Read New Revised Asante Twi Bible Nahum 2 Bible Online

Nahum 2 - New Revised Asante Twi Bible bible

Nahum 2

¹Ninewe, deɛ ɔbɔ pete no reforo aba wo so. Sra nsraban a emu yɛ den, wɛn ɔkwan, bɔ abɔsoɔ, hyɛ w’ahoɔden mu den yie.

²(Na AWURADE de Yakob kɛseyɛ resane aba sɛ Israel kɛseyɛ; ɔno a afomfafoɔ afom no afa, na wɔasɛe no bobe mman).

³Ne nnɔmmarima kyɛm ho abere, akofoɔ no firafira kɔbene, nteaseɛnam no yɛ dadeɛ gya, ɛda a ɔsiesie dɔm no, na wɔwoso pea nnua;

⁴nteaseɛnam bɔ dam mmɔntene so, ɛminiminam mprama so; ɛho te sɛ tɛnee, ɛnenam sɛ anyinam.

⁵Ɔfrɛfrɛ n’akofoɔ atitire, wɔsuntisunti wɔn nanteɛ mu; wɔde ahoɔherɛ kɔ ɔfasuo no so, na wɔde osuhyɛ si hɔ,

⁶nanso wɔabue nsubɔntene no ano aponkɛseɛ no, na ahodwirie aba ahemfie.

⁷Na wɔahyɛ no saa, wɔapa Ninewe ho, wɔafa no kɔ, na ne mmaawa si apini sɛdeɛ mmuruburo pempem wɔn kokoɔ.

⁸Na Ninewe te sɛ ɔtadeɛ firi ne tete nna mu; na wɔn de ɛ, wɔdwane. Monnyina, monnyina! Na obiara nnane n’ani.

⁹Momfom dwetɛ, momfom sika! Na ahonyadeɛ no nni awieeɛ, nnwinneɛ afɛfɛ ahodoɔ nyinaa dodoɔ yɛ duru.

¹⁰ Hwɛ, Ninewe sɛdeɛ woada mpan, woayɛ hunu na woadane amamfo, na w’akoma ahodwo na wo nankoroma hinhim, w’asene mu nyinaa yɛ wo ya, ne sɛdeɛ w’anim asiam fitaa.

¹¹Ɛhe na gyata tenabea no wɔ ne gyataburuwa adidibea a anka ɛwɔ hɔ no, deɛ gyatanini ne gyatabereɛ ne gyata ba nenam hɔ a obi nni hɔ a oyi wɔn hu no?

¹²Gyata tetee mu maa ne mma na ɔmia maa n’abereɛ, na ɔde nteteeɛ hyɛɛ n’atu mu amaama, na ɔde deɛ ɔtetee mu no hyehyɛɛ ne tenabea.

¹³Hwɛ, me ne wo anya, asafo AWURADE asɛm nie, na mɛma ne nteaseɛnam ahye wisie mu, na afena bɛdi w’agyataburuwa no; na mɛtwa wo fom adeɛ no afiri asase so, na wɔrente w’abɔfoɔ no nne bio.