Read New Revised Asante Twi Bible Mika 6 Bible Online

Mika 6 - New Revised Asante Twi Bible bible

Mika 6

¹ Montie deɛ AWURADE ka ɛ: Sɔre na bɔ wo nkuro wɔ mmepɔ anim, na nkokoɔ ntie wo nne.

²Mmepɔ ne mo a mowɔ hɔ daa, asase nnyinasoɔ no, montie AWURADE nkurobɔ, na AWURADE ne ne man anya ɔham, na ɔne Israel bɛyi atɛn.

³ Me man, ɛdeɛn na mayɛ woɔ, na ɛdeɛn na mede ahyɛ wo brɛ? Bua me ɛ!

⁴Na meyii wo firii Misraim asase so bae, na megyee wo firii nkoafie, na mesomaa Mose, Aaron ne Miriam dii w’anim.

⁵ Me man, kae agyina a Moabhene Balak tuiɛ, ne deɛ Beor ba Bileam de buaa no, ɛfiri Sitim kɔduru Gilgal, sɛdeɛ ɛbɛyɛ na woahunu AWURADE nsɛntenenee no.

⁶ Ɛdeɛn na memfa memmra AWURADE anim menkoto ɔsorosoro Nyankopɔn no? Memfa ɔhyeɛ afɔdeɛ memmra n’anim, ne nantwie mma a wɔadi afe afe?

⁷AWURADE ani bɛsɔ adwennini mpem ahodoɔ, ngo sɛ asutene mpem du du? Me mmarato nti memfa m’abakan memma, anaasɛ me yafumma, me kra bɔne nti?

⁸ Wɔaka deɛ ɛyɛ akyerɛ wo, onipa, ne deɛ AWURADE hwehwɛ no wo hɔ, ɛnyɛ biribiara sɛ adeteneneeyɛ ne adɔeɛpɛ ne ahobrɛaseɛ a wode ne wo Nyankopɔn nanteɛ.

⁹AWURADE nne refrɛ kuro no, na wɔn a wɔsuro no no yɛ anyansafoɔ, montie ntea ne deɛ ɔhyɛeɛ no.

¹⁰ Amumuyɛ mu adenya da so wɔ omumuyɛfoɔ fie ne efa a wɔahwan soɔ a wɔadome no?

¹¹Na mɛbu deɛ ɔde nsania bɔne mu anaa fotoɔ a nsisie abrammoɔ wɔ mu no bem anaa?

¹²Nhyɛsoɔ ayɛ emu adefoɔ amaama na emufoɔ ka atorosɛm na wɔn tɛkyerɛma yɛ nnaadaa wɔn anomu.

¹³Na me nso mabɔ wo ama no abɔ wo yadeɛ, wo bɔne nti na masɛe woɔ.

¹⁴Wo deɛ, wobɛdidi na woremmee, na ɛkɔm fitaa bɛde wo; na wobɛtwe wo nnesoa, na woremma no mfiri mu sɔnn; na deɛ woma no firi mu no mpo, mede bɛma afena;

¹⁵ wo deɛ, wobɛgu na worentwa; wobɛkyi ngodua aba, na worensra ngo no, na wobɛkyi nsamono, nanso worennom nsa no.

¹⁶ Ɛfiri sɛ wodi Omri ahyɛdeɛ ne Ahab fie nneyɛɛ nyinaa so, na wonenam wɔn agyinatuo mu, deɛ ɛbɛyɛ na mayɛ wo ahodwirie ne emufoɔ no nso hwerɛmabɔ, na woasoa me man ahohora.