Read New Revised Asante Twi Bible Marko 11 Bible Online

Marko 11 - New Revised Asante Twi Bible bible

Marko 11

¹Na wɔbɛnn Yerusalem, Betfage ne Betania a ɛwɔ Ngo Bepɔ ho no, ɔsomaa n’asuafoɔ no mu baanu,

²na ɔsee wɔn sɛ: Monkɔ akuraa a ɛda mo anim no ase. Na moduru hɔ pɛ a, mobɛhunu afunumu ba bi a wɔasa no homa a onipa biara ntenaa ne so da. Monsane no mfa no mmra.

³ Na sɛ obi bisa mo sɛ: Adɛn na moreyɛ yei a, monka sɛ: Ne ho hia Awurade; na ntɛm ara ɔbɛma mode no aba ha.

⁴Na wɔkɔ kɔhunuu afunumu ba no sɛ ɔsa ɛpono ano wɔ mfikyire, abɔntene, na wɔsanee no.

⁵Na wɔn a wɔgyina hɔ no mu bi see wɔn sɛ: Moresane afunumu ba no ayɛ deɛn?

⁶Na asuafoɔ no buaa wɔn sɛdeɛ Yesu kaeɛ no, na wɔmaa wɔn kwan.

⁷Na wɔde afunumu ba no brɛɛ Yesu, na wɔde wɔn ntoma guu ne so; na ɔtenaa ne so.

⁸Na nnipa bebree de wɔn ntoma sesɛɛ ɔkwan no so, na ebinom twitwaa nnua mman firi mfuo mu de sesɛɛ ɔkwan no so.

⁹ Na wɔn a wɔdi anim ne wɔn a wɔdi akyire teaa mu sɛ: Hosiana! Nhyira ne deɛ ɔnam Awurade din mu reba.

¹⁰Nhyira ne yɛn agya Dawid ahennie a ɛreba no! Hosiana wɔ sorosoro!

¹¹Na ɔhyɛnee Yerusalem kɔɔ asɔrefie. Na ɔhwɛɛ nnoɔma nyinaa, na adeɛ reyɛ asa no, ɔne dummienu no firi kɔɔ Betania.

¹²Na adeɛ kyeeɛ a wɔfiri Betania reba no, ɛkɔm dee no.

¹³Na ɔhunuu borɔdɔma bi wɔ akyiri sɛ ahahan wɔ soɔ no, ɔkɔɔ hɔ sɛ ebia ɔbɛhunu biribi wɔ so anaa? Na ɔduruu ho no, wanhunu hwee sɛ ahahan nko ara; ɛfiri sɛ na borɔdɔma berɛ nnuruiɛ.

¹⁴ Na ɔkasa kyerɛɛ borɔdɔma no sɛ: Obiara renni wo so aba bio da! Na asuafoɔ no teeɛ.

¹⁵Na wɔduruu Yerusalem. Na ɔkɔhyɛnee asɔrefie no mu no, ɔfitii aseɛ pamm wɔn a wɔtɔn ne wɔn a wɔtɔ adeɛ asɔrefie hɔ; na ɔbutuu sikasesafoɔ apono ne wɔn a wɔtɔn mmorɔnoma nkonnwa,

¹⁶na wamma kwan amma obiara ansoa adeɛ amfa asɔrefie hɔ.

¹⁷ Na ɔkyerɛkyerɛe, see wɔn sɛ: Wɔntwerɛɛ sɛ: Wɔbɛfrɛ me fie asɔrefie ama amanaman nyinaa? Na mo deɛ, mode ayɛ adwotwafoɔ bɔn.

¹⁸Na asɔfoɔ mpanimfoɔ ne Atwerɛfoɔ no teeɛ, na wɔhwehwɛɛ sɛdeɛ wɔbɛkum no; nso na wɔsuro no, ɛfiri sɛ na ne nkyerɛkyerɛ yɛ nkurɔfokuo no nyinaa nwanwa.

¹⁹Na adeɛ saeɛ no, ɔfirii kurom hɔ.

²⁰ Na anɔpatutu a wɔretwam no, wɔhunuu sɛ borɔdɔma no awu firi ne nhini ase.

²¹Na Petro kaee, see no sɛ: Rabi, hwɛ borɔdɔma a wodomee no no awu!

²²Na Yesu bua see wɔn sɛ: Monnya Nyankopɔn mu gyidie!

²³ Na nokorɛ mese mo sɛ, obiara a ɔbɛse bepɔ yi sɛ: Ma wo ho so kɔhwe ɛpo mu, na ɔnnye akyinnyeɛ wɔ n’akoma mu, na ɔbɛgye adi sɛ deɛ ɔreka no bɛba mu no, ɛbɛyɛ hɔ ama no.

²⁴ Yei nti, mese mo sɛ: Adeɛ biara a mobɛsrɛ mo mpaebɔ mu no, monnye nni sɛ mobɛnya, na ɛbɛyɛ hɔ ama mo.

²⁵ Na sɛ mogyina hɔ rebɔ mpaeɛ, na mowɔ biribi tia obi a, momfa nkyɛ no, na mo Agya a ɔwɔ soro no nso de mo mfomsoɔ akyɛ mo.

²⁶ [Na sɛ moamfa ankyɛ a, mo agya a ɔwɔ soro no remfa mo mfomsoɔ nkyɛ mo.][7]

²⁷Na wɔbaa Yerusalem bio. Na ɔnenam asɔrefie no, asɔfoɔ mpanin ne Atwerɛfoɔ ne mpanimfoɔ no baa ne nkyɛn,

²⁸na wɔbisaa no sɛ: Tumi bɛn na wode yɛ nnoɔma yi? Anaasɛ hwan na ɔmaa wo tumi sɛ yɛ yeinom?

²⁹Na Yesu see wɔn sɛ: Mɛbisa mo asɛm baako, na mommua me, na mɛkyerɛ mo tumi ko a mede meyɛ yeinom:

³⁰Yohane asubɔ no, ɛfiri soro anaasɛ ɛfiri nnipa? Mommua me!

³¹Na wɔdwendwenee kekaa wɔn mu sɛ: Sɛ yɛka sɛ ɛfiri soro a, ɔbɛka sɛ: Ɛnneɛ ɛdeɛn nti na moannye no annie?

³²Anaasɛ yɛnka sɛ: Ɛfiri nnipa? Na wɔsuro nkurɔfokuo no, ɛfiri sɛ na nnipa nyinaa bu Yohane sɛ ɔyɛ odiyifoɔ ampa.

³³Na wɔbua see Yesu sɛ: Yɛnnim. Na Yesu se: Me nso merenka tumi ko a mede meyɛ yeinom menkyerɛ mo.