar-adar ntwam nkɔfa Asmon.

⁵Na ɛhyeɛ no nkonton mfiri Asmon nkɔ Misraim subonhwa no mu, na ano nkɔpem po no ano.

⁶Na atɔeɛ fam hyeɛ no deɛ, ɛpo kɛseɛ a ɛda hɔ ma mo no na ɛnyɛ ɛhyeɛ; ɛno na ɛnyɛ mo atɔeɛ fam hyeɛ.

⁷Na yei nyɛ mo atifi fam hyeɛ: Momfiri po kɛseɛ no ano mfa mo ani nkari Hor bepɔ,

⁸na momfiri Hor bepɔ ho nkari deɛ wɔfa kɔ Hamat, na ɛhyeɛ no ano nkɔpem Sedad.

⁹Na ɛhyeɛ no mfiri hɔ nkɔ Sifron, na ano nkɔpem Hasar-enan; yei na ɛnyɛ mo atifi fam hyeɛ.

¹⁰Na monkari apueeɛ fam hyeɛ mfiri Hasar-enan nkɔ Sefam;

¹¹ na ɛhyeɛ no mfiri Sefam nsiane nkɔ Ribla, Ain apueeɛ, na ɛhyeɛ no nsiane ara nkɔpem Kineret Po no nsunoa, apueeɛ;

¹²na ɛhyeɛ no nsiane nkɔduru Yordan, na ano nkɔpem Nkyene Po ano. Yei ne mo asase no, sɛdeɛ ɛho ahyeɛ teɛ.

¹³Na Mose hyɛɛ Israelfoɔ no sɛ: Yei ne asase a momfa ntontobɔ so nkyɛ mu nni soɔ a AWURADE ahyɛ sɛ wɔmfa mma mmusuakuo nkron ne fa no.

¹⁴ Na Ruben mma abusuakuo, sɛdeɛ wɔn mpanimfie teɛ, ne Gad mma abusuakuo, sɛdeɛ wɔn mpanimfie teɛ, ne Manase abusuakuo fa no anya wɔn kyɛfa.

¹⁵Mmusuakuo mmienu ne fa no anya wɔn kyɛfa Yeriko, Yordan agya, anim fam ne apueeɛ.

¹⁶Na AWURADE kasa kyerɛɛ Mose sɛ:

¹⁷ Mmarima a wɔnkyɛ asase no mu mma mo no din nie: Ɔsɔfoɔ Eleasa ne Nun ba Yosua.

¹⁸Na monyiyi mmusuakuo nyinaa mu mmapɔmma mmaako mmaako, na wɔnkyɛ asase no mu.

¹⁹ Mmarima no din nie: Yuda abusuakuo mu: Yefune ba Kaleb;

²⁰Simeon abusuakuo mu: Amihud ba Semuel;

²¹Benyamin abusuakuo mu: Kislon ba Elidad;

²²Dan mma abusuakuo mu bapɔmma: Yogli ba Buki;

²³Yosef mma no deɛ: Manase mma abusuakuo mu bapɔmma: Efod ba Haniel;

²⁴Efraim mma abusuakuo mu bapɔmma: Siftan ba Kemuel;

²⁵Sebulon mma abusuakuo mu bapɔmma: Parnak ba Elisafan;

²⁶Isakar mma abusuakuo mu bapɔmma: Asan ba Paltiel;

²⁷Aser mma abusuakuo mu bapɔmma: Selomi ba Ahihud;

²⁸Naftali mma abusuakuo mu bapɔmma: Amihud ba Pedahel.

²⁹Yeinom ne wɔn a AWURADE hyɛɛ wɔn sɛ wɔnkyɛ Kanaan asase mma Israelfoɔ no.