Read New Revised Asante Twi Bible Habakuk 3 Bible Online

Habakuk 3 - New Revised Asante Twi Bible bible

Habakuk 3

¹Odiyifoɔ Habakuk mpaebɔ wɔ Shigionot[1] so.

²AWURADE, mate wo nka, masuro; O AWURADE, kanyan w’adwuma no wɔ yɛn berɛ yi mu; ɛberɛ yi mu na ma wɔnhunu; w’abufuhyeɛ mu kae mmɔborɔhunu.

³ Onyankopɔn firi Teman ba, na ɔkronkronni no firi Paran bepɔ so. Sela N’animuonyam kata ɔsoro, na n’ayeyie yɛ asase so ma.

⁴Ne hyerɛn te sɛ owia hann, nsesaeɛ wowɔ ne ho, na ɛhɔ ne n’ahoɔden ahuntaeɛ.

⁵Ɔyaredɔm a ɛpra di n’anim, na yadeɛ a ɛhyehyeɛ firi di ne nan ase.

⁶ Ɔgyina hɔ na ɔwoso asase, ɔhwɛ, na ɔma amanaman ho popo; daa mmepɔ dwiri, tete nkokoɔ brɛ ase, n’akwan te sɛ tete deɛ no.

⁷Mehunuu Kusan ntomadan wɔ ahohiahia mu; Midian asase so kuntudan no popoe.

⁸Nsubɔntene so na na w’abufuo redɛreɛ, AWURADE? Ɛpo na wo bo huru tiaa no, berɛ a na wote w’apɔnkɔ so, wo nkwagyeɛ nteaseɛnam so reba no?

⁹Woayɛ wo tadua krado; na woaka ntam wɔ w’agyan no toɔ ho. Sela Wopaapae asase mu yɛ no nsubɔntene.

¹⁰ Mmepɔ hu wo a wɔhinhim; nsuo a ɛtue reba; ebunu donkodonko ma ne nne so, ɛma ne nsa so kɔ soro;

¹¹ owia ne ɔsrane gyinagyinaa efie, w’agyan a ɛnenam no hann nti, wo pea anyinam pa hyerɛn no nti.

¹²Abohuro mu na wonam fa asase soɔ, abufuo mu na woposa amanaman.

¹³ Wofirii adi sɛ worebɛgye wo man, worebɛgye deɛ wɔasra no no; wobobɔɔ ɔbɔnefoɔ ti, womaa ne ho daa hɔ firi n’atifi de kɔsii ne nan ase. Sela

¹⁴Wode mpɛmɛ hwire n’akofoɔ tirim, wɔtu sɛ ahum ba sɛ wɔrebɛbɔ me apete, wɔn anigyeɛ ne sɛ wɔbɛmene mmɔborɔni ahuntaeɛ mu.

¹⁵Wode wo apɔnkɔ si po mu, nsuo pii a ɛhuro no mu.

¹⁶Metee na me yafunum popoe, m’ano saa biribiri, ɛnne no ho; ɔporɔ hyɛnee me nnompe mu, na m’ase popoe, nanso meretena ase komm atwɛn ahohiahia da no na mahwɛ deɛ ɔbɛyɛ ɔman a wɔbɛtoaa yɛn no.

¹⁷Na borɔdɔma rengu nhyerɛne, na aba biara nni abobe so; na ngodua soɔ di hwammɔ, na mfuo mma aduane, na nnwan to twa firi ban mu, na nantwie biara nni adan mu mpo a,

¹⁸ me deɛ AWURADE mu na mɛdi ahurisie, na me ho bɛsɛpɛ me wɔ nkwagyeɛ Nyankopɔn mu.

¹⁹ ONYANKOPƆN, Awurade no, ne m’ahoɔden; na ɔma me nan yɛ sɛ aforoteɛ deɛ, na ɔma menante me sorɔnsorɔmmea. Wɔmfa mma dwonkyerɛni na wɔnto no m’asankuo so.