Read New Revised Asante Twi Bible Marko 14 Bible Online

Marko 14 - New Revised Asante Twi Bible bible

Marko 14

¹Na aka nnanu na Twam ne Apiti afahyɛ aduro no, asɔfoɔ mpanimfoɔ ne Atwerɛfoɔ no hwehwɛɛ sɛdeɛ wɔbɛyɛ akye no nyansa mu, na wɔakum no.

²Na wɔkaa sɛ: Ɛnyɛ afahyɛ no mu, na basabasa amma ɔman no mu.

³Na ɔwɔ Betania, Simon kwatani no fie. Na ɔtenaa ɛpono ho no, ɔbaa bi a ɔkura sradehwam toa, a ngo hwamhwam a ne boɔ yɛ den wɔ mu bae, na ɔbɔɔ toa no hwie guu n’apampam.

⁴Na ebinom wɔ hɔ a anyɛ wɔn abodwoɔ wɔ wɔn mu, na wɔkekaa sɛ: Adɛn nti na wɔsɛee ngo hwamhwam yi?

⁵Anka wɔbɛtumi atɔn ngo hwamhwam yi agye bɛboro denare ahasa, na wɔde ama ahiafoɔ. Na wɔnwiinwii tiaa no.

⁶Na Yesu kaa sɛ: Monnyaa no! Adɛn na moreha no? Wayɛ me ho adwuma pa.

⁷ Na mowɔ ahiafoɔ mo nkyɛn daa, na da biara a mopɛ no, motumi yɛ wɔn yie; na me deɛ monni me daa.

⁸Wayɛ deɛ ɔbɛtumi; wadi kan asra me nipadua ama me sie da.

⁹Nokorɛ mese mo sɛ, wiase baabiara a wɔbɛka asɛmpa yi no, deɛ ɔbaa yi ayɛ yi nso wɔbɛka de ayɛ no nkaeɛ.

¹⁰Na Yuda Iskariot, dummienu no mu baako, sii mu kɔɔ asɔfoɔ mpanimfoɔ no nkyɛn sɛ ɔbɛyi Yesu ama wɔn.

¹¹Na wɔteeɛ no, ɛyɛɛ wɔn anigyeɛ, na wɔhyɛɛ no bɔ sɛ wɔbɛma no sika bi, na ɔhwehwɛɛ sɛdeɛ ɔbɛnya kwan ayi no ama, ɛberɛ a ɛsɛ mu.

¹²Na Apiti da a ɛdi kan a wɔkum Twam dwan no, n’asuafoɔ no bisaa no sɛ: Ɛhefa na wopɛ sɛ yɛkɔsiesie ma wokɔdi Twam no?

¹³Na ɔsomaa n’asuafoɔ no mu baanu, na ɔsee wɔn sɛ: Monkɔ kuro no mu. Na onipa bi a ɔso ahina bɛhyia mo; monni n’akyi,

¹⁴ na faako a ɔbɛhyɛne no, monse efiewura no sɛ: Kyerɛkyerɛfoɔ no se: Ɛhefa na ahɔhodan a mene m’asuafoɔ bɛdi mu Twam no wɔ?

¹⁵Na ɔno ara bɛkyerɛ mo abansoro asa kɛseɛ bi a wɔahyehyɛ mu, na wɔasiesie mu; ɛhɔ na monsiesie Twam no mma yɛn.

¹⁶Na asuafoɔ no sii mu kɔe, na wɔduruu kuro no mu no, wɔhunuu sɛdeɛ ɔka kyerɛɛ wɔn no, na wɔsiesiee Twam no.

¹⁷Na ɛduruu anwummerɛ no, ɔne dummienu no baeɛ.

¹⁸Na wɔte hɔ redidie no, Yesu kaa sɛ: Nokorɛ mese mo sɛ, mo a mone me redidie yi mu baako bɛyi me ama.

¹⁹Na wɔn werɛ hoe, na wɔfitii aseɛ bisabisaa no mmaako mmaako sɛ: Ɛyɛ me?

²⁰Na ɔsee wɔn sɛ: Ɛyɛ dummienu no mu baako a ɔne me to nsa ayowa mu no a.

²¹Onipa ba no rekɔ sɛdeɛ wɔatwerɛ ne ho deɛ, nanso onipa a ɔbɛyi Onipa Ba no ama no, nnue! Sɛ wɔanwo saa onipa no a, anka ɛyɛ ma no.

²² Na wɔredidie no, Yesu faa paanoo hyiraa so bubui, na ɔde maa wɔn kaa sɛ: Monnye. Yei ne me honam!

²³Na ɔfaa kuruwa no daa ase de maa wɔn, na wɔn nyinaa nomm bi.

²⁴Na ɔsee wɔn sɛ: Yei ne me mogya a ɛyɛ apam foforɔ no mogya a nnipa bebree nti wɔrehwie aguo.

²⁵Nokorɛ mese mo sɛ, merennom bobe aba no bi bio de bɛkɔ akɔsi da a mɛnom no foforɔ Nyankopɔn ahennie no mu.

²⁶Na wɔtoo dwom no, wɔfirii adi kɔɔ Ngo Bepɔ no so.

²⁷ Ɛnna Yesu see wɔn sɛ: Mo nyinaa ɛbɛyɛ mo suntidua; ɛfiri sɛ, wɔatwerɛ sɛ: Mɛbɔ odwanhwɛfoɔ no, na nnwan no abɔ apete.

²⁸ Na me wusɔreɛ akyiri no, mɛdi mo anim makɔ Galilea.

²⁹Na Petro see no sɛ: Sɛ ɛbɛyɛ wɔn nyinaa suntidua mpo a, me deɛ, ɛrenyɛ me suntidua.

³⁰ Na Yesu see no sɛ: Nokorɛ mese wo sɛ, ɛnnɛ anadwo yi, akokɔ remmɔn mprenu, na woapa me mprɛnsa.

³¹Na ɔno deɛ, ɔkasaa anibereɛ so sɛ: Sɛ ɛsɛ sɛ me ne wo wuo mpo a, merempa wo da! Na saa ara na wɔn nyinaa nso kaeɛ.

³² Na wɔduruu baabi a wɔfrɛ hɔ Getsemane, na ɔsee n’asuafoɔ no sɛ: Montena ha, na menkɔbɔ mpaeɛ ansa.

³³Na ɔfaa Petro ne Yakobo ne Yohane kaa ne ho, na ne ho firii aseɛ hiahiaa no, na ne ho yeraa no.

³⁴ Na ɔsee wɔn sɛ: Awerɛhoɔ ahyɛ me kra so de kɔ owuo mu; montena ha, na monwɛn!

³⁵Na ɔkɔɔ n’anim kakra kɔbutuu fam, na ɔbɔɔ mpaeɛ sɛ, sɛ ɛbɛtumi a, dɔn no nsiane ne ho nkɔ.

³⁶ Na ɔkaa sɛ: Aba, Agya! Wotumi nnoɔma nyinaa yɛ; yi kuruwa yi firi me so kɔ! Nanso ɛnyɛ deɛ mepɛ, na deɛ wopɛ.

³⁷Na ɔba bɛhunuu wɔn sɛ wɔada, na ɔsee Petro sɛ: Simon, woada? Woantumi anwɛn dɔnhwereɛ baako mpo?

³⁸Monwɛn, na mommɔ mpaeɛ, na moankɔ sɔhwɛ mu. Honhom no pɛ deɛ, nanso honam no yɛ mmerɛ.

³⁹Na ɔsii mu bio kɔbɔɔ mpaeɛ kaa asɛnkorɔ no ara.

⁴⁰Na ɔsane ba bɛhunuu wɔn sɛ wɔada bio; na wɔn ani twan so, na wɔnhunu deɛ wɔmfa mmua no.

⁴¹Na ɔbaa ne mprɛnsa so, na ɔsee wɔn sɛ: Afei deɛ, monna, na monhome! Adɔɔso! Dɔn no adu; hwɛ wɔreyi Onipa Ba no ahyɛ nnebɔneyɛfoɔ nsa.

⁴²Monsɔre mma yɛnkɔ; hwɛ deɛ ɔreyi me ama no abɛn!

⁴³Na amonom hɔ ara, ɔgu so rekasa no, Yuda, dummienu no mu baako, bae, na nkurɔfokuo bebree a wɔkurakura nkrantɛ ne mmaa firi asɔfoɔ mpanimfoɔ ne Atwerɛfoɔ ne mpanimfoɔ no nkyɛn ka ne ho.

⁴⁴Na deɛ ɔyii no maeɛ no ama wɔn nsɛnkyerɛnneɛ sɛ: Deɛ mɛfe n’ano no, ɔne no, monkye no, na monsɔ no mu yie mfa no nkɔ!

⁴⁵Na ɔduruiɛ no, ntɛm ara na ɔbaa ne nkyɛn bɛkaa sɛ: Rabi! Na ɔfee n’ano.

⁴⁶Na wɔde wɔn nsa kɔsɔɔ ne mu kyeree no.

⁴⁷Na wɔn a na wɔgyina hɔ no mu baako twee ne nkrantɛ de bɔɔ ɔsɔfo panin akoa twaa n’aso.

⁴⁸Na Yesu bisaa wɔn sɛ: Moaba sɛdeɛ moreba odwotwafoɔ so, de nkrantɛ ne mmaa rebɛkyere me?

⁴⁹Daa a mewɔ mo nkyɛn asɔrefie rekyerɛkyerɛ no, moankye me; na sɛdeɛ atwerɛsɛm no bɛba mu ntira!

⁵⁰Na asuafoɔ no nyinaa gyaa no hɔ dwanee.

⁵¹Na aberanteɛ bi a ɔfira nwera de akata n’adagya soɔ dii n’akyi; na wɔkyeree no;

⁵²na ɔgyaa nwera no, firii wɔn nsa, de adagya dwanee.

⁵³Na wɔde Yesu kɔɔ ɔsɔfo panin no nkyɛn, na asɔfoɔ mpanimfoɔ ne mpanimfoɔ ne Atwerɛfoɔ no nyinaa bɛhyiae.

⁵⁴Na Petro dii n’akyi wɔ akyirikyiri kɔduruu ɔsɔfo panin no aban mu, na ɔne asomfo no kɔtenaa hɔ too gya.

⁵⁵Na asɔfoɔ mpanimfoɔ ne badwafoɔ no nyinaa hwehwɛɛ Yesu ho adanseɛ pɛɛ sɛ wɔkum no, nanso wɔannya bi.

⁵⁶Na nnipa pii dii adansekurumu tiaa no, nanso wɔn adanseɛ no anhyia.

⁵⁷Na ebinom sɔre dii adansekurumu tiaa no sɛ:

⁵⁸ Yɛate sɛ ɔreka sɛ: Mɛdwiri asɔredan a wɔde nsa ayɛ yi, na nnansa mu mɛto bi a wɔamfa nsa anyɛ.

⁵⁹Na ɛno ho mpo adanseɛ no anhyia.

⁶⁰Na ɔsɔfo panin no sɔre gyinaa mfimfini bisaa Yesu sɛ: Wommua bi? Ɛdeɛn ho na yeinom redi adanseɛ tia woɔ yi?

⁶¹ Nanso ɔmuaa n’ano na wammua bi. Na ɔsɔfo panin no bisaa no bio, na ɔsee no sɛ: Wone Kristo no, Deɛ Wɔahyira no no ba no anaa?

⁶²Na Yesu kaa sɛ: Mene no, na mobɛhunu Onipa Ba no sɛ ɔte tumi nifa, na ɔreba ɔsoro mununkum mu.

⁶³Na ɔsɔfo panin no sunsuanee ne ntadeɛ mu kaa sɛ: Ɛdeɛn hia na ɛhia yɛn adansefoɔ bio?

⁶⁴ Moate n’abususɛm no; modwene sɛn? Na wɔn nyinaa buu no fɔ sɛ ɛsɛ sɛ ɔwuo.

⁶⁵Na ebinom fitii aseɛ hinam ntasuo guu ne so, na wɔkataa n’ani, na wɔbobɔɔ no akuturuku, na wɔsee no sɛ: Hyɛ nkɔm! Na asomfo no bobɔɔ no asotorɔ.

⁶⁶Na Petro wɔ fam adihɔ no, ɔsɔfo panin no mmaawa mu baako bae,

⁶⁷na ɔhunuu Petro sɛ ɔreto gya no, ɔhwɛɛ no haa kaa sɛ: Wo nso wo ne Nasareni Yesu no na ɛnam!

⁶⁸Na Petro sanee sɛ: Mennim, na mente deɛ woreka yi ase mpo. Na ɔfirii adi kɔɔ ntwonoo mu, na akokɔ bɔnee.

⁶⁹Na abaawa no hunuu no bio, na ɔfitii aseɛ ka kyerɛɛ wɔn a wɔgyina hɔ no sɛ: Oyi fra wɔn mu bi.

⁷⁰Na ɔsanee bio. Na ɛkyɛree kakra no, wɔn a wɔgyina hɔ no ka kyerɛɛ Petro bio sɛ: Ampa ara wofra wɔn mu; ɛfiri sɛ woyɛ Galileani.

⁷¹Na ɔfitii aseɛ dii nse, na ɔkekaa ntam sɛ: Mennim onipa a moreka ne ho asɛm yi.

⁷² Na amonom hɔ ara na akokɔ bɔnee ne mprenu soɔ. Na Petro kaee asɛm a Yesu ka kyerɛɛ no no sɛ: Na ne werɛ hoo pii, Na amonom hɔ ara na akokɔ bɔnee ne mprenu soɔ ma ɔsui!