Read New Revised Asante Twi Bible Mika 5 Bible Online

Mika 5 - New Revised Asante Twi Bible bible

Mika 5

¹Afei bɔ kyenku, wo Sion babaa. Ɔtua yɛn twa yɛn ho hyia. Wɔde abaa bɔ Israel temmufoɔ nnyepi.

² Na wo, Betlehem a ɛwɔ Efrata, wo a wosua sɛ wobɛfra Yuda mpem mpem mu, wo mu ara na obi bɛba ama me, na wabɛyɛ Israel sodifoɔ no; na n’ase firi tete nteredee, firi daa a ɛnni ase nna mu.

³ Enti ɔde wɔn bɛma akɔsi berɛ a ɔwofoɔ bi bɛwoɔ, na ne nuanom nkaeɛ bɛsane ne Israel mma nso aba.

⁴ Na ɔbɛgyina hɔ ayɛne wɔn, AWURADE ahoɔden mu, AWURADE ne Nyankopɔn din kɛseyɛ mu, na wɔatena ase; na afei ɔbɛyɛ kɛse akɔsi asase awieeɛ.

⁵ Na oyi bɛyɛ asomdwoeɛ. Sɛ Asiria ba yɛn asase so na ɔtiatia yɛn aban afɛfɛ mu a, ɛnna yɛbɛsisi ahwɛfoɔ baason, ne nnipa mu mmapɔmma baawɔtwe atia no.

⁶Na wɔde afena ayɛne Asiria asase ne Nimrod asase n’apono mu. Na sɛ Asiria ba yɛn asase so na ɔtiatia yɛn hyeɛ so a, ɔbɛgye yɛn afiri ne nsam.

⁷ Na Yakob nkaeɛ no bɛyɛ aman bebree mu sɛ obosuo a ɛfiri AWURADE nkyɛn, sɛ nhahamma so ahasuo a ɛnhwɛ ɔbarima bi kwan na ɛntwɛn nnipa mma.

⁸ Na Yakob nkaeɛ no bɛyɛ sɛ kwaeɛ mu mmoa mu gyata, amanaman mu, aman bebree mu, sɛ nnwan akuakuo mu gyataburuwa a ɔsene ba a ɔtiatia soɔ na ɔtete mu a ɔgyefoɔ biara nni hɔ.

⁹Womma wo nsa so, w’ahohiahiafoɔ so, na w’atamfo nyinaa to ntwa.

¹⁰ Na ɛda no, AWURADE asɛm nie, mɛtwa w’apɔnkɔ mafiri wo mu, na masɛe wo nteaseɛnam,

¹¹na matwitwa w’asase so nkuro, na madwiri w’abandenden nyinaa;

¹² na mɛtwitwa wo ntafowayie afiri wo nsam, na woannya akɔmfoɔ bio;

¹³na mɛtwitwa w’ahoni ne w’adum afiri wo mu, na woansɔre wo nsa ano adwuma bio;

¹⁴na mɛtutu w’abosompɔ Asera afiri wo mu, na masɛe wo nkuro;

¹⁵na mede abufuo ne abufuhyeɛ bɛtɔ were, amanaman a wɔantie me no so.