Read New Revised Asante Twi Bible Nahum 1 Bible Online

Nahum 1 - New Revised Asante Twi Bible bible

Nahum 1

¹Elkosini Nahum adehunu nwoma a ɛfa Ninewe atemmuo ho.

² Onyankopɔn yɛ ninkufoɔ, AWURADE ne weretɔfoɔ. Ampa ara, AWURADE tɔ were, na abufuo tumi hyɛ no ma. AWURADE tɔ n’ahohiahiafoɔ so were, na n’abufuo wɔ hɔ ma n’atamfo.

³ AWURADE bo kyɛre fu, na n’ahoɔden so, na ɔremmu fɔdifoɔ bem ara da. AWURADE no, ahum ne kyinhyia mframa mu na ne kwan wɔ, na mununkum yɛ ne nan ase mfuturo.

⁴Ɔteatea ɛpo ma no we, na ɔma nsutene nyinaa mem; Basan ne Karmel twintwam, Lebanon nhwiren nso twintwam;

⁵ mmepɔ woso n’anim, na nkokoɔ hono; asase woso n’anim, aane wiase ne wɔn a ɛte mu nyinaa mpo.

⁶Hwan na ɔbɛgyina n’abohuro anim, na hwan na ɔbɛsɔre atia n’abufuo no? N’anibereɛ hwie sɛ ogya, na abotan bubu n’anim.

⁷ AWURADE yɛ, ɔyɛ dwanekɔbea hiada mu, na ɔnim wɔn a wɔdwane kɔtoa no.

⁸Na n’atamfo deɛ ɔde nsuo a ayiri sram soɔ bɛma wɔn sibea ayera, na wati wɔn akɔduru esum mu.

⁹Atamfoɔ, ɛdeɛn na modwene no AWURADE ho? Ɔbɛwie mo korakora, morensɔre ntia no mprenu.

¹⁰Na sɛ motoatoam sɛ nwerɛ na mo nsaden nso abobo mo mpo a, mobɛhye koraa sɛ nkyɛnkyɛmma dwaneeɛ.

¹¹Ninewe, wo mu na deɛ ɔdwene AWURADE ho bɔne, deɛ ɔtuu agyina huhuo no fire.

¹²Sɛ AWURADE seɛ nie: Sɛ mo ho yɛ den na wɔdɔɔso saa mpo a, wɔbɛtwitwa mo agu na moatwam akɔ. Ao Yuda, sɛ mebrɛɛ wo ase mpo a, afei deɛ meremmrɛ wo ase bio;

¹³na afei mɛbubu Ninewe kɔnnua afiri wo so, na matete wo nkyehoma mu.

¹⁴Na wo Ninewe, AWURADE ahyɛ wo ho mmara sɛ, wo din bɛyera afiri asase so. Mɛtwitwa ohoni a wɔasene ne oguo honi afiri wo nyame fie; mɛbɔ wo damena, ɛfiri sɛ woadane ayɛ atantanneɛ.

¹⁵ Hwɛ, mmepɔ so na asɛmpakafoɔ nan wɔ, wɔreka asomdwoeɛsɛm! Yuda, di wo nnapɔnna, ma w’aboadeɛ, na ohuhuni no remfa wo mu bio, wɔatwa no atwene koraa.