Read New Revised Asante Twi Bible Mateo 20 Bible Online

Mateo 20 - New Revised Asante Twi Bible bible

Mateo 20

¹ Na ɔsoro ahennie te sɛ onipa bi a ɔyɛ afuowura a ɔfirii adi anɔpatutuutu sɛ ɔrekɔbɔ adwumayɛfoɔ paa akɔ ne turo mu.

²Na ɔne adwumayɛfoɔ no dii ano sɛ da koro denare baako no, ɔmaa wɔkɔɔ ne bobe turo mu.

³Na ɔfirii adi bɛyɛ anɔpa nnɔnkron kɔhunuu afoforɔ sɛ wɔgyinagyina dwa ase kwa.

⁴Na ɔsee wɔn nso sɛ: Mo nso monkɔ me bobe turo mu, na akatua a ɛyɛ no na mede bɛma mo.

⁵Na wɔkɔeɛ. Bio, ɛbɛyɛ awia dummienu ne nnɔn mmiɛnsa no, ɔfiri adi kɔyɛɛ saa ara.

⁶Na ɛbɛyɛ anwummerɛ nnɔnnum mu no, ɔfirii adi kɔhunuu afoforɔ sɛ wɔgyinagyina hɔ kwa, na ɔsee wɔn sɛ: Adɛn nti na mogyinagyina ha kwa adekyeeɛ nyinaa yi?

⁷Wɔka kyerɛɛ no sɛ: Obiara mmɔɔ yɛn paa. Ɔsee wɔn sɛ: Mo nso monkɔ bobe turo mu hɔ!

⁸Na ɛduruu anwummerɛ no, bobe turo no wura no ka kyerɛɛ ne hwɛsoni sɛ: Frɛ adwumayɛfoɔ no, na ma wɔn wɔn apaadeɛ firi wɔn a wɔdi akyire so kɔsi wɔn a wɔdi kan so.

⁹Na wɔn a wɔfaa wɔn bɛyɛ anwummerɛ nnɔnnum baeɛ no, wɔn nyinaa nyaa denare denare.

¹⁰Na adikanfoɔ no baeɛ no, wɔsusuu sɛ wɔbɛnya deɛ ɛkyɛne saa; na wɔn nso nyaa denare denare.

¹¹Na ɛkaa wɔn nsa no, wɔnwiinwii afuowura no so

¹²sɛ: Akyikafoɔ yi deɛ, dɔnhwere baako pɛ na wɔyɛɛ adwuma, na woama wɔn ne yɛn a yɛfiri anɔpa ayɛ adwuma na owia ahye yɛn no pɛ.

¹³Na ɔbua see wɔn mu baako sɛ: Awɛ, menyɛɛ wo bɔne; wo ne me anni ano denare anaa?

¹⁴Fa wo deɛ na kɔ! Menni kwan sɛ mema deɛ ɔbaa akyire yi sɛ wo,

¹⁵ anaasɛ menni ho kwan sɛ mede me ara m’adeɛ meyɛ deɛ mepɛ anaa? Sɛ me yam yɛ nti na w’ani abere yi?

¹⁶ Saa na akyikafoɔ bɛdi kan, na adikanfoɔ adi akyire; (na wɔafrɛ bebree nanso kakraa bi na wɔayi wɔn.)[15]

¹⁷Na Yesu reforo akɔ Yerusalem no, ɔfaa dummienu no nko ara kɔɔ nkyɛn, ɔkwan no mu, ka kyerɛɛ wɔn sɛ:

¹⁸ Hwɛ, yɛreforo akɔ Yerusalem, na wɔbɛyi Onipa Ba no ahyɛ asɔfoɔ mpanimfoɔ ne Atwerɛfoɔ nsa, na wɔabu no kumfɔ,

¹⁹na wɔde no ahyɛ amanaman mufoɔ nsa sɛ wɔngoro ne ho, na wɔnka no mpire na wɔmmɔ no asɛnnua mu, na da a ɛtɔ so nnansa no ɔbɛnyane bio.

²⁰ Ɛnna Sebedeo mma no na, ne ne mma baa ne nkyɛn bɛkotoo no, na ɔsrɛɛ ne hɔ biribi.

²¹ Na Yesu bisaa no sɛ: Ɛdeɛn na wopɛ? Ɔbua see no sɛ: Ka ma me mma mmienu yi mu baako ntena wo nifa, na ɔbaako nso ntena wo benkum w’ahennie no mu.

²² Na Yesu buaa sɛ: Monnim deɛ morebisa. Mobɛtumi anom kuruwa a merebɛnom no anaa? (Anaasɛ, mobɛtumi ama wɔde asubɔ a wɔde rebɛbɔ me no abɔ mo anaa?)[16] Wɔsee no sɛ: Yɛbɛtumi.

²³Na ɔsee wɔn sɛ: Me kuruwa deɛ mobɛnom, (na m’asubɔ nso mobɛnya,)[17] na me nifa ne me benkum tena deɛ, ɛnyɛ me dea sɛ mede bɛma, na wɔde bɛma wɔn a m’agya asiesie ama wɔn.

²⁴ Na edu no teeɛ no, anuanom baanu no asɛm no anyɛ wɔn abodwoɔ.

²⁵Na Yesu frɛɛ wɔn bae, na ɔkaa sɛ: Monim sɛ wiase amanaman ahemfo di wɔn so sɛ awuranom, na wɔn mu akɛseɛ no di wɔn so tumi.

²⁶ Na ɛnte saa mo mu; na mmom obiara a ɔpɛ sɛ ɔyɛ kɛseɛ mo mu no, ɔnyɛ mo somfoɔ,

²⁷ na obiara a ɔpɛ sɛ ɔdi kan mo mu no, ɔnyɛ mo akoa,

²⁸ sɛdeɛ Onipa Ba no amma sɛ wɔnsom no, na mmom ɔbɛsomee, na ɔde ne nkwa bɛyɛɛ agyedeɛ maa nnipa pii ne no.

²⁹Na wɔfiri Yeriko rekorɔ no, nkurɔfokuo pii dii n’akyi.

³⁰Na hwɛ, anifirafoɔ mmienu a wɔtete kwankyɛn tee sɛ Yesu retwam no, wɔteateaa mu sɛ: Hu yɛn mmɔbɔ, Awurade, Dawid ba!

³¹Na nkurɔfokuo no kaa wɔn anim sɛ wɔmmua wɔn ano. Ɛno mmom ma wɔteateaa mu denden sɛ: Hu yɛn mmɔbɔ, Awurade, Dawid ba!

³²Na Yesu gyina frɛɛ wɔn sɛ: Ɛdeɛn na mopɛ sɛ meyɛ ma mo?

³³Wɔsee no sɛ: Awurade, ma yɛn ani mmue!

³⁴Na Yesu hunuu wɔn mmɔbɔ, na ɔde ne nsa kaa wɔn ani; na ntɛm ara wɔhunuu adeɛ, na wɔdii n’akyi.