Read New Revised Asante Twi Bible Malaki 1 Bible Online

Malaki 1 - New Revised Asante Twi Bible bible

Malaki 1

¹AWURADE atemmusɛm a ɔnam Malaki so de brɛɛ Israel nie.

² Madɔ mo, AWURADE na ɔseɛ. Na mobisa sɛ: Wode deɛn na adɔ yɛn? Esau nyɛ Yakob nua? AWURADE asɛm nie; nanso medɔɔ Yakob,

³ na metanee Esau, na mayɛ ne mmepɔ no afo, ne n’agyapadeɛ nso ayɛ anwea pradada sɛ ɛserɛ so kraman adeɛ.

⁴Sɛ Edom ka sɛ: Wɔapɛkyɛ yɛn, nanso yɛbɛsane akɔ akɔsisi agoago no a, sɛ asafo AWURADE seɛ nie: Wɔn deɛ, wɔbɛsisi, na me nso, mɛdwiri, na wɔafrɛ wɔn sɛ: Abɔnefosɛm hyeɛ, ne: Ɔman a AWURADE afa wɔn abufuo de rekɔsi daa.

⁵Na mo ani bɛhunu, na mo deɛ, mobɛka sɛ: AWURADE kɛseyɛ tra Israel hyeɛ no so.

⁶ Ɔba di n’agya ni, na akoa di ne wura ni. Na sɛ agya ne me a, m’anidie wɔ he? Na sɛ owura ne me a, me suro wɔ he? Asafo AWURADE na ɔreka akyerɛ mo, asɔfoɔ a mobu me din animtia. Na mobisa sɛ: Ɛdeɛn mu na yɛbu wo din animtia?

⁷Mode paanoo a ɛho akum brɛ me m’afɔrebukyia so. Na moka sɛ: Ɛdeɛn na yɛde kum wo ho? Sɛ mosusu sɛ: AWURADE pono no yɛ adeɛ a wɔtumi bu no animtia.

⁸ Na sɛ mode aboa anifirani bi ba bɛbɔ afɔdeɛ a, ɛnyɛ bɔne anaa? Na sɛ mode apakye anaa ɔyarefoɔ bi ba a, ɛnyɛ bɔne anaa? Fa kɔma w’amrado; na hwɛ sɛ n’ani bɛsɔ wo, anaasɛ ɔbɛhwɛ w’anim anaa? Asafo AWURADE na ɔseɛ.

⁹Wiɛ, monkoto nsrɛ Nyankopɔn, na ɔmmɛdom yɛn ɛ. Na sɛ mo nsam na ɛno firiiɛ a, ɛbɛyɛ dɛn na mo nti ɔbɛhwɛ obi anim? Asafo AWURADE na ɔseɛ.

¹⁰ Anka ɛyɛ sɛ mo mu bi kɔtoto apono mu nso, na moansɔ m’afɔrebukyia so gya kwa! m’ani nsɔ mo hwee, asafo AWURADE na ɔseɛ, na mo nsam ayɛyɛdeɛ nyɛ me fɛ.

¹¹ Na ɛfiri owiapueeɛ de kɔsi n’atɔeɛ no me din yɛ kɛseɛ amanaman mu, na wɔhye aduhwam bɔ afɔdeɛ ma me din mmaa nyinaa, na wɔde ayɛyɛdeɛ a ɛho teɛ ba; na me din yɛ kɛseɛ amanaman mu, asafo AWURADE na ɔseɛ.

¹²Nanso mogu ho fi, sɛ moka sɛ: AWURADE pono no, wɔakum ho, ne ɛso adeɛ, n’aduane no nso yɛ adeɛ a wɔtumi bu no animtia.

¹³Nso moka sɛ: Hwɛ, ɔbrɛ bɛn nie! Na mopeepee, asafo AWURADE na ɔseɛ, na mode fomfa adeɛ ne aboa apakye ne ɔyarefoɔ ba, na mode bɛyɛ ayɛyɛdeɛ; mɛgye no mo nsam ama no ayɛ me fɛ anaa? AWURADE na ɔseɛ.

¹⁴ Nnome nka deɛ ɔsisie, ɔde onini a ɔwɔ ne nnwankuo mu hyɛ bɔ, nanso ɔde deɛ watɔ ape bɔ AWURADE afɔdeɛ no; ɛfiri sɛ ɔhenkɛseɛ ne me, asafo AWURADE na ɔseɛ, na me din ho yɛ hu, amanaman mu.