Read New Revised Asante Twi Bible Habakuk 1 Bible Online

Habakuk 1 - New Revised Asante Twi Bible bible

Habakuk 1

¹Yeinom ne nsɛm a AWURADE yi kyerɛɛ Odiyifoɔ Habakuk:

²O AWURADE, menteam nkɔsi da bɛn ara na wobɛtie me? Nhyɛsoɔ nti mesu mefrɛ wo, nanso wonnye me.

³Adɛn nti na woma mehunu abusudeɛ ne ɔhaw sɛɛ, na wonyɛ ho hwee yi? Ɔsɛeɛ ne nhyɛsoɔ da m’anim, na ɔhaw ba, na akasaakasa asɔre.

⁴Enti mmara mu ago, na atɛntenenee mfiri ara da, ɛfiri sɛ abɔnefoɔ twa ɔteneneeni ho hyia, enti atemmuo firi a, na akyea.

⁵ Monhwɛ amanaman mu na monhunu na mo ho nnwiri mo dwiri pa ara, na mereyɛ adwuma bi, mo nna mu, wɔka kyerɛ mo a, morennye nni.

⁶Na hwɛ, merehwanyan Kaldeafoɔ, ɔman a wɔn tirim yɛ den na wɔn ho yɛ hare a wɔnante fa asase so nyinaa fa tenabea a ɛnyɛ wɔn dea di soɔ.

⁷Wɔn ho yɛ ahomete ne hu, wɔyɛ ahantanfoɔ a wɔyɛ deɛ wɔn ara wɔpɛ.

⁸ Wɔn apɔnkɔ ho yɛ hare sene asebɔ, na wɔyɛ aniɛden sene anwummerɛ mpataku, na wɔn apɔnkɔsotefoɔ twetwe wɔn mu kɔ kan, na wɔn apɔnkɔsotefoɔ firi akyirikyiri reba, wɔtu sɛ ɔkɔdeɛ a ɔrepɛ adidie ho ntɛm.

⁹Wɔn nyinaa reba aturuturasɛmdie, na wɔde wɔn ani kyerɛ apueeɛ fam anibereɛ so, na wɔtase nnommum sɛ anwea.

¹⁰Wɔn deɛ, wɔsi ahemfo atwetweɛ na aberempɔn ho yɛ wɔn sere, wɔsere aban a ɛyɛ den nyinaa, na wɔboa dɔteɛ ano gu hɔ na wɔafa.

¹¹Ɛno na wɔtwam sɛ mframa, na wɔsene korɔ, na wɔkɔdi so; wɔn ahoɔden yi ara ne wɔn nyame.

¹² AWURADE, me Nyankopɔn ne me Kronkronni, ɛnyɛ wo na wofiri tete nteredee? AWURADE, wo ne ɔbotantim; yɛrenwu na mmom wo ara na woahyɛ Kaldeafoɔ sɛ wɔmmu yɛn atɛn na yɛn asotwe nti na wode wɔn asi hɔ.

¹³Wo a w’aniwa yɛ kronkron a wontumi nhwɛ bɔne na wontumi nhwɛ ɔhaw, adɛn nti na wohwɛ nkɔnkɔnsafoɔ, na ɔbɔnefoɔ mene ɔteneneeni a ɔtene sene no a, woyɛ komm?

¹⁴Afei nso, woayɛ nnipa sɛ ɛpo mu mpataa, te sɛ mmoa a wɔwea a obi nni wɔn soɔ.

¹⁵Saa nti wɔde darewa atwe wɔn nyinaa, wɔde asau twe wɔn, na wɔboa wɔn ano, ne twiɛ mu; yei nti wɔn ani gye na wɔn ho sɛpɛ wɔn.

¹⁶Ne saa nti, abɔnefoɔ bɔ n’asau no afɔdeɛ na ɔhye aduhwam ma wɔn twiɛ no, ɛfiri sɛ ɛno na ɛma ne kyɛfa dɔre sradeɛ, na n’aduane yɛ sɔɔsɔɔ.

¹⁷Ɛno nti ɔnkɔ so ara mpore n’asau mu, na ɔnkunkum amanaman daa nyinaa atirimuɔden so?