Read New Revised Asante Twi Bible Sefania 2 Bible Online

Sefania 2 - New Revised Asante Twi Bible bible

Sefania 2

¹Monka mo ho mmoa ano, aane, monka mmoa ano, ɔman a mo ani nwu asɛm!

²Mommma ɔsɛeɛ da no mmma ansa, da no resene aba sɛ ntɛtɛ, mommma AWURADE abufuhyeɛ no mmma mo so ansa, aane, mommma AWURADE abufuo da no mmma mo so ansa.

³Monhwehwɛ AWURADE, asase sofoɔ a mobrɛ mo ho aseɛ nyinaa a moyɛ n’atemmudeɛ! Monhwehwɛ tenenee, monhwehwɛ ahobrɛaseɛ. Ebia wɔbɛkora mo, AWURADE abufuo da no.

⁴Na Gasa bɛyɛ kuro a wɔagya, na Askelon ayɛ akurofo; Asdod deɛ, wɔbɛtu wɔn awia ketee, na Ekron ase nso, wɔbɛtutu.

⁵ Monnue, mpoanofoɔ, Keretifoɔ man! AWURADE asɛm da mo so, Kanaan a ɛyɛ Filistifoɔ asase. Mɛma wɔasɛe wo, na anka wo mufoɔ biara.

⁶Na mpoano asase bɛdane adidibea a nnwanhwɛfoɔ funi mu na nnwammuo sisi hɔ,

⁷ na ayɛ Yuda fie nkaeɛ asase a wɔyɛne so mmoa, Askelon afie mu na wɔbɛbutubutu anwummerɛ, na AWURADE wɔn Nyankopɔn bɛhwɛ wɔn, na ɔde wɔn nnommumfa asane aba.

⁸ Mate Moab nsopa ne Amon mma yea a wɔde asopa me man na wɔama wɔn ho so atia wɔn hyeɛ no.

⁹ Enti, sɛ mete aseɛ yi, asafo AWURADE, Israel Nyankopɔn asɛm nie, ampa, Moab bɛdane sɛ Sodom, na Amon mma ayɛ sɛ Gomora, nsansono sisibea ne nkyene amena ne daapem amamfo; me man nkaeɛ bɛfom wɔn afa, na me nkurɔfoɔ a wɔbɛka soɔ no adi wɔn so.

¹⁰Wɔn ahantan nti na yei bɛyɛ wɔn, ɛfiri sɛ wɔasopa na wɔama wɔn ho so atia asafo AWURADE man no.

¹¹AWURADE ho bɛyɛ wɔn hu, ɛfiri sɛ ɔbɛma asase so anyame nyinaa ayera; na aman no mu biara bɛfiri ne tenabea aba, nsuano aman nyinaa, na wɔabɛsɔre no.

¹² Mo, Etiopiafoɔ, nso, m’afena ano na mobɛtotɔ.

¹³ Na ɔbɛtene ne nsa akyerɛ atifi fam, na wasɛe Asiria, na wadane Ninewe amamfo, na awo pɛsɛɛ sɛ anwea pradada so,

¹⁴ na mmoakuo abutubutu mu, mmoadoma nyinaa; nantwinoma ne apɛsɛ nso bɛtena n’adum no so; wɔte nnomaa su mpomma mu, ewira dodoɔ gugu aponnwa ase, na wama ne ntweneduro no ho ada hɔ.

¹⁵ Yei ne kuro a ɛdi ahurisie a ɛte hɔ anibiannasoɔ soɔ, na ɛse no n’akoma mu sɛ: Me ara na obi nni m’akyiri bio. Hwɛ sɛdeɛ wasi adane amamfo, mmoa abutuiɛ! Obiara a ɔnam ho twam no bɛbɔ hwerɛma na wawoso ne tiri.